Hazırda hər bir donor ölkə şübhə altındadır və onların ayırdıqları vəsaitin nəyə xərcləndiyini şəffaflıq, aşkarlıq yolu ilə gürcü xalqına göstərmək üçün sübutlar var. Bu sözləri Gürcüstan parlamentinin sədri Şalva Papuaşvili deyib.
O qeyd edib ki, xarici yardım dünyası artıq iki həftə əvvəl olduğu kimi deyil: “ABŞ-ın yeni administrasiyasından eşitdiyimiz açıqlamalar bəzi insanların xarici yardımla bağlı təsəvvürlərini alt-üst edib. ABŞ administrasiyası öz büdcəsindən xaricə yardım çətiri altında xərclənən pulları bizim indiyədək tənqid etdiyimizdən daha sərt və aydın şəkildə tənqid edib, əslində, saxta, cinayətkar, zərərli adlandırdıqları sxemləri ifşa edib. Trampın sərəncamının özü də bu vəsaitlərin digər ölkələri məhv etmək üçün istifadə olunduğuna dair araşdırmaya əsas verib. Bizdə təkcə şübhələr deyil, həm də sübutlar var ki, Gürcüstanda sabitliyi pozmaq üçün Amerika fondlarından əlavə, Aİ-yə üzv dövlətlər və Avropa fondlarından da istifadə olunub. Avropa Demokratiya Fondu bu baxımdan ən bariz nümunədir”. Elə bu fonda Gürcüstan hakimiyyəti parlamentin sonuncu çağırışına qatılan, lakin onun işində iştirakdan imtina edən müxalifət partiyalarına qarşı iş açıb. Son nəticədə “Gürcü Arzusu”nun planı reallaşarsa, cəmiyyətin siyasi qütbləşməsi problemi və Qərbə bağlı “5-ci kolon” problemi öz həllini tapacaq. Gürcüstan Prokurorluğu respublikanın dövlət maraqlarına zərər vurmaq məqsədi ilə təxribata cəhd, xarici təşkilatın və xarici nəzarətdə olan təşkilatın düşmənçilik fəaliyyətinə köməklik göstərilməsi faktları üzrə araşdırmalara başlayıb. Şöbəyə Daxili İşlər Nazirliyi və Dövlət Təhlükəsizliyi Xidməti dəstək verir. Təqsirli bilinənləri 15 ilə qədər həbs gözləyir. “İstintaq üçün əsas “Vahid Neytral Gürcüstan” ictimai hərəkatının nümayəndələrinin Gürcüstanın Baş Prokurorluğuna təqdim etdiyi bəyanat olub. Bəyanatda onlar ölkədə son illərdə və xüsusilə də son dövrlərdə baş verən hadisələrə toxunaraq qeyd ediblər ki, həm daxili, həm də xarici aktorların hərəkətləri Gürcüstan dövlətinə qarşı yönəlmiş və ölkənin konstitusiya quruluşuna və təhlükəsizliyinə təhdid yaradan hərəkətlərin məcmusunu göstərir”, - deyə prokurorluqdan bildirilib. Eyni zamanda, hakim “Gürcü Arzusu”nun müxalifət partiyalarının günahına şübhəsi yoxdur. Şalva Papuaşvili bildirib: “Biz onların müxtəlif xarici güclərlə və ya siyasi qruplarla tam razılaşdırıldığını görürük. Biz görürük ki, xaricdən göstəriş alırlar. Gördük ki, onların lideri Mixail Saakaşvilini Gürcüstanda Ukrayna xüsusi xidmət orqanları “əkib”. Ukrayna kəşfiyyatının kimlərlə əlaqəsi və kimdən göstəriş alması başqa sualdır. Saakaşvili Gürcüstana xarici xüsusi xidmət orqanları tərəfindən seçkilərə bir neçə gün qalmış bədxah və düşmənçilik məqsədilə gətirilib... Buna siyasi baxımdan yanaşsaq, o zaman çoxdan məlumdur ki, dövlətə xəyanət xarici qruplar, qüvvələr, ayrı-ayrı şəxslər və ya dövlətlərlə ölkəmizin milli maraqlarına zidd olan əməkdaşlıqdır. Başlanğıc nöqtəsi bizim milli maraqlarımızdır”.
Parlamentin hüquq məsələləri üzrə komitəsinin sədr müavini David Matikaşvili qeyd edib ki, cinayət işinin başlanması ictimaiyyətin etiraz aksiyalarının təşkilatçıları ilə bağlı müraciətinə cavabdır: “Xatırlayırıq ki, parlamentin istintaq komissiyasının yaradılması elan edildikdən dərhal sonra ictimai təşkilatlar təkcə 2012-ci ildən əvvəl mövcud olan vəziyyətə deyil, həm də ayrı-ayrı siyasətçilərin, siyasi partiyaların, QHT sektorunun, dövlətə və xalqa qarşı cinayət törətmiş bütün şəxslərin əməllərinə adekvat reaksiya vermək istəyini ifadə etmişdilər. İctimaiyyət müəyyən təşkilatların, siyasətçilərin xaricdən necə maliyyələşdiyini, fəaliyyətlərinin ölkəmizi dəstəkləmək, tərəqqiyə yönəlmədiyini açıq-aydın gördü. Bu təşkilatlar və siyasətçilər ölkədə iğtişaşlar, xaos və inqilabi hadisələrin yaranması üçün əlindən gələni etdilər”. Öz növbəsində, “Gürcü Arzusu”nun keçmiş üzvü, “Vahid Neytral Gürcüstan” partiyasının lideri Vato Şakarişvili vurğulayıb ki, prokurorluğun işi onun prezidentliyi dövründə Saakaşvilinin komandasının törətdiyi cinayətləri araşdıran parlament komissiyasının işini tamamlamalıdır: “Nəticədə “kollektiv Milli Hərəkat” adlanan təşkilat Gürcüstanın həyatından tamamilə silinməlidir. Bizim siyasi və ictimai məkanımız bu agent şəbəkəsindən birdəfəlik azad edilməlidir ki, ölkə yeni inkişaf mərhələsinə keçə bilsin”.
Politoloq Demur Giorxelidzenin verdiyi məlumata görə, hakimiyyət cinayət işi açmaq qərarına gəlsə, yəqin ki, ciddi dəlillərdən istifadə edəcək. Əks halda məhkəmə Gürcüstanda siyasi böhranı daha da ağırlaşdıra bilər: “Əgər insanlar təxribatda günahkardırsa, onlar cəzalandırılmalıdır. Qanun hamı üçün eynidir. Başqa bir şey odur ki, Gürcüstanda ondan çox seçici istifadə olunur. Üstəlik, Saakaşvilinin irsindən danışsaq, onun tərəfdarları hələ də bütün nazirliklərin işçilərinin əhəmiyyətli hissəsini təşkil edir. Onlar hətta “Gürcü Arzusu”nun deputat mandatı almış üzvləri sırasındadırlar. Bu baxımdan, "beşinci kolon"un nümayəndələrindən tamamilə qurtulmaq çox çətin olacaq”. Bu arada müxalifət nümayəndələri Gürcüstanın keçmiş prezidenti Salome Zurabişvilinin vasitəçiliyi ilə “Gürcü Arzusu” ilə mübarizə üçün koalisiya yaratmaq cəhdlərini davam etdirirlər. Artıq onlar Qərb ölkələrindən siyasi repressiyalarla məşğul olanlara qarşı sanksiyaların tətbiq edilməsini birgə tələb etmək barədə razılığa gəliblər.
Tahir TAĞIYEV
