Elşad Həsənov: “Məqsədi o idi ki, bir sıra ölkələrdə onlara bağlı idarə olunan şəbəkə yaratsınlar”
ABŞ Beynəlxalq İnkişaf Agentliyi (USAİD) ətrafında qalmaqal böyüyür və yeni-yeni faktlar ortaya çıxır. İfşa prosesi davam etdikcə, yeni-yeni faktlar ortaya çıxır.
Məlum olur ki, USAİD-in dünya üzrə maliyyələşdirdiyi nüfuzlu medialara – The New York Times” (2024-cü ildə 3,1 mln.dollar ayrılıb), “Politico” (8 mln. dollar), “Associated Press” (19 mln.dollar), BBC (2,6 mln.funt), Reuters (9 mln.dollar), Frans-Press (447 min dollar) böyük həcmdə vəsaitlər ayrılıb. Ümumilikdə 700-dən artıq media orqanı, 300-ə yaxın media sahəsində çalışan QHT və 6 mindən çox jurnalist maliyyələşdirilib. Fevralın 6-dan ABŞ hökuməti bu təşkilat vasitəsilə “The New York Times”, “Politico” və “Associated Press”in maliyyələşdirilməsini dayandırıb.
Onu da qeyd edək ki, sözügedən media orqanları həmişə Azərbaycana qarşı qərəzli, ədalətsiz mövqedən çıxış ediblər.
Maraqlıdır, USAİD bu qədər vəsaiti hansı məqsədlərlə ayırıb? Bütün bunların arxasında nə dayanıb?
“USAİD-in maliyyələşdirdiyi media orqanları Azərbaycana qarşı təbliğat, qaralama kampaniyası aparır”
Sözügedən məsələ ilə bağlı fikirlərini “Bakı-Xəbər”lə bölüşən siyasi ekspert Elşad Həsənovun fikrincə, USAİD 50 milyard dollar büdcəyə malik dünyanın ən böyük yardım agentliyi olub: “ABŞ tərəfindən maliyyələşdirilən USAİD Konqres tərəfindən xarici yardım aktı vasitəsilə tənzimlənir. USAİD-in 100-dən artıq ölkədə, o cümlədən, Afrika, Asiya, Latın Amerikası və Yaxın Şərqdə və Avropada nümayəndələri var. Bunların sözdə dediyi dünyada vətəndaşların həyatını yaxşılaşdırmaqla yanaşı, demokratiya və azad bazar iqtisadiyyatının inkişafına töhfə verməkdir. Ancaq reallıqda isə əsl məqsədləri başqadır. Əsl məqsədləri ölkələrin daxili işinə qarışmaq, hakimiyyətləri devirmək və bundan öz məqsədləri üçün istifadə etməkdir. Burada da əsasən dünyadakı aparıcı media vasitələrindən bir vasitə kimi istifadə edirlər. Yəni aparıcı media orqanlarını maliyyələşdirməklə dünyadakı ictimai rəyi manipulyasiya etmək istəyirlər. Tramp prezident səlahiyyətlərini icra etməyə başlayandan sonra USAİD-in fəaliyyətini dayandırdı. Məlum oldu ki, ortada böyük korrupsiya əməlləri var və 100 milyonlarla vəsait təyinatı üzrə xərclənməyib. USAİD-in məqsədi o idi ki, bir sıra ölkələrdə onlara bağlı idarə olunan şəbəkə yaratsınlar. Zərurət yaranarsa, bu şəbəkədən istifadə etməklə hakimiyyətə təzyiq göstərmək məqsədi güdürdülər. Bu işdə də bəlli media orqanlarından əsas təzyiq vasitəsi kimi istifadə edirdilər. Son nəticədə ölkələrdə xaos yaradıb hakimiyyətləri devirmək istəyirdilər. Dünyanın ən nüfuzlu mətbuat orqanları bunların əlində bir alət olub. İstədiklərində hansısa dövlətə, onun rəhbərliyinə qarşı qaralama kampaniyası aparırlar. Üstəlik, USAİD ABŞ-ın kəşfiyyat orqanlarının fəaliyyət göstərməsi üçün zəmin yaradıb. Həmin bu USAİD Gürcüstanda rəngli inqilab törətmək üçün 47 milyon dollar ayırıb. Ancaq gürcü xalqı buna imkan vermədi. USAİD-in maliyyələşdirdiyi media orqanları Azərbaycana qarşı təbliğat, qaralama kampaniyası aparır. Görəndə ki, Azərbaycana birbaşa təsir edə bilmirlər, bu kimi qaranlıq vasitələrə əl atırlar. Bu baxımdan hesab edirəm ki, araşdırmalar nəticəsində ortaya hələ çox şeylər çıxacaq”.
Vidadi ORDAHALLI
