Akif Nağı: “Vensin Paşinyanı təklikdə qəbul etməməsi ABŞ-ın yeni administrasiyasının Ermənistana və Paşinyana olan münasibətinin göstəricisidir”
Ermənistanın baş naziri Nikol Paşinyan bu günlərdə ABŞ-a səfər edib və ABŞ-ın vitse-prezidenti Ceyms Devid Venslə görüşüb. Paşinyan Milli Assambleyada keçirilən hökumət saatında bildirib ki, əvvəlcədən Ağ Evdə heç bir görüş nəzərdə tutulmayıb, ABŞ vitse-prezidenti ilə görüş onun ABŞ-a səfərinin son günündə baş tutub.
Paşinyan deyib ki, bir fikir yaranıb və görüş planlaşdırılmamış şəkildə təşkil olunub. “Görüş kifayət qədər uzun çəkdi. 1+3 formatında, yəni üzbəüz deyildi. İclasda nümayəndə heyətinin üzvləri iştirak ediblər. Biz tərəfdən ABŞ-dakı səfirimiz, hökumət aparatının xarici əlaqələr şöbəsinin müdiri və mənim mətbuat katibim iştirak edirdi” - deyə Paşinyan bildirib.
“Ermənistanla ABŞ arasında bu yaxınlarda imzalanmış strateji tərəfdaşlıq sazişi ABŞ-ın yeni administrasiyasının yanaşmaları nəticəsində həyata keçirilməyəcəkmi” sualına cavabında Paşinyan “Bu, keçid dövründə imzalanıb. Və bu müddətdə keçid komandaları formalaşır. Əvvəlki administrasiya bu sənədin imzalanmasında yeni administrasiya ilə eyni dərəcədə iştirak edib”-deyib.
Paşinyan özü deyib ki, ABŞ-ın vitse-prezidenti ilə görüş planlaşdırılmış görüş olub. Baş nazir qeyd edib ki, əvvəldən heç kimlə görüşmək planı yox idi, sadəcə belə bir ideya gündəmə gəlib və son gündə vitse-prezidentlə görüşüb.
Paşinyan özü təsdiqləyir ki, yalnız və yalnız vitse-prezident Ceyms Devid Venslə görüşə bilib.
Halbuki, Paşinyanın ABŞ rəhbərliyində təmsil olunan şəxslərlə görüş planlaşdırmadığı yalandır, şübhəsiz, ABŞ-a gedəndə planlaşdırmışdı ki, Trampdan aşağıda dayanan hər kəslə görüşsün, amma görüşmək alınmayıb. Bunu da ört-basdır etmək üçün yalan bəyanat verib.
Burda ən diqqət çəkən məqam isə ondan ibarətdir ki, Vens Paşinyanı təklikdə qəbul etməyib. Paşinyan da bildirib ki, görüşdə onunla bərabər mətbuat katibi, hökumət aparatının xarici əlaqələr şöbəsinin müdiri və Ermənistanın ABŞ-dakı səfiri də iştirak edib.
Faktiki olaraq, Vens Paşinyanı təklikdə qəbul etmək istəməyib. ABŞ-ın vitse-prezidentinin Paşinyanı təklikdə qəbul etməməsi dünyaya bir mesajdır ki, mənim bununla xüsusi bir söhbətim yoxdur, bu adam bizim üçün maraqlı deyil.
Eyni zamanda Paşinyana sual verilib ki, Bayden dövründə imzalanmış strateji tərəfdaşlıq sazişini yeni hökumət icra edəcək, yaxud etməyəcək? Paşinyan buna anlaşılmaz bir cavab verib və deyib ki, o saziş keçid dövründə imzalanıb, onun imzalanmasında köhnə komanda nə qədər iştirak edibsə yeni komanda da bir o qədər iştirak edib. Yəni suala qeyri-müəyyən bir cavab verib.
ABŞ-nın vitse-prezidentinin Paşinyanı təklikdə qəbul etməməsinin mənası nədən ibarətdir?
