“BMT Təhlükəsizlik Şurasının qətnamələri var idi, ondan başqa ciddi bir sənəd yox idi”. Bunu Prezident İlham Əliyev Bakıda Hərbi Qənimətlər Parkı ilə tanışlıqdan sonra təltif olunan hərbi qulluqçularla görüşündə çıxışı zamanı deyib.
Dövlət başçısının sözlərinə görə, beynəlxalq müstəvidə, beynəlxalq təşkilatlar tərəfindən bizə sərf edən önəmli qərarlar və qətnamələr qəbul edildi: “Mən bu barədə əvvəlki illərdə danışarkən bəziləri hesab edirdi ki, bəli, bunlar qəbul olundu, amma bunun nəticəsi yoxdur. Bu gün gördük bunun nəticəsini, hər kəs gördü bunun nəticəsini. BMT Təhlükəsizlik Şurasının qətnamələri var idi, ondan başqa ciddi bir sənəd yox idi. BMT Baş Assambleyasının qərarı, Qoşulmama Hərəkatının qətnamələri, İslam Əməkdaşlıq Təşkilatı, Avropa Parlamenti. Avropa Şurası Parlament Assambleyası həmişə bizə düşmənçilik mövqeyi sərgiləyir, hətta onlar da məcbur olub ərazi bütövlüyümüzə dəstək nümayiş etdiriblər. Bütün bunlar siyasi və hüquqi baza yaradıbdır. Əgər bu, olmasaydı, müharibə dövründə bizə qarşı Minsk Qrupuna həmsədrlik edən ölkələrin BMT-dəki təşəbbüsü nəticə verə bilərdi. Bunu da hər kəs bilsin, bir çoxları bilmir. Müharibə gedə-gedə bizə qarşı sanksiyalar tətbiq etmək istəyirdilər. Biz öz torpağımızda vuruşuruq. Biz öz ərazi bütövlüyümüzü bərpa edirik. Bizə qarşı sanksiyalar tətbiq etmək ədalətsizlikdir, vicdansızlıqdır. Kim idi bunları təşkil edən? Minsk Qrupuna həmsədrlik edən ölkələr. Kim bunun qarşısını aldı? Bizə dost olan ölkələr, Qoşulmama Hərəkatına üzv olan ölkələr”.
Görünən odur ki, beynəlxalq qurumların qəbul etdiyi qətnamələr Qarabağ məsələsinin həllində bu və ya digər formada hüquqi baza yaradıb.
“...ölkəmizə açıq formada beynəlxalq təzyiq edə bilmədilər”
Məsələyə münasibət bildirən politoloq Elşən Manafovun sözlərinə görə, Qarabağ münaqişəsinin tənzimlənməsi ilə bağlı qəbul olunan beynəlxalq qərarlar, ümumilikdə, problemin Azərbaycanın ərazi bütövlüyü çərçivəsində həllini özündə ehtiva edirdi: “O cümlədən, işğal olunmuş ərazilərin boşaldılmasını tələb edirdi. Azərbaycanın torpaqlar üzərində suveren hüquqlarını təstiq edirdi. Məlum olduğu kimi, həmin qətnamələr illərlə kağız üzərində qaldı. Bu da ondan irəli gəlirdi ki, münaqişənin tənzimlənməsi ilə məşğul olan həmsədrlər Ermənistana təzyiq etmək istəmirdilər. Ona görə də ikili standartlardan çıxış edən beynəlxalq təşkilatların səriştəsizliyi üzündən bu qərarların icrası ləngidi. Nəticədə bütün yük Azərbaycan dövlətinin üzərinə düşdü. Azərbaycan BMT-nin 51-ci maddəsinə əsasən, işğal altında olan əraziləri azad etmək hüququna malik idi. Üstəlik, BMT-nin 4 qətnaməsi də bunu nəzərdə tuturdu. Bu baxımdan, Azərbaycanın apardığı 44 günlük savaş beynəlxalq hüquq normalarına söykənirdi. Ona görə də Azərbaycana açıq formada beynəlxalq təzyiq edə bilmədilər. Ən başlıcası, Azərbaycan öz ərazisində döyüş aparırdı. Fikrimcə, Azərbaycan Ermənistana həmin vaxt birbaşa zərbə vursaydı, o zaman situasiya bizim əleyhimizə işləyə bilərdi. O baxımdan, Azərbaycan çox doğru olaraq beynəlxalq güclərə bəhanə vermədi”.
Politoloq onu da qeyd etdi ki, ölkə Prezidentinin bütün bunları düzgün dəyərləndirməsi Azərbaycanın qələbəsini qaçılmaz etdi.
Vidadi ORDAHALLI
