Rauf Zeyni: “USAİD “Əl-Qaidə” və başqa terror təşkilatlarını maliyyələşdirməkdə, terror təşkilatının başına keçəcək adamın təhsil haqqını ödəməkdə xüsusi məqsəd güdüb”
ABŞ Beynəlxalq İnkişaf Agentliyinin (USAİD) terrora dəstək verməsi, terror təşkilatlarına maliyyə yardımı göstərməsi faktları da üzə çıxıb. USAİD-in “Əl-Qaidə” ilə əlaqələri ifşa olunub.
Məlum olub ki, USAİD “Əl-Qaidə” təşkilatı üçün 10 min porsiya yemək alıb. Eyni zamanda USAİD-in “Əl-Qaidə”nin gələcək lideri Ənvər Əl-Əvlakinin kollecdə təhsilini maliyyələşdirməsi məsələsi də öz təsdiqini tapıb.
Ümumiyyətlə, “Əl-Qaidə” də daxil olmaqla bu qurumun terror təşkilatlarına maliyyə dəstəyi göstərdiyi barədə məlumatlar mövcuddur.
Livanda “Hizbullah”ın silah anbarında üzərində USAID loqoları olan qutuların aşkarlanması, “Əl-Qaidə” terror təşkilatının lideri Ənvər əl-Avlakinin Koloradodakı kollecdə oxuması üçün USAID-in “tam maliyyə vəsaiti” ayırması faktları bu təşkilatın terrorla, terrorçularla yaxın təmaslarını təsdiqləyir. Bundan başqa, USAİD-in Əfqanıstanda narkotik plantasiyalarına sahib olması, narkotik vasitələrin istehsalı ilə məşğul olması faktları da inkaredilməzdir. “Humanist” donu geyib dünyanı dolaşan USAİD əslində cinayətə, terrora, kütləvi fəlakətlərə səbəb olan işlərə dəstək verib.
Terroru maliyyələşdirməkdə, terror təşkilatının başına keçirilmək üçün hazırlanan adamın təhsil xərcini ödəməkdə USAİD-in marağı, məqsədi nə olub ki, bu addımları atıb?
“Bir daha təsdiqləndi ki, bu təşkilatın fəaliyyəti şəffaf olmayıb, o, terror məsələsinə də bulaşıb”
Müstəqil ekspert Rauf Zeyni “Bakı-Xəbər”ə şərhində bildirdi ki, USAİD tərəfindən terror maliyyəçiliyi layihələri həyata keçirilməsi ABŞ prezidenti Tramp tərəfindən bəyan edilib. O qeyd etdi ki, İlon Maskın da USAİD-in cinayətkar təşkilat olduğu barədə fikirləri var.
R.Zeyninin sözlərinə görə, USAİD-in terror maliyyəçisi olması çox ciddi faktdır və o müəyyən terror təşkilatını maliyyələşdirib, “Əl-Qaidə” terrorçularına dəstək olub, “Əl-Qaidə”nin rəhbəri postuna hazırlanan Ənvər əl-Əvlakinin kollec təhsil haqqının ödənilməsini həyata keçirib. “Trampın və İlon Masksın USAİD-in terroru maliyyələşdirməsi faktını üzə çıxarması, ifşa etməsi çox ciddi məsələdi. Biz illər idi ki, bu təşkilatın şəffaf olmayan fəaliyyəti barədə danışırdıq, məlumatları bölüşürdük. Bir daha təsdiqləndi ki, bu təşkilatın fəaliyyəti şəffaf olmayıb, o, terror məsələsinə də bulaşıb.
Bildirirdik ki, beynəlxalq təşkilat adı altında ABŞ-ın və Avropanın güc mərkəzləri ədaləti, demokratik dəyərləri müdafiə etmək əvəzinə terroru, işğalı və neqativ halları, antibəşəri fəaliyyəti dəstəkləyir. Hazırda bu qurumun fəaliyyətindəki neqativlərlə bağlı informasiyaların yayılması bizə deməyə əsas verir ki, USAİD özünün mandatından, nizamnaməsindən kənar tamamilə qəbuledilməz, ziddiyyətli fəaliyyətlə məşğul olub. İndi çox yaxşıdır ki, bu cinayətlərin üstü açılır. Bu gün İlon Mask başda olmaqla, Tramp administrasiyası bu fəaliyyəti açıb ifşa etdi”.
R.Zeyni hesab edir ki, biz də, bütün dünya da bundan ciddi nəticələr çıxarmalıdır. O vurğuladı ki, Azərbaycan dövləti bu məsələlərə hələ bir neçə il əvvəl münasibət bildirib, dövlət səviyyəsində bu cür fəaliyyət göstərən təşkilatların ölkəmizdə fəaliyyəti məhdudlaşdırılıb. “Zaman göstərdi ki, biz doğru etmişik, Azərbaycanın müstəqilliyini, təhlükəsizliyini və suverenliyini qoruyub saxlamışıq. İctimaiyyət də bu məsələdə məlumatlı və diqqətli olmalıdır.
USAİD “Əl-Qaidə” və başqa terror təşkilatlarını maliyyələşdirməkdə, terror təşkilatının başına keçəcək adamın təhsil haqqını ödəməkdə xüsusi məqsəd güdüb. Onun bu işləri niyə gördüyü, yəqin ki, araşdırmalar zamanı üzə çıxacaq”-deyə R.Zeyni vurğuladı.
İradə SARIYEVA
