Şakir Ağayev: “Prezident İlham Əliyevin tam reallığı əks etdirən fikirlərini Tramp da təsdiqlədi və ABŞ-ın dövlət qurumlarından maliyyə alıb sifarişlər yerinə yetirən media qurumlarını ifşa etdi”
Beynəlxalq aləmdə tanınan media qurumlarının ayrı-ayrı dairlərin muzdlu əlatısına çevrildiyi bizə həmişə məlum olub. Bu media qurumları arasında ABŞ-ın “Washington Post”, “New York Times” kimi qəzetlərinin olduğu da açıq-aşkar ortadadır. Azərbaycan Prezidenti İlham Əliyev ötən ilin dekabrında “Rossiya Seqodnya” Beynəlxalq İnformasiya Agentliyinin Baş direktoru Dmitri Kiselyova müsahibəsində “Washington Post”, “New York Times”, “Figaro” və “Le Monde” nəşrlərini “yalançı dördlük” adlandırmışdı.
Prezident Əliyevin müsahibəsindən qısa müddət keçəndən sonra “Washington Post”, “New York Times” barədə çox ilginc xəbərlər yayıldı və Azərbaycan Prezidentinin fikirləri öz təsdiqini tapdı. Onları ABŞ-ın yeni adminisitrasiyası ifşa etdi. ABŞ-da yeni administrasiyanın son açıqlamaları ilə əvvəlki administrasiyaların başqa ölkələrin daxili işlərinə qarışması və bunun üçün media, eləcə də digər vasitələrdən istifadə etməsi açıq şəkildə etiraf olunur. Xüsusilə Bayden administrasiyası dövründə ABŞ-dan külli miqdarda maliyyə alan bu media qurumları konkret ölkələri, şəxsləri hədəfə alıb və onlar barəsində qarayaxma, böhtan kampanisyası aparıblar. ABŞ prezidenti Donald Trampın son açıqlamaları da bunu təsdiqləyir. Tramp ABŞ-ın bəzi media qurumlarının keçmiş prezident Bayden administrasiyasından külli miqdarda pul aldığını deyib və bildirib ki, bu vəsaitlər vergi ödəyicilərinə geri qaytarılmalıdır. Prezident Tramp bildirib ki, “Reuters”, “Politico” və “The New York Times” kimi media qurumları federal qurumlardan maliyyə dəstəyi alır və bu ödənişlər xəbər məzmununa təsir etmək məqsədi daşıyır. Trampın bu sözlərindən bir daha aydın olur ki, dünya ictimai rəyinə təsir edən bəzi media qurumları ABŞ-ın əvvəlki administrasiyaları tərəfindən maliyyələşib və bunun qarşılığında konkret sifarişlər icra edilib. Sözügedən media qurumlarının adlarını da açıqlayan yeni ABŞ administrasiya onlara indiyə kimi ödənən pulları sorğulamağa başlayıb. Amerikalı milyarder İlon Maskın rəhbərlik etdiyi Hökumətin Səmərəliliyi Departamentinin (DOGE) məlumatlarına toxunan Tramp deyib ki, "radikal solçu “Reuters”in "geniş miqyaslı sosial aldatma" araşdırması üçün Müdafiə Nazirliyindən 9 milyon dollar aldığı üzə çıxıb. Tramp media agentliyindən pulları dərhal geri qaytarmağı tələb edib. “Politico”nu da hədəfə alan Tramp, qurumun niyə milyonlarla dollar aldığı barədə sual verib: "DOGE: Politico”ya niyə heç nə etmədiyi üçün milyonlarla dollar ödənib? Mətbuatı satın alırlar? Pulları vergi ödəyicilərinə geri qaytarın". Trampın açıqlamasından görürük ki, “Reuters” ABŞ-ın Müdafiə Nazirliyindən 9 milyon dollar alıb, bu fakt ifşa olunub. Eyni zamanda “Washington Post”, “New York Times” kimi nəşrlər də ABŞ-ın müxtəlif qurumları tərəfindən maliyyələşdirilib. Bu nəşrlər Azərbaycan əleyhinə yazdığına, ölkəmizə qarşı şər-böhtan dolu, qərəzli məqalələr çap etdiklərinə görə Azərbaycan Prezidentinin məruzəsinə düşüblər. Prezident qeyd edirdi ki, o media resursları Azərbaycana qarşı çirkin kampaniya aparıblar. Artıq Tramp da bunu təsdiqlədi ki, onlar ABŞ-ın müəyyən dövlət orqanlarından, Müdafiə Nazirliyindən pul alıblar. Həmin pulu ona görə alıblar ki, müxtəlif təşkilatların sifarişlərini yerinə yetirsinlər, başqa-başqa dövlətlərə böhtan atsınlar.
