Şahbaz Quliyev: “Bir yerə çağırmırlar ki, oturaq, söhbət edək, görək Dilqəm nə istəyir?” Dilqəm Əsgərov: “Bizim aramızda heç bir şey baş verməyib...”
2014-cü ilin iyul ayında Kəlbəcərdə ermənilər tərəfindən girov götürülən və Azərbaycanın Vətən müharibəsində qazandığı qələbədən sonra erməni girovluğundan azad edilərək vətənə gətirilən Dilqəm Əsgərov və Şahbaz Quliyev arasında qalmaqal və qarşılıqlı ittihamlar səngimək bilmir. Girovluqdan qayıtdıqdan sonra D.Əsgərov və Ş.Quliyev bir-birinə düşmən kəsiliblər. Bunu son günlər KİV-də tərəflərin bir-birini ittiham edən açıqlamalarından da açıq görmək olar.
Aprelin 12-də D.Əsgərov və Ş.Quliyevlə birlikdə Kəlbəcərdə ermənilər tərəfindən tutulan, sonra isə qətlə yetirilən Həsən Həsənovun doğum günü idi.
Son günlər H.Həsənovun ermənilər tərəfindən hansı şəkildə qətlə yetirildiyi müzakirə edilir, D.Əsgərov və Ş.Quliyev olayla bağlı bir-birinə zidd, uyğun gəlməyən açıqlamalar verir, birinin dediyi digərinin dediyinin tamamilə əksi olur.
“Sfera.az” xəbər verir ki, “Moderator.az”ın əməkdaşı H.Həsənovun necə öldürülməsi ilə bağlı D.Əsgərova sual ünvanlayıb. D.Əsgərov deyib ki, bunu Şahbaz Quliyevdən soruşun və hətta əsəbləşib: “Allah Həsənə rəhmət eləsin. Həsənin necə öldürülməsini Nikol Paşinyanın dostu Ş.Quliyev yaxşı bilir. Bunu ondan soruşun. Şahbaz deyir ki, Həsən guya yaralı halda gəlib yanımdan keçdi. Haram olsun Şahbaza, o, nə üzlə Həsənin qəbrinin üstünə gedib? Mən Həsənin vurulduğunu görməmişəm. Mən indi Qubadayam. Çox təəssüf ki, Həsənin doğum günündə onun qəbrini ziyarət edə bilmədim”.
Ş.Quliyev isə bu barədə danışmaq istəmədiyini bildirib: “Dilqəm haqqımda nə deyir, özü bilər. İndi bu haqda heç nə danışmaq istəmirəm. Buna imkanım da yoxdur. Sonra nə vaxtsa görüşüb danışarıq”.
D.Əsgərovla Ş.Quliyevin arasında nələr baş verir, birlikdə erməni girovluğunda olan və sonradan ölkəmizə gətirilən bu iki şəxsin bir-birilə düşmən olmasının səbəbi nədir?
Əvvəlcə Ş.Quliyevlə əlaqə saxladıq və baş verənlərin və D.Əsgərovun ona yönəltdiyi “Həsənin necə öldürülməsini Nikol Paşinyanın dostu Ş.Quliyev yaxşı bilir” ittihamının səbəblərini və nə dərəcədə əsaslı olub-olmadığını soruşduq.
“O adam xəstədir, xəstələnib, dəlixanaya getməlidir…Vallah, mənim ona heç bir pisliyim dəyməyib. Məlumat vermək istəyirsinizsə, düzgün məlumat verin. Mən sizə deyim. Dünən Həsənin ildönümü idi, bir yoldaş kimi onun ildönümünə getmişdim. Nətəhər olmasa da, 26 gün onunla bir yerdə olmuşam. Yas yerinə getmişəm, başsağlığını verib evimə getmişəm, bir kəlmə danışmamışam. Yüz qram araq içib ağzına gələni danışır, heç bilmirəm ki, o nə deyir. Onun “Həsənin necə öldürülməsini Nikol Paşinyanın dostu Ş.Quliyev yaxşı bilir” ittihamını qəbul etmirəm. Çünki onların tutulması ilə mənim tutulmam arasında 8 gün fərq var. Həsənin necə öldürülməsini niyə məndən soruşurlar, Dilqəmdən soruşmurlar? Mən 2014-cü ilin iyul ayının 8-də ermənilərin əlində olmuşam, onlar iyulun 16-da olublar. Onlar ikisi oradan bir gediblər. Biz ayrı düşmüşük. Mən 8 gün onlardan tez tutulmuşam. Onlar bir gediblər, hara aparıldıqlarından mənim xəbərim olmayıb. Sonra Dilqəmi görmüşəm. Rəhmətlik Həsənin qardaşı deyib ki, guya bizə onun meyitini göstəriblər, amma doğru deyil. Mən onun meyitini görməmişəm, Dilqəmə göstəriblərsə, bilmirəm, çünki biz ayrı-ayrı olmuşuq”.
