Azər Həsrət: "Təkidlə deyirdik ki, USAİD siyasi kampaniyaçılığı maliyyələşdirir, üstəlik də bu qurum korrupsiyaya bulaşıb"
Özünü dünya ölkələrində demokratiyanın formalaşmasına, sosial-iqtisadi inkişafa dəstək göstərən təşkilat kimi qələmə verən ABŞ Beynəlxalq İnkişaf Agentliyi (USAİD) əslində sözdə bu işlərlə məşğul olub.
Donald Tramp hakimiyyətə gələndən dərhal sonra USAİD-lə bağlı araşdırmalar başlatdı və bu təşkilatda aparılan araşdırmalar zamanı ifşaedici faktlar ortaya çıxdı.
Məlum oldu ki, USAİD-in dünyanın bir sıra nüfuzlu medialarını maliyyələşdirib. Məsələn, 2024-cü ildə "The New York Times”a 3,1 mln.dollar, “Politico”ya 8 mln. dollar, “Associated Press”ə 19 mln.dollar, BBC -yə 2,6 mln.funt sterlinq," Reuters"ə 9 mln.dollar, "Frans-Press"ə 447 min dollar vəsait verib. Yəni bu nüfuzlu media orqanlarına pul verib.
Məlumata görə, USAİD ümumilikdə 700-dən artıq media orqanını, 300-ə yaxın media sahəsində çalışan QHT-ni və 6 mindən çox jurnalisti maliyyələşdirilib. Onu da qeyd edək ki, fevralın 6-dan ABŞ hökuməti bu təşkilat vasitəsilə “The New York Times”, “Politico” və “Associated Press”in maliyyələşdirilməsini dayandırıb.
Qlobal mediaya bu qədər vəsaitin ayrılması təsadüfi olmayıb. Biz son illər bu nəşrlərdə Azərbaycana qarşı çox ittihamçı, qərəzli yazılar görmüşük.
Bu ayrılan maliyyənin həmin yazılarla nə kimi əlaqələri var?
"Tramp eyni zamanda USAİD-in Böyük Britaniyanın BBC mediasını maliyyələşdirdiyini və bu maliyyədən siyasi kampaniyaçılıq üçün istifadə etdiyini deyir"
Siyasi şərhçi Azər Həsrət "Bakı-Xəbər"ə USAİD-in belə yardımları haqda biz məlumatlı idik və vaxtında da həyəcan təbili çalırdıq. Əslinə qalanda, biz illərdir bununla bağlı danışırıq. Deyirik ki, USAİD və bənzər təşkilatlar, məsələn, NET, SOROS şəbəkələri qrant adı altında verdikləri pullarla başqa-başqa dövlətlərin daxili işlərinə müdaxilə etməyə çalışır, siyasi kampaniyaçılıqla məşğul olur, ümumiyyətlə, dəxli olmayan məsələlərlə dövlətlərin və onların rəhbərlərinin üstünə gedərək qarışıqlıq yaratmaq istəyir. USAİD-lə bağlı da bu fikirləri biz davamlı şəkildə səsləndirmişik. İndi bu hadisələr üzə çıxanda xatırlayıram ki, bizim o fikirlərimizi top-tüfənglə qarşılayan adamlar var idi"-deyə bildirdi.
A.Həsrətin sözlərinə görə, həm Azərbaycanın daxilində, həm də ABŞ-da bu fikirləri rişxəndlə, gülərək, lağ-lağı ilə qarşılayırdılar. "Həm Azərbaycandakı, həm də xaricdəki bir sıra beynəlxalq qurumlar bizi aşağılamaq üçün kampaniyalar aparırdılar ki, USAİD elə bir təşkilatdır, orda hər şey şəffafdır, hər şey mükəmməldir, onlar qeyri-qanuni, sıradışı heç nə etməzlər. Biz isə təkidlə deyirdik ki, USAİD siyasi kampaniyaçılığı maliyyələşdirir, üstəlik də bu qurum korrupsiyaya bulaşıb. Özəlliklə də bu özünü ona Samanta Pauerin başçılıq etdiyi dövrdə daha qabarıq şəkildə göstərməyə başladı. Pauer USAİD-in rəhbəri olduğu halda gəlib Ermənistanda tərəf tutdu, ermənilərdən yana oldu. Bunu açıq şəkildə bəyan etdi, bütün dünyaya göstərdi. Onda da biz tənqid edirdik, yenə də bizi top-tüfənglə qarşılayırdılar. Artıq divar qurtarıb, bundan o tərəfi yoxdur. ABŞ prezidenti USAİD-in korrupsiyaya bulaşdığını deyir. Bu təşkilat bir çox qlobal media qurumlarını maliyyələşdirib, onların adları məlumdur. Tramp eyni zamanda USAİD-in Böyük Britaniyanın BBC mediasını maliyyələşdirdiyini və bu maliyyədən siyasi kampaniyaçılıq üçün istifadə etdiyini deyir. Bunu ABŞ-ın prezidenti bildirir. Eyni zamanda Donald Tramp deyir ki, USAİD korrupsiya bulaşmış təşkilatdır.
Mən düşünürəm ki, bizi bu cür fikirlərimizə görə tənqid və təhqir edənlər indi izahat verməyə borcludurlar. Artıq ABŞ ən yüksək səviyyədə bunu deyirsə, təbiidir ki, bizə bir üzrxahlıq borcu olan xeyli sayda adam var. Buyursunlar, meydana çıxsınlar və üzrxahlıq etsinlər. O üzrxahlığı qəbul edib-etməmək sonrakı işdir.
Dediyim kimi, bu qurum həm korrupsiyaya bulaşıb, həm də ümumiyyətlə dünyanı çalxalamaq üçün pis-pis əməllər ediblər. Hələ bu USAİD-in koronavirusun "kəşf edilməsinə" maliyyə ayırdığı deyilir, artıq bununla bağlı da araşdırma gedir. Bundan savayı, USAİD-in "mütəşəkkil cinayətkarlıq və korrupsiyaya dair araşdırma" layihəsi adı altında 19 ildir fəaliyyət göstərən qurumun maliyyə təminatını həyata keçirdiyi haqqında rəsmi məlumatlar var. Həmin məlumatlara görə, o layihənin maliyyəsinin böyük bir hissəsini bugünə kimi USAİD verib. Yəni görürsüzmü, bunlar nə işlərlə məşğuldurlar. Üstəlik də, onun rəhbəri, hazırda vəzifədən uzaqlaşdırılmış Samanta Pauer illik 180 min ABŞ dolları maaş aldığı halda bəlli olub ki, USAİD-ə başçılıq etdiyi dövrdə 23 milyon dollarlıq varidata sahiblənib. Hardan, hansı pullar hesabına? Eyni zamanda onu da araşdırmaq lazımdır ki, Azərbaycanda bu qurum hansı media təşkilatlarını da maliyyələşdirib, maliyyələşməni hansı şəkildə həyata keçirib. Məncə, çox şeylər üzə çıxacaq" - deyə A.Həsrət bildirdi.
İradə SARIYEVA
