Əli Mustafa: “Rusiya-Ukrayna müharibəsinin çoxlu bəhanələri olsa da, tək bir səbəbi var...”
Prezident İlham Əliyev Çinin CGTN telekanalına müsahibəsində dedi ki, dünyada müharibələrin, qan tökülməsinin əsas səbəbi imperialist keçmişi olan ölkələrin özlərini hegemon kimi aparmağa çalışmasıdır:
“Bizim mövqeyimiz ondan ibarətdir ki, əgər hər bir ölkə diqqətini, sadəcə, öz gündəminə yönəltsə, başqa ölkənin işlərinə müdaxilə etməyə çalışmasa, münaqişələr, narazılıqlar, müharibələr olmaz. Bütün dünyada hələ də qeyri-sabit vəziyyətin olmasının və qan tökülməsinin yeganə səbəbi ondan ibarətdir ki, imperialist keçmişi olan ölkələr, sadəcə olaraq, müdaxilə etməyə, dominantlıq etməyə, diktə etməyə davam etmək istəyir və bu, təbii olaraq, müqavimətə gətirib çıxarır”.
Maraqlıdır, burada konkret olaraq bu fikri sübut edən hansı faktlarla çıxış etmək olar?
“İnsan hüquqlarından, ali dəyərlərdən dəm vuran Fransa adalardakı xalqların hüquqlarını tapdalayır”
Sözügedən məsələyə aydınlıq gətirən Demokratik Dəyişim Partiyası Təşkilat Komitəsinin sədri Əli Mustafa “Bakı-Xəbər”ə açıqlamasında bununla bağlı bir sıra məqamlara toxundu: “Prezident İlham Əliyevin qoyduğu məsələ kifayət qədər ciddidir və doğru yanaşmadır. Həqiqətən də bu gün dünyada baş verən əksər münaqişələrin kökünə varsaq görərik ki, bu, orada imperiyaların yenidən böyümə və yaxud da diqtə etmə, təcavüz etmə cəhdləri ilə bağlıdır. Bu gün Rusiya-Ukrayna savaşına baxsaq, Rusiya-Gürcüstan, Rusiya-Ermənistan münasibətlərinə baxsaq bunun aydın təzahürlərini görərik. O cümlədən, son günlər Azərbaycan-Rusiya münasibətlərində gərginliyə diqqət yetirsək və məsələyə dərindən yanaşsaq, baş verənlərin məhz bu imperiyaların yenidən dirçəlmək, böyüyüb genişlənmək istəyi ilə bağlı olduğunu görərik. Bu gün Rusiya-Ukrayna müharibəsinin çoxlu bəhanələri olsa da, tək bir səbəbi var. O da ondan ibarətdir ki, Rusiya Ukraynanı yenidən işğal etmək və yeni dünyada daha böyük güc mərkəzi kimi qalmaq istəyir. Dünyanın yeni düzənində bir imperiya olaraq daha çox əraziyə və əhaliyə sahib olmaq istəyir. Eyni zamanda Trampın son vaxtlar Kanada, Qrenlandiya və Panama ilə bağlı sərgilədiyi siyasət də bunun göstəricisidir. Fransanın bir sıra Afrika ölkələrinin daxili işinə qarışması, dənizaşırı adalarda yeritdiyi neokolonial siyasət də bunun göstəricisidir. Faktiki olaraq insan hüquqlarından, ali dəyərlərdən dəm vuran Fransa adalardakı xalqların hüquqlarını tapdalayır. Bütün bunların hamısı imperiyaların kiçik ölkələrə, dünyanın başqa ərazilərinə olan iddiaları ilə bağlıdır. Ona görə də hesab edirəm ki, biz bu məsələdə bir şeyin fərqində olmalıyıq. O da ondan ibarətdir ki, bu gün Ukraynanı və yaxud da Ermənistanı gözləyən risqlər, təhlükələr eyni zamanda Azərbaycanı da gözləyir. O baxımdan da hesab edirəm ki, Prezident Əliyevin yanaşması doğrudur və gerçəyi əks etdirir”.
Vidadi ORDAHALLI