“Şahbaz müəllim, siz deyirsiniz ki, D.Əsgərovla ayrı düşmüsünuz. Bəs siz onunla nə zaman birləşmisiniz” sualına cavab olaraq Ş.Quliyev bildirdi ki, Bakıya gələndə: “Təyyarədən Bakıya düşəndə”. “Girovluqda olanda bir-birinizi görmürdünüz” deyə Ş.Quliyevdən soruşduqda o, “xeyr, görmürdük” cavabını verdi. Onların məhkəmələrdə yanaşı əyləşdirildikləri zaman burada aralarında hər hansı bir təmasın olub-olmadığını Ş.Quliyevdən soruşduqda o qeyd etdi ki, heç bir təmasa icazə verilməyib, hansı gün təmasa cəhdlər olubsa, ermənilər tərəfindən vəhşicəsinə döyülüblər: “Məhkəmədə bizim aramızda hərbçilər, vəkil və tərcüməçilər otururdu, bizə ağzımızı açıb danışmağa imkan verməyiblər. Ağzımızı açıb danışmaq istəmişiksə, axşam ermənilər tərəfindən qəddarlıqla döyülmüşük. Orada heç bir ünsiyyətimiz olmayıb. Heç orada Allahın suyunu istəməyə cürətimiz çatmayıb. Mən başa düşmürəm ki, Dilqəm nə istəyir? Bir yerə çağırmırlar ki, oturaq, söhbət edək, görək Dilqəm nə istəyir? Bəlkə sizi eşidər, dəvət edin, bir yerdə oturaq, danışaq, deyin ki, bilirik, sən Allahı tanımırsan, odu-alovu tanıyırsan, gəl birlikdə oturaq, danışaq, görək dərdin nədir, nə istəyirsən? Dərdini bilək, hamı bilsin ki, o nə istəyir?”.
“Şahbaz müəllim, siz deyirsiniz girovluqda ermənilər tərəfindən döyülmüsünüz, işgəncələr görmüsünüz, amma D.Əsgərov bunun əksini söyləyir...” - deyə bildirdikdə Ş.Quliyev: “Hə, o deyir ki, mənə şokolad yedirdiblər. Amma mən işgəncə görmüşəm, vəziyyətim göz qabağındadır, hazırda xəstəxanadayam, müalicə alıram. Qollarımı, qabırğalarımı qırıq-qırıq ediblər, dişlərimi kəlbətinlə çəkiblər, qılçalarım hələ tam sağalmayıb. Mən iki aydır Dövlət Təhlükəsizliyi Xidmətinin Hospitalında müalicə alıram. Bura heç kəsi buraxmırlar, hətta ailə üzvlərimi də. Burada çox yüksək səviyyədə müalicə alıram. Xəstəxanadayam, anam rəhmətə gedəndə çıxıb getmişəm, yasda iştirak edəndən sonra yenidən bura qayıdıb müalicəmi davam etdirirəm. Mən ölümdən qayıtmışam. Həkimlər məni yenidən həyata qaytardılar. Mənə bir dəfə cənab Prezident İlham Əliyev yaşayış verib, ikinci dəfə həkimlər. Dünən də rəhmətliyin ildönümü idi, Səbuhi müəllimgil zəng vurdu ki, ora gedirəm, qolumda şlanq ora getdim və sonra qayıtdım bura.
Mən D.Əsgərovla istənilən vaxt söhbətə hazıram. Onunla 1990-cı ildən yoldaşlıq edirəm və onun xasiyyətini bilirəm, “mənəm” deyib, özünü yekə göstərməyə çalışır...” cavabını verdi.
“D.Əsgərovla həmyerlisiniz” - deyə Ş.Quliyevdən soruşduqda o bildirdi ki, həmyerli deyillər: “Mən Tərtərdənəm, o, kəlbəcərli. Əslində, Kəlbəcərdən də deyil, hər kəsə bir söz deyir. Bu 30 ildə son 7 ili çıxmaq şərtilə onun hansı dinə qulluq etdiyini bilmirəm. Girovluqda onunla aramızda heç bir əlaqə, ünsiyyət olmayıb”.
Bir il Xankəndi, sonradan isə Şuşa türməsində saxlandığını deyən Ş.Quliyevin bu illər ərzində D.Əsgərovla heç bir söhbəti olmayıb.
“Dilqəm müəllim, Ş.Quliyevlə aranızda nə baş verir, bu qarşıdurmanın səbəbi nədir” sualı ilə D.Əsgərova da müraciət etdik. D.Əsgərov da bildirdi ki, Ş.Quliyevlə aralarında heç nə baş verməyib. Yaşananlara aydınlıq gətirmək əvəzinə, D.Əsgərov jurnalistləri, mətbuatı ittiham etdi, o mətbuatı ki, hər zaman onu müdafiə edib, onun erməni girovluğundan azad olunması üçün mübarizə aparıb. “Bizim aramızda heç bir şey baş verməyib, aranı qatan jurnalistlərdir. Şahbazın başı işləmir, “nenormalnıy” adamdır, o, ruhi xəstədir. O jurnalistlər ki, var, arada gəzib, o deyəni, bu deyəni yazırlar, aranı onlar qatırlar. Heç nə yoxdur, aranı qatan siz jurnalistlərsiniz”.
“Dilqəm müəllim, jurnalistin işi sual vermək, hadisələri araşdırmaq, işıqlandırmaqdır, sizə Şahbaz müəllimlə aranızda baş verənlər və H.Həsənovun ölümü ilə bağlı sual verirlər, siz də deyirsiniz ki, “Həsənin necə öldürülməsini N.Paşinyanın dostu Ş.Quliyev yaxşı bilir”. Siz deyirsiniz, jurnalist də yazır” - deyə D.Əsgərova bildirdikdə o, uzun müddət susdu və əlaqəmiz kəsildi, ardınca cəhd etsək də, o, telefonu götürmədi. Odur ki, D.Əsgərovun Ş.Quliyevlə aralarında nə baş verdiyinə dair heç bir izahını, əsaslandırmasını öyrənə bilmədik.
İradə SARIYEVA
