Avrasiya İqtisadi İttifaqı (Aİİ) ölkələrindən olan şirkətlər Ermənistanın Avropa İttifaqı (Aİ) ilə inteqrasiyasının mümkün mənfi nəticələrini nəzərə alaraq, ona güvənə bilməyəcəklər. Bunu Rusiya Xarici İşlər Nazirliyinin rəsmi nümayəndəsi Mariya Zaxarova deyib.
Zaxarova daha sonra bildirib: “Mənə elə gəlir ki, əgər Aİİ-nin artıq rəsmi İrəvan üçün maraq kəsb etmədiyi barədə bəyanatlar eşidilirsə, bu təkcə dövlət mövqeyi məsələsi deyil, həm də iqtisadi operatorların məsələsidir. Onlar özləri üçün müvafiq nəticələr çıxarırlar ki, o tərəfdəki tərəfdaşlar, görünür, bu məsələdə maraqlı deyillər”. Onun sözlərinə görə, Ermənistanla biznes əməkdaşlığının inkişaf perspektivləri bu məlumat nəzərə alınaraq qurulacaq. Bundan əlavə, Rusiya XİN-in rəsmi nümayəndəsi vurğulayıb ki, belə şəraitdə Aİİ-nin biznes strukturları digər tərəfdaşlara yönələcək: “Onlar başa düşürlər ki, artıq bu amili nəzərə alaraq hərəkət etmək lazımdır. Ermənistan başa düşməlidir ki, Avropa İttifaqı və Avrasiya İqtisadi İttifaqında qarşılıqlı əlaqələrin qurulduğu tarif və normativ-hüquqi bazalar bir-birini istisna edən xarakterə malikdir. Məsələ siyasi meyllilikdə deyil, Aİ və Aİİ-də qarşılıqlı əlaqələrin qurulmasının əsasını təşkil edən bütün normativ-hüquqi bazaların və tarif sistemlərinin bir-birini istisna edən xarakterə malik olmasındadır”. Diplomatın sözlərinə görə, bu problemi səsləndirməmək və gizlətmək mümkündür, lakin bu, artıq dezinformasiya olacaq: “Söhbət Ermənistanın suveren seçimindən gedir, lakin bütün növbəti addımların nəticələrini izah etmək baxımından əsas məsuliyyəti ölkənin indiki hakimiyyəti daşıyır. Belə taleyüklü qərarlar qəbul ediləndə ictimai rəy sorğularını öyrənmək və hazırlıq işləri görmək, dürüst olmaq lazımdır”. Bunlar fonunda erməni bloger Bellanın Belarusda həbs edilməi Ermənistanda böyük təşvişə səbəb olub. İkili – Ermənistan və Belarus vətəndaşlığı olan Bella 5 maddə ilə ittiham olunur: irqi, milli, dini və ya digər sosial nifrət və ya nifaq salma, müharibə təbliğatı, böhtan, hakimiyyət nümayəndəsini təhqir etmə, təhdid. Ermənistan mediası yazır ki, Rusiya və Belarus artıq paralel şəkildə Ermənistana qarşı `təzyiq siyasətinə başlayıblar. Bu xüsusda “armenianreport” portalı yazır: “Rusiya Xarici İşlər Nazirliyinin rəsmi nümayəndəsi Mariya Zaxarovanın son dedikləri, əslində siyasi və diplomatik vidalaşma idi. Elə bu durumda Belarusun da iştirak etdiyi təxribat gördük. Məlum olduğu kimi, bloger Bella Belarusda 15 sutka həbs edilib və bundan sonra məhkəmə onun barəsində həbs-qətimkan tədbiri müəyyən edəcək. O, hazırda həbsdədir. Üstəlik o, Belarus Respublikası Cinayət Məcəlləsinin çox ağır maddələri ilə ittiham olunur. Bloger Aleksandr Lapşin bütün bunların arxasında Azərbaycanın olduğunu iddia edir. Bunu zaman göstərəcək, amma yenə də daha çox o görünür ki, bu, Rusiya və Belarusun işidir. Yəni Azərbaycan çox güman ki, bu məsələdə yalnız benefisiar olub və bütün bu işi Putin və Lukaşenko həyata keçirib. Bu versiyanı həm də Bakı ilə Moskva arasında münasibətlərin, yumşaq desək, hazırda o qədər də yaxşı olmaması da dəstəkləyir.
