İlyas Hüseynov: “Bu soyuq münasibətlərin əsas səbəbkarı elə Bayden və ətrafındakı komanda olub”
Prezident İlham Əliyev Çinin CGTN telekanalına müsahibəsində ABŞ-Azərbaycan əlaqələrinə də toxunub, bildirib ki, Bayden administrasiyası dövründə Azərbaycana qarşı ədalətsiz mövqe göstərilib.
Azərbaycan Prezidenti bildirib: “Biz Prezident Trampın ABŞ-a rəhbərlik etdiyi zamanı xatırlayırıq və son 4 ildə Bayden administrasiyasının Azərbaycana ədalətsiz yanaşması səbəbindən əlaqələrimizin tamamilə korlanmasından fərqli olaraq, bizim əlaqələrimiz çox uğurla inkişaf edirdi”.
Prezident Trampla birgə işləməklə bağlı əvvəlki təcrübəmizin çox müsbət olduğunu vurğulayan ölkə başçısı qeyd edib: “Biz gözləyirik ki, ABŞ-Azərbaycan münasibətlərində itirilmiş illər hesab etdiyimiz bu 4 il artıq tarixə qovuşacaq və biz yenidən başlayacağıq”.
Azərbaycan Prezidenti 4 ili niyə itirilmiş illər saydı?
“ABŞ Konqresindən də ölkəmiz əleyhinə ermənipərəst şəxslərin çağırışları, müraciətləri eşidilirdi”
Politoloq İlyas Hüseynov “Bakı-Xəbər”ə şərhində bildirdi ki, Prezident İlham Əliyev Çinin mühüm media resursuna müsabəsində bir sıra önəmli məqamlara toxunub. “O cümlədən də ABŞ-Azərbaycan münasibətlərinə dair fikirlərini bölüşüb. Şübhəsiz ki, Bayden administrasiyası dönəmində Azərbaycan və ABŞ arasında soyuq münasibətlər vardı. Bu soyuq münasibətlərin əsas səbəbkarı elə Bayden və ətrafındakı komanda olub. Eyni zamanda ABŞ Konqresindən də ölkəmiz əleyhinə ermənipərəst şəxslərin çağırışları, müraciətləri eşidilirdi və bu, Azərbaycanla Amerika arasındakı strateji münasibətlərə də mənfi təsir göstərirdi”-deyə İ.Hüseynov bildirdi.
Hazırda Tramp hakimiyyəti dövründə çox yaxşı münasibətlər formalaşdırmaq üçün imkanlar olduğunu deyən İ.Hüseynov vurğuladı ki, burda potensial çox genişdir. İ.Hüseynovun fikrincə, Prezident İlham Əliyev bu potensialdan maksimum dərəcədə istifadə etməyi nəzərdən keçirir və bu da bizim maraqlarımıza uyğundur: “Çünki Azərbaycan
regionda önəmli geosiyasi aktordur. Eyni zamanda cənab Prezident müsahibəsində Azərbaycanın xarici siyasətilə bağlı Şərqlə Qərb arasında mühüm rola malik olduğumuzu önə çəkərək dəyərli fikirlər söyləyib. Biz bu regionda ən aparıcı geosiyasi ölkəyə çevrilmişik, ərazilərimizi işğaldan azad edib suverenliyimizi bərqərar etmişik. Vətən müharibəsindən sonra bizə münasibət tamamilə dəyişib. Bütün bu reallıqları - Azərbaycanın bölgədəki təhlükəsizliyə, sülhə, sabitliyə verdiyi töhfəni ABŞ-ın yeni rəhbərliyi qəbul etməlidir, bununla hesablaşmalıdır və Azərbaycanla strateji münasibətlərə cəhd etməlidir. Azərbaycanın Avropa İttifaqı müstəvisində 10-a yaxın dövlətlə strateji münasibətləri vardır, enerji təhlükəsizliyi müstəvisində çox mühüm rol oynayırıq, eyni zamanda beynəlxalq təhlükəsizliyin qorunması üçün də Azərbaycan mühüm təşəbbüslərlə çıxış edir. Sadaladığım bu faktlar hazırkı geosiyasi mənzərədə Bakı ilə Vaşinqton arasında çox uzlaşdırıcı koordinasiya elementlərini də əmələ gətirir. Burda hər iki tərəf maraqlı olmalıdır ki, əməkdaşlıq daha da dərinləşsin”.
İradə SARIYEVA
