Rusiya Tartusdakı hərbi bazasını Afrikaya köçürür – Sudanla razılıq əldə edildi...
Sudan və Rusiya Qırmızı dəniz sahilində hərbi-dəniz bazası yaratmaq barədə razılığa gəli. Rusiya Sudanda bazanı Tartusdakı hərbi dəniz bazasına alternativ obyekt kimi qurmağı planlaşdırır.
Moskvanın regionda hərbi mövcudluğunu genişləndirmək səylərini nəzərə alındıqda, saziş Rusiya üçün nadir diplomatik uğur hesab edilir. Sudanın xarici işlər naziri Əli əl-Şərif Moskvadan verdiyi açıqlamada tərəflərin bazanın yaradılması ilə bağlı tam razılığa gəldiyini təsdiqləyib.
Hələlik Kremldən razılaşma ilə bağlı rəsmi açıqlama verilməsə də, Sudandakı hərbi obyektin Rusiya üçün Tartusdakı hərbi dəniz bazasına alternativ ola biləcəyi bildirilir.
Rusiyanın Sudanda baza yaratması barədə danışıqlar Sudanın keçmiş prezidenti Ömər əl-Bəşirin 2017-ci ildə Moskvaya səfər edərək dəstək istəməsindən sonra başlayıb.
Razılaşma Sudan Silahlı Qüvvələrinin döyüş meydanında qazandığı qələbələrdən sonra əldə olunub. Hazırda ordu və müttəfiq silahlı birləşmələrin, paytaxtın şimal ətrafını ələ keçirdikdən sonra Xartuma son hücuma hazırlaşdıqları bildirilir.
Dekabrda Bəşər Əsəd rejiminin devrilməsi və ardından Rusiyaya qaçmasından sonra Moskvanın Sudanda dəniz bazası yaratmaq istəyinin artdığı bildirilir. Əvvəllər Rusiya Yaxın Şərq və Afrikadakı əməliyyatlarında Suriyadakı Hmeymim və Tartus hərbi dəniz bazasından logistik mərkəz kimi istifadə edirdi. Suriyanın yeni hökuməti Rusiyaya ölkədəki bazalarını saxlamağa icazə verib-verməyəcəyini açıqlamayıb, lakin vəziyyətlə tanış olan mənbələr, Şamın Moskvadan Əsədin təhvil verilməsini tələb etdiyini bildirir.
Onu da qeyd edək ki, yeni Suriya hökuməti Tartus limanı ilə bağlı Əsəd rejiminin imzaladığı sazişi ləğv edib. Bundan sonra Rusiya Tartus dəniz bazasından hərbi texnikanı çıxarmağa başlayıb. Artıq Sudanla da razılıq əldə edildiyinə görə çox ehtimal ki, Tartusda çıxarılan hərbi texnika Sudana daşınacaq.
TAHİR