“Bayden höküməti bütün bu çirkin işləri həyata keçirmək üçün ABŞ-ın dövlət büdcəsinin pulundan istifadə edib”
"Novoye vremya" qəzetinin baş redaktoru Şakir Ağayev baki-xeber.com-a şərhində bildirdi ki, sözügedən nəşrlərin USAİD-dən, eyni zamanda da ABŞ-ın müxtəlif dövlət qurumlarından pul alıb başqa ölkələrə qarşı qərəzli kampaniya apardığını prezident Tramp təsdiqləyib. “Biz bu məsələni qaldıranda, o nəşrlərin Bayden adminstarsiyasından pul alıb başqa-başqa ölkələrlə bağlı şər-böhtan kampaniyası apardığını deyəndə, bunu düzgün başa düşmürdülər. Azərbaycan tərəf bu faktları ortaya qoyanda buna qərəz kimi yanaşırdılar. Prezident İlham Əliyev Washington Post”, “New York Times” kimi nəşrlərin dezinformasiyaya yaymaqla, yalan, saxta xəbərlər tirajlamaqla məşğul olduqlarını, Azərbaycana qarşı qərəzli kampaniya apardıqlarını bəyan edirdi. İndi ABŞ prezidenti özü açıqlayıb ki, bu mətbu orqanlar Amerikanın müxtəlif dövlət qurumlarından maliyyə alıb. Prezident İlham Əliyevin tam reallığı əks etdirən fikirlərini Tramp da təsdiqlədi və ABŞ-ın dövlət qurumlarından maliyyə alıb sifarişlər yerinə yetirən media qurumlarını ifşa etdi. ABŞ-ın keçmiş hökuməti “Reuters” agentliyinə də hər il milyonlarla dollar ayırıb, təkcə Müdafiə Nazirliyinin bu media qurumuna ayırdığı vəsait 9 milyon dollardır. ABŞ-ın dövlət qurumlarından maliyə alan “Reuters”, “Washington Post”, “New York Times”, “Amerikanın səsi” və başqa media qurumları o pullar müqabilində verilən sifarişləri icra ediblər, Azərbaycana və başqa ölkələrə qarşı qərəzli kampaniya aparıblar. Bu mətbuat resurslarının sifarişlə yazı yazdıqlarını, qərəzli mövqe tutduqlarını, dezinformasiya ilə məşğul olduqlarını ABŞ prezidenti özü bəyan edir”. Bu media qurumlarının Azərbaycanla bağlı yazdıqları yazıların hamısının qərəzli olduğunu deyən Ş.Ağayev qeyd etdi ki, bütün bunlar sifarişlə edilib, kimlərinsə tapşırıqları yerinə yetirilib. “Bu yazılar Azərbaycanın mövqeyinə, haqq işinə, beynəlxalq aləmdəki nüfuzuna zərbə vurmaq üçün yazılıb. Təbii, bütün bu proseslər də, göstərdi, Tramp da sübut etdi ki, Bayden hökuməti başqa dövlətlərə qarşı qərzəli olub, ancaq öz şəxsi maraqlarını güdüblər. Tramp bu məsələləri ifşa edib göstərdi ki, keçmiş administrasiya öz şəxsi maraqlarını demokratiyadan da, insan haqqlarından da, hətta Amerikanın dövlət maraqlarından da üstün tutublar. Bayden administrasiyası öz maraqlarını təmin etmək üçün bu media resurslarından bir alət kimi istifadə edib, “demokratiya”, “insan hüquqularının qorunması” adı altında çirkin işlər görüblər, fərqli dövlətlərin daxilində qarşıqlıq yaratmaq istəyiblər. Bütün bunlar bu məqsədə qulluq edib. Bayden höküməti bütün bu çirkin işləri həyata keçirmək üçün ABŞ-ın dövlət büdcəsinin pulundan istifadə edib”-deyə Ş.Ağayev qeyd etdi. Ş.Ağayev bildirdi ki, Tramp hökumətinin o media resurslarından dövlət qurumlarının ayırdığı və onlara verdiyi vəsaitlərin geri qaytarılmasını tələb etməsi də düzgün yanaşmadır, çünki o pullar qərəzli kampaniyalara, müxtəlif ölkələrin daxilini qarışdırmaq məsələlərinə, ayrı-ayrı dövlətlər barədə beynəlxalq aləmdə mənfi imic yaradılmasına xərclənib. İradə SARIYEVA
