Azərbaycan indiki yerə 3 amilin gücü ilə gəlib çıxdı...
Ceyhun Məmmədov: “Bu gün məhz bu siyasət nəticəsində Azərbaycan günü-gündən inkişaf edir, daha da möhkəmlənir”
Bildiyimiz kimi, Prezident İlham Əliyev yanvarın 20-də Davosda Çinin CGTN (China Global Television Network) telekanalına müsahibə verib.
Müsahibəsində ölkəmizlə və dünya ilə bağlı fikirlər bildirən Prezident Əliyev həmçinin qeyd edib ki, ideologiya, iqtisadiyyat və milli ideyalar Azərbaycanı layiq olduğumuz yerə gətirib çıxarıb: “Biz özümüzü daxili işlərə müdaxilədən qorumağa müvəffəq olduq. Lakin heç də hər bir ölkə bunu etmək üçün potensiala malik deyil. Əgər ölkə iqtisadi cəhətdən asılıdırsa, o zaman sözsüz ki, onun müqavimət göstərmək və öz milli maraqlarını müdafiə etmək üçün daha az imkanı olacaq. İqtisadiyyat hər şeyin əsasını təşkil edir. İdeologiya, iqtisadiyyat və milli ideyalar - bunlar hamısı birlikdə Azərbaycanı bizim layiq olduğumuz yerə gətirib çıxardı”.
“Milli ideologiya, milli şüur da Azəbaycanın dövlət siyasətinin hər zaman prioritet istiqamətlərindən, hədəflərindən biri olub”
Məsələ ilə bağlı şərh verən millət vəkili Ceyhun Məmmədov “Bakı-Xəbər”ə “cənab Prezidentin vurğuladığı amillər Azərbaycanın inkişafında, müstəqilliyinin möhkəmlənməsində müstəsna və əhəmiyyətli rol oynayıb. Yəni biz bunu bütün situasiyalarda və proseslərdə aydın şəkildə müşahidə etmişik. Daxili işlərə müdaxilənin qarşısını almaq istiqamətində Azərbaycan çox böyük işlər görüb, öz maraqlarını müdafiə edib. Eyni zamanda Azərbaycan güclü iqtisadiyyat qura bilib, həmçinin milli ideologiya da ən yüksək səviyyədə dövlət tərəfindən qorunur, təmin olunur və həyata keçirilir. Bu gün məhz bu siyasət nəticəsində Azərbaycan günü-gündən inkişaf edir, daha da möhkəmlənir”-deyə bildirdi.
C.Məmmədov qeyd etdi ki, bütün sahələrdə, istiqamətlərdə görülən işlər, həyata keçirilən tədbirlər bunu deməyə əsas verir. C.Məmmədov vurğuladı ki, Azərbaycan daxili müdaxilələrin hədəfi olub: “Bizə qarşı bir sıra niyyətlərin həyata keçirilməsi, addımların atılması cəhdlərini dəfələrlə görmüşük. Amma qeyd etdiyimiz kimi, Azərbaycan bunların hamısının qarşısını qətiyyətlə alıb.
Eyni zamanda Azərbaycan iqtisadiyyatını qurub yarada bilib. Bu özünü açıq-aydın göstərir”.
C.Məmmədov qeyd etdi ki, bütün bunları biz öz siyasətimizdə görürük. “Milli ideologiya, milli şüur da Azəbaycanın dövlət siyasətinin hər zaman prioritet istiqamətlərindən, hədəflərindən bir olub”-deyə C.Məmmədov əlavə etdi.
İradə SARIYEVA
