Təbriz Musayev: “Bu baxımdan ən uğursuz dövlət başçısı Makron hesab oluna bilər”
“İctimaiyyətin dəstəyini əldə etmək istəyən liderlərə məsləhətim o olardı ki, həmişə həqiqəti desinlər”. Bu barədə Prezident İlham Əliyev Çinin CGTN telekanalına müsahibəsində bildirib.
Ölkə başçısının sözlərinə görə, iyirmi ildən artıq müddət ərzində həmişə Azərbaycan xalqına həqiqəti söyləyib: “Bu həqiqətin müsbət və ya mənfi olmasından asılı olmayaraq. Həmişə xalqıma biz ədaləti bərpa edəcəyik söyləmişəm və xalqım da mənə inanıb. 17 il hakimiyyətdə olandan sonra biz, nəhayət, vəd etdiklərimizi yerinə yetirdik və suverenliyimizi, ərazi bütövlüyünü və ləyaqətimizi bərpa etdik. Beləliklə, ictimaiyyətin dəstəyini əldə etmək istəyən liderlərə məsləhətim o olardı ki, həmişə həqiqəti söyləyin və beynəlxalq təzyiqdən, beynəlxalq mediadan asılı olmayaraq, haqqınızda nə dediklərindən, sizi necə adlandırdıqlarından, sizi necə təhqir etmələrindən asılı olmayaraq, ölkəniz üçün doğru olanı edin. Beləliklə, siz özünüz və ölkəniz uğur qazanmış olacaqsınız”.
Bütün bu deyilənlərin fonunda öz xalqı ilə səmimi və düzgün danışmayan liderlər kimdir və onların hazırkı və sonrakı taleləri necə oldu?
“Populizm Kanadanın baş naziri Castin Trüdonun da siyasi karyerasına son qoyub”
Sözügedən məsələni “Bakı-Xəbər”ə şərh edən İrəvan Azadlıq Təşkilatının sədri Təbriz Musayev hesab edir ki, bir sıra liderlər var ki, öz xalqı ilə səmimi danışmır: “Əvvəla, Prezident İlham Əliyevin arqumentləri kifayət qədər əsaslı və tutarlı faktlara söykənir. Həqiqətən də bir sıra liderlərin populist, reallığa söykənməyən mövqedən çıxış etməsi cəmiyyətlərdə onlara olan inamı sarsıdıb. Lider öz xalqına nəyisə vəd verəndə bunu əsaslandırmalıdır və bunun arxasında durmalıdır. Ancaq biz görürük ki, bu heç də belə deyil. Belə uğursuz dövlət başçılarının başında Fransa prezidenti Emmanuel Makron gəlir. Bu baxımdan ən uğursuz dövlət başçısı Makron hesab oluna bilər. Məsələ ondadır ki, Makronun aşırı populistliyi, ermənipərəst mövqedən çıxış etməsi, Parisin xarici siyasət kursunu tez-tez dəyişməsi Fransanın beynəlxalq imicini faktiki olaraq yerləbir edib. Bunun nəticəsidir ki, Fransa nə Rusiya-Ukrayna müharibəsinin tənzimlənməsində, nə Yaxın Şərq məsələsində, nə də digər qlobal xarakterli məsələlərdə yoxdur. Fransa demək olar bütün Afrika ölkələrindən qovulub. Ada dövlətlərində Fransaya qarşı qalxıb. Fransada əhalinin sosial vəziyyəti pisləşib, işsizlik artır, inflyasiya yüksəlir. Bənzər populizm Kanadanın baş naziri və Liberal Partiyanın lideri Castin Trüdonun da siyasi karyerasına son qoyub. Tramp bəyan edəndən sonra ki, Kanada ABŞ-ın 51-ci ştatı olacaq, bu, Trüdonun istefa verməsi ilə nəticələndi. Trüdo da Makron kimi Kanadanın dövlət maraqlarını erməni lobbisinə qurban verdi. Ermənistan baş naziri Nikol Paşinyandan isə danışmağa dəyməz. ABŞ seçkilərində onun Baydeni dəstəkləməsi Nikolun nə qədər dayaz siyasətçi olduğunu bir daha ortaya qoydu”.
Vidadi ORDAHALLI
