Ramil Məmmədli: “KTMT missiyasının göndərilməsi ilə bağlı Rusiyanın Ermənistana təzyiqi açıq müstəviyə keçir”
Minskdə Kollektiv Təhlükəsizlik Müqaviləsi Təşkilatı ölkələrinin Müdafiə Nazirləri Şurasının iclasında Rusiya müdafiə naziri Sergey Şoyqu KTMT qüvvələrinin Azərbaycan-Ermənistan sərhədinə göndərilməsinin zəruriliyini qabardıb.
Şoyqu bunu onunla əsaslandırıb ki, Qərb üçün əsas olan Rusiyanı Cənubi Qafqazda sıxışdırmaqdır: “Uzunmüddətli perspektivdə regionda təhlükəsizliyi və rifahı təmin etmək deyil. Buna misal olaraq Avropa İttifaqının Ermənistandakı mülki missiyasını göstərmək olar. Bu missiyaya hərbçilər və xüsusi xidmətlərin əməkdaşları daxil edilib. Düşünürəm ki, onların əslində nə ilə məşğul olduqlarını izah etməyə ehtiyac yoxdur. Bununla əlaqədar olaraq regiona KTMT missiyasının göndərilməsi istiqamətində işin davam etdirilməsini zəruri hesab edirik”.
Rusiya, sanki zorən KTMT qüvvələrinin göndərilməsində israr edir. Bütün vasitələrlə çalışır ki, Ermənistan buna razı olsun, niyə?
- “Kreml üçün Azərbaycan-Ermənistan sərhədində gərginliyin olması narahatedici məqam deyil”
Sözügedən məsələni “Bakı-Xəbər”ə şərh edən hərbi ekspert Ramil Məmmədli bildirdi ki, KTMT missiyasının göndərilməsi ilə bağlı Rusiyanın Ermənistana təzyiqi getdikcə açıq müstəviyə keçir: “Əvvəllər Rusiyanın bu yöndə təzyiqləri qapalı müstəvidə idisə, indi Zaxarovadan tutmuş Şoyquya qədər Rusiya rəsmiləri bunu yüksək səslə deyirlər. Hələ ki, Ermənistan bundan yayınır. Təsadüfi deyil ki, Ermənistanın müdafiə naziri Suren Papikyan Minskdə keçirilən KTMT Nazirlər Şurasının tədbirinə qatılmadı. Ermənistan rəsmiləri yaxşı bilirdilər ki, həmin tədbirdə bu məsələ qaldırılacaq. Bununla belə, ötən il Ermənistan KTMT-nin onun ərazisində keçirilməli olan təlimlərini ləğv edib. Ermənistan rəsmiləri bəyanatlarında vurğulayırlar ki, guya KTMT Ermənistan qarşısında götürdüyü öhdəliklərə əməl etməyib. Guya Azərbaycan Ermənistan ərazisinə daxil olub, amma qurum gərəkən tədbirləri görməyib. Bu həftənin əvvəllərində Ermənistanın baş naziri Nikol Paşinyan demişdi ki, İrəvan bu təşkilatın “kəsərsiz” struktur olduğunu görsə, KTMT-dən çıxması istisna olunmur. O habelə deyib ki, Rusiya XİN-in nümayəndəsi onun bəyanatlarını şərh edə bilməz və o yalnız bu bəyanatları nəzərə almalıdır. Bütün bunlar tərəflər arasında münasibətlərin gərgin olmasından xəbər verir. Rusiyanı ən çox narahat edən məqam KTMT ölkəsində Avropa İttifaqının hərbi missiyasının fəaliyyət göstərməsidir. Özü də o ölkə ki, orada Rusiyanın hərbi bazaları fəaliyyət göstərir. Məhz bunu Rusiya hakimiyyəti həzm edə bilmir. Kreml üçün Azərbaycan-Ermənistan sərhədində gərginliyin olması narahatedici məqam deyil. Rusiya, sadəcə, bu minvalla sərhədə yerləşib Avroittifaq missiyasını sıxışdırmaq istəyir. Budur bütün bu həngamənin arxasında dayanan niyyət. Belə görünür ki, Ermənistan KTMT missiyasının gəlməsinə razı olmayacaq”.
Vidadi ORDAHALLI