“Təkbətək görüş olsaydı Paşinyan həqiqətə uyğun olmayan fikirlər səsləndirə, ağzına gələni danışa, guya Vensin ona hansısa vədlər verdiyini açıqlaya bilərdi”
Azad Vətən Partiyasının sədri Akif Nağı “Bakı-Xəbər”ə şərhində bildirdi ki, Paşinyanın ABŞ-a səfəri o qədər də ciddi olmayan bir dini mərasimlə bağlı idi. “Ancaq Paşinyan çalışırdı ki, hansısa ad altında ABŞ-a getsin, Vaşinqtonda yeni hökumətin rəhbərliyində təmsil olunan şəxslərlə görüşsün. ABŞ-ın yeni rəhbərliyi ilə görüşmək üçün cəhdlər edirdi, onlara çıxışı olan şəxslərlə, özünə yaxın olan erməni lobbisi kəsimi ilə görüşüb onlar vasitəsilə istəyini həyata keçirmək niyyəti güdürdü. Bilirsiz ki, erməni lobbisi də bütövlükdə Paşinyanı qəbul etmir, burda da ziddiyyət var. Paşinyanla kilsə arasındakı ziddiyyət erməni diasporu və lobbi təşkilatları ilə münasibətlərinə də təsir göstərir. Bəhanə axtarırdı ki, imkan olarsa yeni adminstrasiyanın nümayəndələri ilə görüşsün. Əsas işi də ondan ibarət idi ki, köhnə administrasiyanın xətti, mövqeyi davam etdirilsin. Amma görürsüz ki, Tramp qəti şəkildə köhnə administarsiyanın heç bir istiqamətdə siyasətini davam etdirmir. Yəni istər Ukrayna, istər Yaxın Şərq, istər İran, istər Cənubi Qafqaz, istərsə də qonşuları, Amerika qitəsi ilə bağlı tamamilə fərqli siyasət ortaya qoyur. O cümlədən də Cənubi Qafqazla, Ermənistanla bağlı hər hansı bir müsbət addım atmaq niyyəti yoxdur, daha doğrusu, Co Baydenin siyasətini davam etdirmək fikrində deyil. Ona görə də Paşinyan bilirdi ki, Tramp administrasiyasının mövqeyi elə də müsbət deyil. Birincisi, bəhanə tapıb ABŞ-a səfər etdi, orda da növbəti dəfə mənasız açıqlamaları təkrar etdi. Paşinyan əvvəlcədən bunu planlaşdırıb. Paşinyan açıqlamasında ənənəvi yalançılığını və ikiüzlülüyünü göstərərək deyib ki, guya bu görüş təsadüfi alınıb. ABŞ-da olanda onun işi ondan ibarət olub ki, müxtəlif yollarla, vasitələrlə Tramp administarsiyasından kiminləsə görüşsün. Görüş də vitse-prezident səviyyəsində alınıb. Orda da ortada elə ciddi bir məsələ yoxdur, ona ən azı bir vəd də verilməyib. Vensin Paşinyanı təklikdə qəbul etməməsi ABŞ-ın yeni administrasiyasının Ermənistana və Paşinyana olan münasibətinin göstəricisidir. Yəni yeni adminstarsiya üçün maraqlı deyil. Həm də gizli bir məsələ yoxdur ki, ona görə Paşinyanla təkbətək görüşsün. Digər tərəfdən də, erməni xislətini, erməni məkrini Amerikada da başa düşürlər ki, təkbətək görüş olsaydı Paşinyan həqiqətə uyğun olmayan fikirlər səsləndirə, ağzına gələni danışa, guya Vensin ona hansısa vədlər verdiyini açıqlaya bilərdi, Vens də, Tramp administrasiyası da fakt qarşısında qalardı”.
A.Nağının sözlərinə görə, ABŞ administrasiyası bir tərəfdən təkzib etmək, digər tərəfdən də təkzib etməmək problemi ilə üzləşə bilərdi. A.Nağının fikrincə, bu səbəbdən də, ABŞ-ın vitse-prezidenti şahidlərin iştirakı ilə görüşdü ki, Paşinyan görüşdən çıxandan sonra gedib ağzına gələni danışmasın. “Məsələnin bu tərəfi də var. Bu, elə də yüksək dəyərləndirilməyən bir görüşdür, bu görüş, təbii ki, Tramp administrasiyasının Ermənistana mövqeyini dəyişməyəcək. Onların Ermənistanda hansısa bir iş qurmaq, ona dəstək vermək fikirləri yoxdur, əksinə, hadisələr aydın şəkildə göstərir ki, Tramp administrasiyası daha çox Azərbaycan və Türkiyə ilə əməkdaşlığa əhəmiyyət verir”-deyə A.Nağı bildirdi.
İradə SARIYEVA
