Mətləb Salahov: “USAİD-in Ukrayna mediası adı altında ayırdığı pullar ABŞ-ın müharibəki dezinformasiya siyasətinə xərclənib”
ABŞ-ın Beynəlxalq İnkişaf Agentliyinin (USAİD) ayrı-ayrı ölkələrin daxili işlərinə qarışdığı, media resurslarını ələ aldığı məlumdur. Hətta dünyanın nüfuzlu media orqanlarını belə USAİD pulla almağı bacarıb, onlar vasitəsilə ayrı-ayrı dövlətlərin daxilinə nüfuz etməyə çalışıb, bəzi ölkələrdə istəyinə nail olub da.
USAİD-in Ukrayna mediasına dərindən sızması, bu ölkənin mətbuatını ələ alması faktı diqqət çəkir. Məlumatlara görə, Ukraynada medianın 90 faizi USAİD-dən maliyyə alıb. 2024-cü ildə Ukraynada mediaya 6 milyard dollar pul xərclənib. Ukrayna mediasının bu cür maliyyələşdirilməsi müharibənin taleyinə necə təsir göstərib?
“Bu cinayətkar təşkilat bir sıra ölkələrdəki çevrilişlərin əsas “kassiri” kimi də ad çıxarıb”
Jurnalist-ekspert Mətləb Salahov “Bakı-Xəbər”ə bildirdi ki, “USAİD onilliklər boyu əslində digər ölkələr üçün fəlakət, daxili xaos yaratmaq, ölkələrin milli dəyərlərinin məhv edilməsi üçün ABŞ-ın əlində mühüm alət funskiyası daşıyıb. “Şantaj, milyon dollarlarla qrant “yardımları”, dezinformasiya müharibəsi bu təşkilatın əsas hədəf siyasəti olub. Üstəlik, bu cinayətkar təşkilat beynəlxalq çevrilişlərin əsas “kassiri” kimi də ad çıxarıb. “Demokratiya” adı altında hədəf ölkələrdə milli dəyərlərin məhv edilməsi, yeniyetmə və gənclərin təxribat əməllərinə alət edilməsi üçün bu təşkilatın əli ilə milyonlarla dollar sərf edilib. Dünyanın müxtəlif yerlərində “vətəndaş cəmiyyətinin inkişafı” adı altında QHT-ləri, media orqanlarını, aktivistləri və ABŞ elitasının maraqlarına xidmət edən strukturları maliyyələşdirirdi. USAİD Ukraynada da mühüm “izlər” qoyub. Keçmiş ABŞ prezidenti Co Baydenin qanlı “əsəri” kimi tarixə düşən Ukrayna müharibəsi üçün USAİD maliyyə və dezinformasiya “yardımını” heç zaman əsirgəməyib. Əlbəttə ki, Ağ Evin tapşırığı ilə. Ukraynaya ayrılan və 90 faiz media strukturunun “bəhrələndiyi” deyilən 6 milyard dollar fantastik rəqəmdir və təyinatı üzrə xərclənməsinin özü ciddi şübhə doğurur.
Diqqət edin, şəhər və kəndləri, bütün infrastrukturları dağıdılmış bir ölkənin kağız üzərində olan mediası üçün nə az nə çox, yüz milyon dollarlar ayrılır. Bu, məntiq və reallıq üçün ağlasığmaz rəqəmdir”.
M.Salahovun sözlərinə görə, əlbəttə, gün kimi aydındır ki, bu ayrılan vəsait Ukrayna mediasının inkişafı, onun ayaqda qalması üçün deyil, ABŞ-ın minlərlə ukraynalının həyatına son qoyan müharibə siyasətinə xərclənib: “Bu vəsaitdən hansısa Ukrayna mediasının cəmi 2 milyon dollar xeyir gördüyünə inanmaq özü mümkünsüzdür, o ki qalsın, elan edilən fantastik 6 milyard dollardan bəhrələnmələri.
Açıq-aşkar görünür ki, USAİD Ukraynadakı müharibə barədə dezinformasiya siyasəti üçün “kisənin ağzını” gen-bol açaraq Ukrayna cəmiyyətinin yanlış istiqamətə yönləndirilməsi işi ilə məşğul olub. Xüsusilə dünyanın aparıcı KİV-lərində Ukrayna böhranının ABŞ-ın maraqları prizmasından işıqlandırılmasına da koordinator kimi USAİD məsul olub. Ən əsas da Ukrayna cəmiyyətinin həqiqətlər əvəzinə yalanlarla məlumatlandırılması və istiqamətlənməsi, daha çox ictimai rəydə tək xilas yolunun Qərbə inteqrasiya olduğuna dair təsəvvürün yaradılması üçün sosial şəbəkə seqmentində də USAİD-in informasiya təxribat qrupları iş başında olub. “Humanitar yardım” adı ilə ayrılan bu fantastik pullar həm də, Donald Trampın da dediyi kimi, irimiqyaslı korrupsiya yolu ilə mənimsənilib. Görünür, USAİD təxribat və çevrilişlərlə yanaşı irimiqyaslı pulların “yuyulması” işində də “ustalıq” göstərib”.
İradə SARIYEVA
