Məhkəmədə Azərbaycan dövlətini zərərçəkmiş qismində Nazirlər Kabineti Aparatının rəhbəri Rüfət Məmmədov təmsil edir
Bakı Məhkəmə Kompleksində yerləşən Bakı Hərbi Məhkəməsində hakimlər Zeynal Ağayevin sədrliyi ilə Camal Ramazanovdan və Anar Rzayevdən ibarət tərkibdə (ehtiyat hakim Günel Səmədova) keçirilən məhkəmə iclasında təqsirləndirilən şəxslərin hər biri bildikləri dildə tərcüməçi, habelə müdafiələri üçün vəkillərlə təmin olunub.
Məhkəmə iclasında zərərçəkmiş şəxslərin bir qismi, onların hüquqi varisləri və nümayəndələri, dövlət ittihamını müdafiə edən prokurorlar, habelə Azərbaycan dövləti adından zərərçəkmiş qismində Nazirlər Kabineti Aparatının rəhbəri Rüfət Məmmədov iştirak edib. Bu məhkəmədə dövlət təmsilçisinin kimliyi cəmiyyət üçün kifayət qədər maraq doğurur.
Baki-xeber.com Nazirlər Kabinetinin rəsmi internet resursuna istinadən bildirir ku, 2019-cu ilin noyabr ayında Əli Əsədov həmin vaxta qədər İqtisadiyyat nazirinin müavini işləmiş Rüfət Tofiq oğlu Məmmədovu Nazirlər Kabinetinin Aparat rəhbəri vəzifəsinə təyin edib.
Bəs, bu məhkəmədə Azərbaycan dövlətini zərərçəkmiş qismində təmsil edən R.Məmmədov kimdir?
Baki-xeber.com İqtisadiyyat Nazirliyinə istinadla Rüfət Məmmədovun tərcümeyi-halını təqdim edir:
R.Məmmədov 1981-ci ildə Bakı şəhərində anadan olub.
1998-2002-ci illərdə Bakı Dövlət Universitetində Beynəlxalq Hüquq ixtisası üzrə bakalavr təhsili, 2002-2003-ci illərdə Almaniyanın Drezden Texniki Universitetinin Avropa İnteqrasiya Hüququ üzrə magistr təhsili alıb.
Əmək fəaliyyətinə 2002-ci ildə başlayıb, yerli və xarici şirkətlərdə hüquq sferasında çalışıb.
2004-2007-ci illərdə "Avropa İttifaqı ilə Azərbaycan arasında Tərəfdaşlıq və Əməkdaşlıq Sazişi”nin həyata keçirilməsinə dəstək layihəsində hüquq məsləhətçisi, 2007-ci ildən Avropa İttifaqının Azərbaycan Respublikasına Beynəlxalq Texniki Yardımı üzrə Koordinasiya Bürosunun icraçı direktoru vəzifəsində işləyib.
R.Məmmədov 2010-2011-ci illərdə Azərbaycanda İxracın və İnvestisiyaların Təşviqi Fondunda (AZPROMO) vitse-prezident, 2011-2012-ci illərdə özəl sektorda konsultant olaraq çalışıb.
2012-ci ildən AZPROMO-nun prezidenti olub.
Azərbaycan Respublikası Prezidentinin 2018-ci il 31 may tarixli Sərəncamı ilə iqtisadiyyat nazirinin müavini vəzifəsinə təyin olunub.
Qeyd edək ki, R. Məmnədov bu münaqişədən şəxsən zərər çəkən şəxs deyil. O, sadəcə olaraq, beynəlxalq hüquq ixtisasli məmur kimi bu məhkəmədə Azərbaycan dövlətini təmsil edir.
Dəniz NƏSİRLİ
