Tələb yenidirsə, Paşinyan hökuməti nəyə görə bir neçə ay əvvəl konstitusiyanın preambulasını təfsir etmək üçün Konstitusiya Məhkəməsinə müraciət etmişdi?
Azərbaycan tərəfi əvvəldən Ermənistanla sazişin imzalanması üçun şərtlərini açıq şəkildə ortaya qoyub. Lakin erməni mediası belə təəssürat yaratmağa calışır ki, guya sülh sazişinin mətni razılasdırıldıqdan sonra Azərbaycan hökuməti yeni şərtlər irəli sürüb. Lakin bu ağ yalandır, Azərbaycan Respublikasının bu məsələyə mövqeyi sabit, dəyişməz və obyektivdir. Bununla belə, erməni təbliğat maşını yeni yalanlar uydurmaqda davam edir.
Amma bu heç kimə və heç nəyə fayda verə bilməz. Ermənistan hökuməti düşünür ki, bu yalan üzərində qurulmuş təbliğat vasitəsi ilə ən azı Azərbaycan hökumətinə Avropa ölkələrinin təzyiqini təmin edə bilər. Lakin onlar bu məsələdə də yanılırlar. Bu gün Azərbaycan hökuməti müstəqil siyasət yürüdür və Avropa ölkələtindən heç bir asılılığı yoxdur. Hazırki mərhələdə hələ Avropanın bizə ehtiyacı var. Azərbaycan Avropanın enerji təhlükəsizliyi arxitekturasında vacib aktorkardan birinə çevrilməkdədir. Ölkəmiz Avropanın qaza olan tələbatının 5 faizini, neftə olan tələbatının isə 11 faizini təmin edir. Qaz ixracının iki dəfə artırılması və elektrik enerjisi - "yaşıl enerji" ixracına başlanması nəzərdə tutulur.
Digər tərəfdən, Avropa bizə edə biləcəyini artıq 2024-cü ilin yanvarında edib - AŞPA-dakı nümayəndələrimizi səsvermə hüququndan məhrum edib. Bu il də həmin qərar qüvvədədir. Bütün bunlara rəğmən, erməni mediası yazır ki, görünür, Azərbaycan Ermənistanla sülh sazişi imzalamağı təxirə salır: "Ən azından, Bakıdan gələn ultimatum bəyanatlarının getdikcə artması və tələblərin, xüsusən də qısa zaman kəsiyində yerinə yetirilməsinin mümkünsüz olması da bunu sübut edir".
Maraqlıdır, hansı tələbi qısa zamanda yerinə yetirmək mümkün deyil? Məlum olduğu kimi, Azərbaycanın Ermənistandan sülh sazişindən kənar iki əsas və məntiqli tələbi var: Ermənistan konstitusiyasındakı ərazimizə iddianı nəzərdə tutan maddənin aradan qaldırılması və qarşısına qoyulan vəzifələrin onun iştirakı olmadan həll edilən Minsk qrupunun ləğv edilməsi barədə rəsmi bəyanatın verilməsi. Birinci məsələ ilə bağlı qeyd etmək istərdik ki, Ermənistan konstitusiyasının 202-ci maddəsinə əsasən sənədin preambulasını, yəni girişini parlamentin 2/3 səs çoxluğu ilə dəyişdirmək səlahiyyəti var. Parmamentdə isə Paşinyanın tərəfdarlarının sayı 2/3-dən kifatət qədər çoxdur. Azərbaycanın tələbi də məhz preambulada dəyişikliklə bağlıdır. Paşinyan bunu etməyə qorxursa, onsuz da konstitusiya dəyişikliyinə deyil, yeni konstitusiyanın qəbuluna hazırlaşır. Yeni konstitusiyanın qəbulu zamanı da bu tələb nəzərə alına bilər. Hara tələsirik ki, 30 il biz torpaqlatımızın azad edilməsini gözləmişik, qoy bir neçə il də Ermənistan kommunikasiyaların açılmasını gözləsin.
İkinci məsələnin həllində ümumiyyətlə problem yoxdur. Çünki Minsk qrupu artıq 5 ildir ki, fəaliyyətsizdir. Üstəgəl, Rusiya onun mövcudluğunu qəbul etmir. Fransa ilə Amerikanın isə arasında soyuq küləklər əsir. Belə bir şəraitdə Minsk qrupunun qalmasına heç bir lüzum yoxdur. Əgər Ermənistan sülh istəyirsə, özlərinin dediyi kimi, onun üçün heç bir əhəmiyyət kəsb etməyən bu məsələləri niyə həll etmirlər?
Erməni mediasi iddia edir ki, guya bu tələblər sonradan irəli sürülüb. Elə isə, hökumət nəyə görə bir neçə ay əvvəl Ermənistan konstitusiyasının preambulasındakı həmin maddəni təfsir etmək üçün konstitusiya məhkəməsinə müraciət etmişdi? Əlbəttə, bu addim Azərbaycanın tələbi əsasında atılmışdı. İndi isə ermənilər üzümüzə at kimi dirəniblər ki, bu yeni tələbdir.
Bununla yanası, Ermənistan bir tərəfdən sülh sazişinin imzalanmasının vaxtını və yerini müəyyənləşdirmək barədə bəyanat verir, digər tərəfdən isə atəşkəsi pozur, ordumuzun mövqelərini atəsə tutur. Ardınca isə təkzib edir ki, belə bir hadisə baş verməyib. Bəs Avropa mülki müşahidə missiyası hara baxır? Görəsən bu atışma missiyyanın əməkdaşları tərəfindən qeydə alınıbmı?
"Biz Ermənistan Baş naziri aparatının Azərbaycana qarşı tamamilə əsassız iddiaları ilə yanaşı, yerdəki reallıqları və sərhədyanı rayonların atəşə tutulması faktlarını təhrif edən 18 mart 2025-ci il tarixli bəyanatını qətiyyətlə rədd edirik”, - deyə Azərbaycan Xarici İşlər Nazirliyinin sözçüsü Ayxan Hacızadə bildirib.
Yəni həm mövqelərimizi atəşə tuturlar, həm də bunu təkzib edirlər. Bu, Ermənistan dövlətinin köhnə mərəzidir, 90-cı illərdə də ruslatın köməyi ilə ərazilərimizi işğal edir, ardınca isə bunu təkzib edirdilər.
Sonda bir daha qeyd edirik ki, Azərbaycanın sülh sazişinin imzalanması üçün şərtləri əvvəldən sabit və obyektiv olaraq qalır. Ermənistan isə bu tələblərin, guya sonradan irəli sürüldüyünü idda edir.
Akif NƏSİRLİ
