Məhəmməd Əsədullazadə: “Bu təhdidlər Rusiyanın imperialist xislətinin tərkib hissəsidir və təsadüfi deyil”
Rusiya mediası Azərbaycanı cəzalandırmaq üçün konkret təhdidlərlə çıxış edir. Qeyd edilir ki, Azərbaycanın əmək miqrantlarının Rusiyadan vətənə pul köçürmələri (ildə təxminən 1 mlrd. dollardan çox) Azərbaycanın illik büdcə gəlirinin təxminən 7 faizini təşkil edir. Onların bloklanması anında onun defisitinə və dövlət xərclərinə təsir edəcək.
Azərbaycanın Rusiyaya tədarükləri əsasən Türkiyədən reeksport edilən meyvə və tərəvəzdən ibarətdir. Eyni zamanda, Rusiya Azərbaycana taxıl, süd məhsulları, nəqliyyat vasitələri, avadanlıqlar tədarük edir. Azərbaycanın ərzaq satınalmalarının ümumi həcminin 30 faizi Rusiyanın payına düşür. Moskva Bakı dəniz limanını "Şimal-Cənub" nəqliyyat dəhlizindən çıxara bilər. Bundan başqa, Azərbaycan neftinin Novorossiysk vasitəsilə Avropaya çatdırılması bloklana bilər, bu da Azərbaycanın valyuta gəlirlərinin kəskin şəkildə azalmasına gətirib çıxarar. Nəhayət, Rusiya “ləzgi problemi” ilə bağlı siyasətini yenidən nəzərdən keçirə bilər.
Göründüyü kimi, Rusiya mətbuat vasitəsi ilə təhdidləri gündəmə gətirir.
“Alternativ variantlar nəzərdən keçirilməli və bu ölkədə iqtisadi asılılıq maksimum azaldılmalıdır”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Rusiyanın AZAL-a məxsus təyyarəni vurması və Azərbaycandan üzr istəməməsi münasibətləri gərginləşdirir: “Rusiya daha da irəli gedərək Azərbaycana qarşı siyasi təzyiqlərə başlayıb. Öz təsir rıçaqlarını bəlli mətbuat orqanları ilə və Dumadakı deputatlar vasitəsilə gündəmə gətirir. Həmçinin Rusiyadakı azərbaycanlı miqrantlara qarşı təzyiqlər başlayıb. Onların deportasiya ediləcəyi ilə bağlı təhdidlərlə çıxış edir. Azərbaycana Rusiyadan valyuta axınının azalacağını bəyan edir. O cümlədən, Azərbaycan neftinin Novorossiysk vasitəsilə Avropaya çatdırılmasının bloklanacağını deyirlər. Ancaq bir məqamı qeyd edim ki, sözügedən kəmər olmasa da olar. Çünki demək olar, həmin kəmərlə Azərbaycan neft ötürmür. Ancaq Rusiyanın ləzgi separatizmi ilə Azərbaycanı hədələməsi o deməkdir ki, müəyyən dairələr bu kimi vasitələr üzərində işləyirlər. Bütün bu təhdidlər Rusiyanın imperialist xislətinin tərkib hissəsidir və təsadüfi deyil. Görünən odur ki, Rusiya Azərbaycana qarşı hibrid müharibəyə başlayıb. Yəni Ukrayna cəbhəsində məğlub olmaqda olan Rusiyanın Cənubi Qafqazın aparıcı ölkəsi olan Azərbaycana qarşı bu hibrid müharibəsi Moskvanın əleyhinə işləyəcək. Azərbaycan müstəqil siyasət aparır, Ermənistanla ikitərəfli danışıqlara önəm verir. Bununla Rusiyanın maraqlarını hər hansı formada Azərbaycan təhdid etmir, amma Moskva qonşularına qarşı ritorikanı sərtləşdirir. Aqressiv, təxribat ritorikasını sərtləşdirir. Hesab edirəm ki, Azərbaycan təmkinlə öz siyasətini aparmalıdır. Alternativ variantlar nəzərdən keçirməli və Rusiyadan iqtisadi asılılıq maksimum azaldılmalıdır. Çünki Rusiyanın sağı-solu bəlli olmadığı üçün bu ölkəyə etibar etmək olmaz”.
Vidadi ORDAHALLI
