Elşən Manafov: “Rəsmi Bakının apardığı məhkəmə proseslərinin qanuniliyini şübhə altına almaq istəyirlər”
Məlum olduğu kimi, Bakı Hərbi Məhkəməsində separatçı Ruben Vardanyanın məhkəməsi davam edir. Vardanyan Azərbaycan tərəfinin ayırdığı vəkildən imtina edib.
Avropa İnsan Haqları Məhkəməsində erməni məhbusların maraqlarının müdafiəçisi, vəkil Siranuş Saakyan erməni mediasına açıqlamasında bildirib ki, Vardanyan Azərbaycan tərəfinin ayırdığı vəkilin ona heç bir hüquqi yardım göstərmədiyi, heç vaxt təcridxanada ona baş çəkmədiyi üçün ona etibar etmir. Məhz bu səbəbdən ondan imtina edib. Siranuş qeyd edib ki, Vardanyanın maraqlarını orada onun Azərbaycanda lisenziyası olan şəxsi vəkili Abraham Berman müdafiə edəcək. Azərbaycan prokurorluğu Jared Genser Bakıya gəlmək xahişini rədd etdiyi üçün o, beynəlxalq hüquqşünas Jared Genserlə görüşmək və ya ondan hüquqi yardım almaq imkanından məhrumdur.
Bir tərəfdən deyirlər ki, Vatrdanyan Azərbaycanın ayırdığı vəkildən imtina edib. Digər tərəfdən deyirlər ki, Vardanyanı onun şəxsi vəkili Berman müdafiə edir. Sonra da deyirlər ki, beynəlxalq vəkil Genseri də Azərbaycana buraxmayıblar. Onun Azərbaycana buraxılmaması məsələsi də nə dərəcədə real ola bilər? Ermənistan hələ separatçılarla bağlı məhkəmə bitmədən məsələni Avropa İnsan Haqları Məhkəməsi müstəvisinə çıxarmaq istəyir. Məhkəmə bitmədən hansı prosesdən söhbət gedə bilər? Bu mürəkkəb vəkil oyunları oynamaqda ermənilərin məqsədi nədir?
“Vardanyan ətrafında qaldırdıqları hay-küy bu rejimin cinayətlərini ört-basdır etmək məqsədi güdür”
Sözügedən məsələni “Bakı-Xəbər”ə şərh edən politoloq Elşən Manafov hesab edir ki, erməni tərəfinin bu vəkil oyunlarında bir neçə məqsədi var: “Ermənistan və erməni diasporasının Qarabağdakı separatçı rejiminin bir çox rəhbərləri, o cümlədən Vardanyan ətrafında qaldırdıqları hay-küy bu rejimin cinayətlərini ört-basdır etmək məqsədi güdür. Onun Qərb və regional konteksdəki bir sıra cinayət əməlləri üzrə rəsmi Bakının apardığı məhkəmə proseslərinin qanuniliyini şübhə altına almaq istəyirlər. Bu, onların Azərbaycan məhkəmə sisteminə təzyiq etmək istəklərindən irəli gəlir. Həm də bununla Azərbaycanı dünyada qaralamaq istəyirlər. Vardanyan Rusiyanın tanınmış iş adamlarından biri kimi Qarabağa qanunsuz gəlib. Bütün bunlar azmış kimi, separatçı qurumda qondarma “nazir” kimi fəaliyyət göstərib. Hərçənd, buna qədər o, Rusiya vətəndaşlığından imtina edib. Bir arada o, Paşinyana Qarabağdakı seçkilərdə əsas rəqib olacaq namizədlərdən biri idi. Hazırda onun şəxsiyyətinə rəsmi İrəvandan olan maraq müxtəlif yönümlü siyasi qüvvələrin seçkilərdə onun elektoratına olan maraqdan qaynaqlanır. Bu minvalla revanşist qanad onu şişirtmək istəyir. Ancaq hesab edirəm ki, onların bu cəhdləri fiaskoya uğrayıb. Ən azından ona görə ki, hazırkı vəziyyət 90-cı illərdəki situasiya deyil. Məlumat üçün qeyd edək ki, separatçı Robert Köçəryanı Qarabağdan gətirib prezident etdilər. İndi o dövr deyil. Ən azından ona görə ki, Azərbaycan suverenliyini və ərazi bütövlüyünü tam təmin edib”.
Vidadi ORDAHALLI
