Əli Orucov: “Bütün bunlar Ermənistan hakimiyyətinin əsl simasını ortaya qoyur”
Azərbaycandan sonra Moldova da Kişinyovdakı “Rus Evi”nin bağlanmasına qərar verib. Belə ki, Moldova Xarici İşlər Nazirliyi mədəniyyət mərkəzlərinin yaradılması və fəaliyyət göstərməsi ilə bağlı 1998-ci il tarixli Moldova-Rusiya sazişinə birtərəfli qaydada xitam verilməsi barədə qərar qəbul edib.
“Xitam prosedurları başa çatdıqdan sonra Rusiya Mədəniyyət Mərkəzi bizim ölkəmizdə öz fəaliyyətini dayandırmalıdır”, - Moldova Xarici İşlər Nazirliyinin məlumatında deyilir.
Ancaq bütün bunlardan fərqli olaraq, İrəvandakı “Rus Evi” isə son vaxtlar fəaliyyətini genişləndirib, Ermənistandakı məktəb və universitetlərinə rus dilində dərsliklər paylayır, şagirdlərin Rusiyanın Gümrüdəki hərbi bazasına tanışlıq səfərlərini təşkil edir. İrəvandakı “Rus Evi” Ermənistan Elmlər Akademiyasının elmi mərkəzi ilə əməkdaşlıq əlaqələri də qurub. Müqavilə birgə tədqiqat layihələrini, konfrans və seminarların təşkilini nəzərdə tutur. Bu hələ Ermənistandakı “Rus Evi”nin fəaliyyətinin görünən tərəfidir. Məsələnin görünməyən tərəfinə gəldikdə isə, üstüörtülü proseslərin miqyası daha böyükdür.
“Paşinyanın “Rus Evi”nə belə geniş meydan verməsi bir gün ona baha başa gələcək”
Sözügedən məsələni “Bakı-Xəbər”ə şərh edən AMİP funksioneri Əli Orucov hesab edir ki, bütün bunlar Ermənistan hakimiyyətinin əsl simasını ortaya qoyur: “Sözdə guya Paşinyan Qərbpərəst mövqedən çıxış edir. Guya Rusiyadan uzaqlaşmaq, Moskvanın təsir imkanlarını azaltmaq kursu götürüblər. Qərbdən bunun müqabilində milyonlarla dollar yardım alırlar. Ancaq həmin Ermənistanla Rusiya arasında ticarət dövriyyəsi ötən il 14 milyard dollar olur. Necə olur ki, kiçik və iqtisadi imkanları məhdud olan Ermənistan Rusiya ilə belə böyük ticarət dövriyyəsinə malikdir? Bəlli məsələdir ki, Ermənistan Rusiyanı sanksiya altında olan məhsullarla təmin edir. Paşinyan həqiqətən də Qərbpərəst mövqedən çıxış etsəydi, indiyə qədər Ermənistanda “Rus Evi”nin fəaliyyətini məhdudlaşdırardı. Rusiyanın təbliğat ruporu olan “Sputnik Ermənistan”a geniş meydan verməzdi. Məgər Paşinyan bilmir ki, bir sıra postsovet ölkələrində fəaliyyət göstərən “Rus evləri” kəşfiyyat fəaliyyəti ilə məşğuldular? Çox yaxşı bilirlər. Sadəcə, onlar da bu və ya digər formada oyunun içindədilər. Üstəlik, təyyarəmizin vurulması ilə əlaqədar Azərbaycan-Rusiya münasibətlərində yaşanan soyuqluq Ermənistanda böyük sevinclə izlənilir. Onlar hesab edirlər ki, münasibətlərin gərginləşməsi ermənilərin xeyrinə işləyəcək. Ancaq istənilən halda ermənilər yanılır. Azərbaycan 90-cı illərdəki yeni qurulan zəif dövlət deyil ki, Rusiyanın yardımı ilə ərazilərimizi işğal etsinlər. Bu, heç vaxt bir də mümkün olmayacaq. Azərbaycan çox güclü durumdadır. Üstəlik, bir sıra postsovet dövlətlərində mərhələli şəkildə Rusiyanın agentura şəbəkəsi ifşa ediləcək. Paşinyanın “Rus Evi”nə belə geniş meydan verməsi bir gün ona baha başa gələcək. O zaman kimsə onu xilas edə bilməyəcək”.
Vidadi ORDAHALLI
