Azər Həsrət: "Uzun illər ATƏT-in Minsk qrupu üçüncü tərəfin aktoru olaraq bu prosesdə iştirak etdi, amma heç bir nəticə əldə olunmadı"
Rusiya Xarici İşlər Nazirliyinin bəyanatında deyilir ki, biz Azərbaycan və Ermənistan respublikaları arasında sülh və dövlətlərarası münasibətlərin qurulması haqqında saziş layihəsinin mətni üzrə danışıqların başa çatdırılmasını alqışlayırıq.
“Biz Rusiya, Azərbaycan və Ermənistan liderlərinin 2020-2022-ci illər üçün üçtərəfli sazişlərində nəzərdə tutulduğu kimi, Ermənistan-Azərbaycan münasibətlərinin tam və hərtərəfli normallaşmasına nail olmaq üçün bu mühüm addımı dəstəkləyirik.
Biz sülh prosesinin daha da irəliləyişinə və Bakı ilə İrəvan arasında qalan məsələlərin - sülh sazişinin imzalanması üçün zəruri olan məsələlərin, o cümlədən də nəqliyyat kommunikasiyalarının blokunun açılması, ümumi sərhədin delimitasiyası və humanitar məsələlərin tərəfdaşlar üçün məqbul olan həddə və formada həllinə hər cür kömək göstərməyi hədəfləyirik. Rusiya xarici işlər nazirinin Ermənistan-Azərbaycan münasibətlərinin normallaşdırılmasına yardım üzrə xüsusi nümayəndəsi İqor Xovayev müvafiq məsləhətləşmələr aparmaq üçün Bakı və İrəvana səfər etməyə hazırdır.
Biz Ermənistan-Azərbaycan münasibətlərinin normallaşdırılması məsələlərinin bütün spektri üzrə Azərbaycan və Ermənistan nümayəndələri arasında təmaslar, habelə sülh müqaviləsinin imzalanması üçün Rusiya platforması təqdim etmək təklifimizi təsdiq edirik”, - deyə məlumatda bildirilir.
Rusiya Amerika ilə münasibətlərinin iştiləşdiyi bir dövrdə özünün Azərbaycan-Ermənistan münasibətlərinin normallaşması üzrə nümayəndəsi İqor Xovaevin fəaliyyətini yenidən aktivləşdirirsə, belə bir qənaətə gəlmək olarmı ki, Moskva və Vaşinqton köhnə Minsk qrupuna bənzər bir qurum yaratsın? Axı Amerika da Luis Bononu Qafqazda danışıqlar üzrə xüsusi nümayəndəsi təyin edib. Bu iki dövlətin hər ikisinin sözügedən məsələ barədə xüsusi nümayəndəsinin olması bizi ehtiyatlanmağa vadar etməlidirmi?
Siyasi şərhçi Azər Həsrət baki-xeber.com-a məsələ ilə bağlı açıqlamasında bildirdi: "Belə bir deyim var: xəbər yalılır ki, Əzrail övlad paylayir, adamlar da cavab verir ki, övladımıza dəyməsin, Əzrailin payladığı övladı istəmirik. Hazırda Azərbaycanla Ermənistan öz aralarında danışıb anlaşa bilir, çox gözəl nəticələr ortadadır. Üçüncü tərəf olmadan bu iki ölkənin rəhbərləri işçi qruplar vasitəsilə rahat bir şəkildə işləyirlər. Heç bir problem yoxdur, problemlərin çözülməsi üçun imkanlar yaranıb və ciddi irəliləyişlər müşahidə edilir. Belə bir şəraitdə nə Rusiyanın, nə də Amerikanın bu məsələyə qarışması uyğun deyil. Onların bu münaqişəni uzun müddət aktiv saxlayıb ondan istifadə etməklə bölgəni öz xeyirlərinə idarə etmək niyyəti həmişə var və gələcəkdə də mövcud olacaq.
Onlar münaqişənin tam olaraq aradan qaldırılmasını, munasibətlərin normallaşmasını səmimi olaraq istəyirsə, kənarda qalmalıdırlar. Biz istəməzdik ki, yenə məsələyə üçüncü tərəflər müdaxilə etsin və nəticə əvvəlki kimi təkrarlansın. Uzun illər Azərbaycan-Ermənistan münasibətlərinə üçüncü tərəflər müdaxilə etdiyinə görə biz dil tapa, anlaşa bilməmişik və problemlər də bu cür üst-üstə yığılıb qalıb. İndi isə elə bir şərait yaranıb ki, Ermənistanla Azərbaycan çox rahat şəkildə problemləri çözə bilir. Belə bir şəraitdə üçüncü tərəfə heç bir ehtiyac yoxdur.
Sülh müqaviləsinin mətninin razılasdırılması ilə bağlı biz bir çox ölkələrin alqış mesajlarını aldıq. Biz bunları məmnuniyyətlə qəbul edirik. Amma danışıqlara "kömək etmək" adı altında müzakirələrə üçüncü tərəfin müdaxilə etməsinə Azərbaycanın heç bir ehtiyacı yoxdur. Əslində Ermənistanın da belə bir "köməyə" ehtiyacı yoxdur. Əgər iki tərəf bir masa arxasında oturub danışa, anlaşa bilirsə, üçüncü tərəfə nə ehtiyac var?
Digər tərəfdən, əvvəllər biz üçüncü tərəflərin fəaliyyətindən yalnız zərər çəkmişiksə, o acı təcrübəni yenidən təkrarlamağın yeri varmı? Əlbəttə, yoxdur... Ona görə də Azərbaycan dövləti bu məsələyə üçüncü tərəfin müdaxilədinə müsbət yanaşmayacaq. Yaxşı olar ki, Ermənistan da məsələyə üçüncü tərəflərin müdaxiləsinə yol verməsin.
Uzun illər ATƏT-in Minsk qrupu üçüncü tərəfin aktoru olaraq bu prosesdə iştirak etdi, amma heç bir nəticə əldə olunmadı. İndi keçmiş qrup üzvləri olan Amerika və Rusiyanın yenidən bu prosesə qatılmalarının bizə heç bir faydasi olmayacaq. Fayda vermək fikrində olsaydılar, onu Minsk qrupunun tərkibində də verə bilərdilər. Ona görə də bu məsələdə üçüncü tərəfin iştirakına nə Azərbaycan, nə də Ermənistan razı olmalıdır. Yəni biz artıq acı təcrübəyə sahibik, buna əsaslanıb prosesdə üçüncü tərəfin iştirakına qarşı çıxmalıyıq. Biz bir-birimizlə danışıb anlaşa bilirik".
Dəniz NƏSİRLİ
