Ermənilərin siyasi məntiqi - onlar nəyi inkar edirlərsə, deməli o işlə intensiv məşğuldurlar
Ermənistan Milli Assambleyasının sədri Alen Simonyan bəyan edib ki, Azərbaycan artıq üçüncü aydır, Ermənistanın sülhün bərqərar olunması ilə bağlı təkliflərinə cavab vermir. Jurnalistlərlə keçirdiyi brifinqdə Alen Simonyan vurğulayıb ki, Ermənistan heç kimi çaşdırmaq niyyətində deyil..."
Ermənilərin belə bir taktikası var - onlar nəyi inkar edirlərsə, deməli o işlə intensiv şəkildə məşğuldurlar. 90-cı illərdə ermənilər Azərbaycanın rayonlarını rus qoşunları vasitəsi ilə işğal edirdilər, lakin rəsmən təkzib edirdilər ki, filan rayon işğal edilməyib, dezinformasiyadır. Bu, ermənilərin son 30 ildə yürütdükləri siyasətdən çıxan nəticələrdən biridir. İndi bu düsturla yanaşsaq, Alen Simonyanın "Ermənistan heç kimi çaşdırmaq niyyətində deyil" ifadəsinin açması budur ki, bu gün Azərbaycanla münasibətlərin normallaşdırılması və iki dövlət arasında beynəlxalq hüququn tələbləri çərçivəsində sülh sazişinin bağlanması prosesində rəsmi İrəvan beynəlxalq ictimaiyyəti çaşdırmaqla məşğuldur.
Alen Simonyan bütün beynəlxalq tərəfdaşları aldadır ki, biz "konkret mexanizmlər" təklif edirik və onları müzakirə etməyə hazırıq. Alen Simonyanın nəyi nəzərdə tutduğu heç kimə aydın deyil, lakin bu xüsusda ona sual versəniz nəsə uydura bilər. Amma Azərbaycan konkret təklif irəli sürüb ki, sərhədlərdən üçüncu tərəfin qüvvələri geri cəkilsin. Ermənilər isə bütün dünyadan seçilmiş, "Aİ-nin mülki müşahidə missiyası" adlandırılan hərbçilərin sərhəddə hərbi kəşfiyyat müşahidələri aparması müddətini daha iki il uzadıb. Alen Simonyan "bilməsə də", bütün dünyaya bəllidir ki, Azərbaycanla Ermənistan arasında imzalanacaq 17 maddədən ibarət sülh sazişinin 2 maddəsi ilə Azərbaycan dövləti razı deyil. Yəni bunu parlamentin spikeri olan Alen Simonyana hələ deməyiblər? Bir neçə gün əvvəl Nikol Paşinyan ABŞ Konqresindəki çıxışında dedi ki, sülh sazişinin 17 maddəsindən 15-i razılaşdırılıb, 2 maddə üzərində müzakirələr gedir. Azərbaycan Ermənistanın təkliflər paketinə cavab verməyibsə Paşinyan bunu hardan bilir? Belə çıxır ki, parlamentin spikerinin hökumətin işlərindən xəbəri yoxdur?
Əlbəttə, Alen Simonyanın bütün məsələlərdən xəbəri var, sadəcə olaraq bu taktika ilə beynəlxalq ictimaiyyətdə Azərbaycan haqqında mənfi rəy yaratmaq istəyir. Rəy formalaşdırmaq istəyirlər ki, sülh sazişinin imzalanmasina əngəl törədən tərəf Azərbaycandır. Sülh sazişi ilə bağlı nəinki rəsmilər, hətta hər iki ölkənin media mənsubları artıq hər şeyi bilir.
Belə ki, Ermənistan konstitusiyasının preambulasını dəyişərək Azərbaycana qarşı torpaq iddiasi nəzərdə tutulan maddəni əsas qanundan çıxarmalı, Azərbaycan-Ermənistan şərti şərhədindən üçüncü quvvələri, konkret oparaq Aİ mülki müşahidə missiyasını geri çəkməli və Azərbaycanla birlikdə ATƏT-in Minsk qrupunun ləğv edilməsi barədə bəyanat imzalamalıdır. Artıq Ermənistan konstitusiyasının dəyisdirilməsi prosesinə start verilib. Hərçənd, konstitusiyaya görə, preambula parlamentin səsverməsi ilə də dəyisdirilə bilər. Əsas qanunda Paşinyana mane olan bir sıra maddələr də dəyişəcək, o cümlədən də Azərbaycanın tələbi yerinə yetiriləcək.
Digər iki tələbə gəlincə, Ermənistan bunları qəbul etmək istəmir. Bu tələblərin yerinə yetirilməsi artıq Ermənistanın imkanları daxilində deyil. Çünki bu iki məsələ - müşahidəçilərin geri çəkilməməsi və ATƏT-in Minsk qrupunun qorunması Qərb və ABŞ-nin Ermənistandan tələbidir. Ona görə də Baydenin müddətinin bitməsinə 6 gün qalmış ABŞ ilə Ermənistan strateji tərəfdaşlıq Xartiyası imzaladı. Üstəlik, həmin xartiyya əsasən Ermənistana Amerika sərhədçiləri gətiriləcək. Bu isə o deməkdir ki, Azərbaycanla Ermənistan arasında sülh sazişinin imzalanması hələ uzun müddət mümkün olmayacaq. Alen Simonyanın Azərbaycanın cavab verməməsi barədə səsləndirilən blefi isə siyasi boşboğazlıqdan başqa bir şey deyil. Amma bu informasiya dünya mediasında yayılır və Azərbaycana qarşı cəmiyyətdə mənfi rəy yaradır. Yəni Alen Simonyan siyasi manipulyasiya ilə məşğuldur.
Akif NƏSİRLİ