Bəli, Bellanın saxlanması üçün Bakıdan müraciət olmalı idi. Həbsin indi həyata keçirilmə vaxtı onu göstərir ki, biz iki slavyan diktatorunun birgə əməliyyatı ilə üzləşmişik. Məqsəd bəllidir - ölkəmizin rəhbərliyini aşağılamaq. Putin və Lukaşenko bu hadisənin hansı ajiotaj yaradacağını çox gözəl anladılar. Ölkəmizin sürətlə Avropaya yaxınlaşmasına Rusiya çox əsəbi reaksiya verir. Bəli, biz ABŞ-ın vitse-prezidenti Vansın 2025-ci il Münhen Təhlükəsizlik Konfransındakı çıxışından xəbərdarıq. Vens deyib: “Mən daxildən gələn təhlükədən narahatam: Avropanın öz fundamental dəyərlərindən – bizim ABŞ-la paylaşdığımız dəyərlərdən geri çəkilməsindən”. Bir çox avropalı siyasətçi ona cavab verdi və biz ABŞ ilə Avropanın aparıcı dövlətləri arasında münaqişənin dərinləşməsini təəssüflə izləyirik. Kollektiv Qərb anlayışının artıq mövcud olmadığı barədə söhbətləri artıq eşidirik. Əminik ki, bu yanlış fikirdir. Bu birliyi çoxdan möhkəmləndirən fundamental əsas var. Buna demokratiya deyirlər. Bu, Ermənistanı Aİİ və KTMT-də saxlamağa can atan Rusiya və Belarusda olmayan bir şeydir. Mariya Zaxarovanın sözləri onu göstərir ki, biz tezliklə ölkəmizə qarşı iqtisadi təzyiq görəcəyik. Bundan əlavə, bədnam “beşinci kolon” daha da fəallaşa bilər. İndi bunun səbəbi "təsadüfən" yaranıb. Bəli, bloger Bellanın həbsi Moskvayönlü siyasi qüvvələr tərəfindən respublika rəhbərliyinə qarşı yeni ittihamlar üçün əsas olmalıdır. Onlar “zəif və qorxaq hökumətə” xalqın narazılığını nümayiş etdirməyin vacibliyi barədə qışqıracaqlar. Son vaxtlar bu qüvvələrin müxtəlif təxribatlarla ölkədə daxili siyasi sabitliyi necə pozduğunu artıq görmüşük. Məsələn, Zəngəzur Mis-Molibden Zavodunun işçilərinin etirazının təkcə iqtisadi deyil, həm də siyasi xarakter daşıdığı açıq-aydın görünür. Sadə dillə desək, bu, təxribat idi. İrəvan sakinlərinin ictimai nəqliyyatın bahalaşması ilə bağlı “etirazı” da təxribatdır. Bütün bunların ssenariləri Kremldə yazılıb. Və icraçı Minskdir. Hətta Aleksandr Lukaşenkonun bunu necə sevinclə həyata keçirdiyini təsəvvür edə bilərik. Bu, həm də onun Nikol Paşinyana qarşı şəxsi qisası idi və o, artıq belaruslu hakimiyyəti qəsb edənlə danışmağa heç nəyin olmadığını açıq şəkildə bəyan etdi. İndi o, ölkəmizin baş nazirinin bloger Bellanın həbsi ilə təxribatı “birtəhər həll etməsini” gözləyəcək. Bu şəraitdə təcili cavab tədbirləri tələb olunur. Belarus səfirinin ölkəmizdən qovulması isə bu şəraitdə mümkün olan ən az şeydir. Əlbəttə, Lukaşenkonu ayıltmağın başqa üsulları da var. Avropalı müttəfiqlərimiz isə hazırda ölkəmizin rəhbərliyini dəstəkləməyə borcludurlar”.
Nahid SALAYEV
