Bəhruz Quliyev: “Peskovun açıqlaması Rusiyanın sülh prosesindəki rolunun azaldığını qəbul etdiyini, lakin...”
Həm Azərbaycan, həm Ermənistan sülh danışıqlarını proses yekunlaşana qədər müstəqil davam etdirməyə qadirdir. Bu barədə Rusiya prezidentinin mətbuat katibi Dmitri Peskov rusiyalı jurnalistlərə məlumat verib.
“Hər cür mümkün yardım göstərməyə hazır olsaq da, onların müstəqil səylərini alqışlayacağıq”, - o qeyd edib.
Peskov Cənubi Qafqazın proqnozlaşdırıla bilən region olaraq Rusiya üçün vacibliyini qeyd edib: “Əsas odur ki, Cənubi Qafqaz proqnozlaşdırıla bilən region olaraq qalsın və həqiqətən də rifahın hökm sürdüyü əməkdaşlıq ərazisinə çevrilsin”.
Bu o deməkdir ki, Rusiya Ermənistanın onu sülh prosesindən çıxarmaq kursu ilə barışmalı oldu. Yəni necə deyərlər, İrəvan Moskvanı sıfırladı.
“İndi rəsmi İrəvan Brüssel və Vaşinqton formatlarına üstünlük verir”
Sözügedən məsələni “Bakı-Xəbər”ə şərh edən “SƏS” Media Qrupunun rəhbəri, politoloq Bəhruz Quliyev bununla bağlı bir sıra məqamlara toxundu: “İlk növbədə deyim ki, son dövrlərdə Rusiya ilə münasibətlərin kəskinləşməsi fonunda müxtəlif siyasi və rəsmi simaların vasitəsilə yeri gəldi-gəlmədi bölgə ilə bağlı hər hansı fikir səsləndirmək, sanki münasibətlərin loyallaşması istiqamətində atılan addım kimi səciyyələnir. Bunu peşmançılıq kimi də dəyərləndirmək olar. Rusiya prezidentinin mətbuat katibi Dmitri Peskovun açıqlaması da dediklərimizə bir misaldır. Bu, həm də onu göstərir ki, Moskva Azərbaycan və Ermənistanın sülh danışıqlarını müstəqil aparmasını qəbul edir və bu prosesi dəstəklədiyini bildirir. Ancaq bu, həm də Rusiyanın bölgədəki mövqeyinin zəifləməsi fonunda məcburi bir mövqe kimi də görünür. Bəllidir ki, İrəvanın son dövrlərdə Qərbə və Avropaya daha çox yaxınlaşması, KTMT və digər Rusiya yönümlü platformalardan uzaqlaşmaq istəyi Moskvanın Cənubi Qafqazdakı təsirini sarsıdıb, nəzərə alsaq ki, son olaylar Azərbaycanı da Rusiyadan çox uzaqlaşdırıb. Eyni zamanda bu gedişat Rusiyada narahatlıq doğurur. Çünki bu gedişlə Rusiya regiondan tam təcrid olunacaq. Digər tərəfdən, əvvəllər Ermənistan sülh prosesində Rusiyanı əsas vasitəçi kimi görürdü. Lakin indi rəsmi İrəvan Brüssel və Vaşinqton formatlarına üstünlük verir. Peskovun “onların müstəqil səylərini alqışlayacağıq” açıqlamasını bir növ reallıqla barışma kimi də qəbul edə bilərik. Bununla belə, Rusiya Cənubi Qafqazın proqnozlaşdırıla bilən və sabit bir region kimi qalmasını öz maraqları üçün vacib sayır. Moskva bölgədə xaos və qeyri-müəyyənlik istəmir. Çünki bu, həm onun iqtisadi, həm də strateji maraqlarına zərər verə bilər. Ancaq Ermənistanın Rusiyanı "sıfırlaması" hələ tam başa çatmış bir proses deyil. Ona görə ki, Moskvanın hələ də bu ölkə üzərində müəyyən təsir imkanları var. Ümumilikdə, Peskovun açıqlaması Rusiyanın sülh prosesindəki rolunun azaldığını qəbul etdiyini, lakin bölgədəki mövqeyini tam itirməmək üçün çabaladığını və balanslı bir ritorika seçdiyini göstərir”.
Vidadi ORDAHALLI
