Ermənistanın “Joqovurd” qəzeti yazır: Parlamentdəki “Mülki müqavilə” fraksiyası yüksək tribunadan müvafiq qanunun qəbulundan sonra Ermənistanın Avropa İttifaqına üzv olacağına dair cingiltili ifadələr işlətsə də, Aİ özü faktiki olaraq Ermənistana məhəl qoymur.
Fevralın 12-də Ermənistan parlamenti “Ermənistanın Avropa İttifaqına daxil olması prosesinin başlanması haqqında” qanun layihəsini 63 “lehinə” və 7 “əleyhinə” təmtəraqla qəbul edib. Bu qanun layihəsini parlamentdənkənar qüvvələr təqdim edib. Parlament bunu “ümid şüası” kimi təqdim edərək, cəmiyyəti Avropanın qapılarının tezliklə bizim üzümüzə vizasız açılacağına inandırsa da, reallıq budur ki, bu, sadəcə olaraq prosesin başlanmasına dair razılaşmadır – başqa heç nə. Və Ermənistanın Aİ-yə üzvlük perspektivi qeyri-real olmasa da, hələ də qeyri-müəyyəndir. “Joqovurd” qəzeti qeyd edir ki, qanun layihəsinin qəbulundan iki gün keçməsinə baxmayaraq, Aİ-dən səhradakı səs kimi susqunluq hökm sürür. Dünənki iş gününün sonunadək nə Avropa Komissiyası, nə də Avropa Parlamenti heç bir institusional cavab vermədi. Aİ-nin “arzu olunan” qanununun qəbulundan 48 saat sonra belə heç bir struktur Ermənistanı təbrik etmədi, təşəbbüsü müsbət qarşılamadı, Ermənistan Respublikasının Avropaya doğru hərəkət etmək niyyətinə cavab vermədi. Belə çıxır ki, bu, Paşinyanın seçkilər öncəsi, cəmiyyətin avropapərəst hissəsinə hesablanmış növbəti blefdir və ya sadəcə olaraq, Aİ-nin “böyük ailəsi” üzvləri arasında belə cavab tapmayan növbəti populist hərəkətidir.
Surxay ƏLİYEV
