Vüqar Bayramov: “Çox təəssüf ki, bir sıra beynəlxalq qurumlar tərəfindən qərəzli şəkildə hesabatlar yayımlanır”
“Transparency İnternational” təşkilatı 2024-cü il üçün Korrupsiya Qavrama İndeksinin yeni reytinqini dərc edib. Təşkilatın açıqladığı hesabatda Danimarka 100 baldan 90, Finlandiya 88, Sinqapur 84 bal toplayaraq reytinq cədvəlinə rəhbərlik edirlər.
Bununla yanaşı, region ölkələri arasında ən yaxşı yerləri Gürcüstan (53 xal, 53-cü yer), Ermənistan (47 bal, 63-cü yer) tutub. Rusiya və Azərbaycan (hər biri 22 xal, 154-cü yer), Özbəkistan 32 balla 121-ci, Qazaxıstan isə 40 balla 80-cidir. Reytinq cədvəlinin autsayderləri Cənubi Sudan (8), Somali (9) və Venesueladır.
Azərbaycan 100 baldan 22 bal toplayaraq 180 ölkə arasında 154-cü yeri tutub. Onu da qeyd edək ki, əvvəlki illərdəki hesabatları ilə müqayisədə Azərbaycanın mövqeyi son illərdə kəskin pisləşib.
Açıqlanan hesabatdan açıq şəkildə bəlli olur ki, bu qərəzli şəkildə hazırlanıb.
“Fərqli beynəlxalq qurumların qərəzli hesabatına rəğmən Azərbaycan korrupsiyaya qarşı mübarizəni gücləndirir”
Millət vəkili Vüqar Bayramov “Bakı-Xəbər”ə şərhində bildirdi ki, son illər Azərbaycanda korrupsiyaya qarşı mübarizə güclənib. Elektron xidmətlərdən də daha fəal şəkildə istifadə olunur. Bu da vətəndaş-məmur ünsiyyətinin azalmasına səbəb olur: “Azərbaycan regionda elektron xidmətlərdən ən çox istifadə edən ölkələrdən biridir. Bu da korrupsiya səviyyəsinin minimallaşdırmasına gətirib çıxarır. Onu da deyim ki, bu sahə üzrə qanunvericilik təkmilləşir. Bütün bunlar ondan xəbər verir ki, bu istiqamət üzrə sistemli fəaliyyət həyata keçirilir. Çox təəssüf ki, bir sıra beynəlxalq qurumlar tərəfindən qərəzli şəkildə hesabatlar yayımlanır. Həmin hesabatlarda bu istiqamətdə aparılan işlər əks olunmur. Əksinə, qərəzli məlumatlar, hesabatlar yayırlar”.
Millət vəkilinin sözlərinə görə, fərqli beynəlxalq qurumların qərəzli hesabatına rəğmən, Azərbaycan korrupsiyaya qarşı mübarizəni gücləndirir. Qeyd edilən istiqamət üzrə davamlı fəaliyyəti müşahidə edəcəyik.
Günel CƏLİLOVA
