Ermənistanda cari il iyunun 20-də keçiriləcək növbədənkənar parlament seçkiləri yaxınlaşdıqca müxalif düşərgədə proseslər daha maraqlı müstəvidə cərəyan etməkdədir. Xüsusən də “Qarabağ klanı” ətrafında baş verənlər indi daha çox diqqət cəlb edir. Klan, belə görünür, bu seçkilər fonunda tam parçalanmış vəziyyətə düşəcək.
Baş verənlərlə bağlı “Qraparak” qəzeti yazır: “Ermənistan müxalifəti güman edirdi ki, əsas qüvvələri birləşdirib seçkiyə, vahid cəbhə olmasa da, bir neçə böyük blokla gedə biləcək, amma məyus oldu. Bu günlərdə çox müxalifətçilər böyük birliyin alınmamasından, üstəlik mövcud olanların da daha kiçiklərə parçalana biləcəyindən əsəbiləşib. Onlar birləşməyə mane olan əsas günahkarların Serj Sarkisyan və Robert Köçəryan olduğunu bildiririrlər. Onların Nikol Paşinyandan çox bir-birilə mübarizə apardığı deyilir. Fikir ayrılıqları barədə unudub birləşsəydilər, Paşinyana ağır olardı”. Qəzetin hazırladığı materialda Sarkisyanın hakimiyyətə iddia etmədiyi, daha çox öz siyasi komandasının taleyini həll etməyə çalışdığı vurğulanıb. Köçəryana gəlincə isə, onun haqq qazandırılmayacaq ambisiyalarının olduğu, heç kimlə kompromisə getmədiyi qeyd edilib. Məhz bunun üçün Köçəryanla birləşənlər, eləcə də daşnaklar arasında tərəddüdlər başlayıb.
“Joxovurd” qəzeti də qeyd edir ki, Serj Sarkisyanın sədri olduğu Respublika Partiyası iyunun 20-də keçiriləcək növbədənkənar parlament seçkilərinə qatılmayacaq. Bildirilir ki, Sarkisyan yaxın ətrafına seçkilərdə iştirak etməyəcəklərini və Robert Köçəryanı dəstəkləməyəcəklərini deyib. O bildirib ki, Vətən Partiyasının sədri, Ermənistan Milli Təhlükəsizlik Xidmətinin keçmiş direktoru Artur Vanesyana dəstək vermək niyyətindədir. Qəzetin yazdığına görə, keçmiş baş nazir Vazgen Manukyanın başçılıq etdiyi “Vətənin xilası uğrunda hərəkat”da vahid siyahı ilə bağlı fikir ayrılığı var. Burada bir daha xatırladaq ki, 44 gün davam edən Vətən müharibəsinin nəticələrini əsas götürən müxalifət etiraz aksiyaları təşkil edərək Nikol Paşinyanı bu yolla hakimiyyətdən uzaqlaşmağa vadar edəcəyini düşünsə də, hadisələrin sonrakı gedişi bu qüvvələrin yanıldığını göstərdi. Müxalifət partiyalarının birləşdiyi “Vətənin xilası uğrunda hərəkat” çoxsaylı etiraz aksiyaları təşkil etsə də, cəmiyyətdən lazımı dəstək ala bilmədi. Müxalifət, xüsusən də müharibədə Ermənistanın məğlubiyyətinin əsas səbəbkarı qismində Nikol Paşinyanı təqdim edərək cəmiyyəti baş nazirə qarşı qaldırmağa çalışsa da, bu istiqamətdə fəaliyyətində fiaskoya uğradı. Hakimiyyətdən narazı olan erməni cəmiyyətində müxalifətə də heç bir inamın olmadığı, bu düşərgəyə etimad göstərilmədiyi üzə çıxdı. Bu fonda “Vətənin xilası uğrunda hərəkat” Nikol Paşinyan qatılmayacağı halda növbədənkənar parlament seçkilərinin keçirilməsini mümkün sayır və hələ də bu mövqeyində qalır. Bununla belə, “Qarabağ klanı” və onun liderlərindən olan sabiq prezident Robert Köçəryan, “Vətənin xilası uğrunda hərəkat”ın gözləntilərinin əksinə olaraq, Paşinyanın da qatıldığı növbədənkənar parlament seçkilərində iştiraka hazır olduğunu bəyan edir və müvafiq hazırlıqlar da aparır. Beləliklə, müxalif düşərgədə növbədənkənar parlament seçkilərinə münasibətdə ikili yanaşma hökm sürür. “Vətənin xilası uğrunda hərəkat” yaranmış vəziyyətdə əvvəlki mövqeyindən geri çəkilməyəcəyini, lazım gələrsə, hakimiyyətə qarşı qiyam təşkil edəcəyini bildirir. Hərəkatın lideri olan Vazgen Manukyan artıq bu xüsusda açıqlama versə də, qeyd edilən məsələ ilə bağlı da hələ əhalidən hansısa dəstək qazana bilmir. Köçəryan isə növbədənkənar parlament seçkilərində də cəmiyyətdən lazımı dəstək ala bilməyəcəyini yaxşı başa düşür. Amma belə seçkilər olacağı halda uduzduğu təqdirdə, o bunu Paşinyanın seçki saxtakarlığı ilə əlaqələndirirək, hakimiyyətə qarşı radikal qüvvələrin iştirakı ilə yeni aksiya, mümkün olarsa, qiyama başlamağı mümkün sayır. Amma “Qarabağ klanı”nda yaşanan parçalanma vəziyyəti dəyişir. Burada isə ən əsas məsələlərdən biri də odur ki, cəmiyyətdə “Qarabağ klanı”na, ümumiyyətlə müxalifətə lazımi dəstək yoxdur. Hətta müxalifətin Azərbaycana qarşı apardığı təbliğat da bu məsələdə ona kömək etmir. Yeri gəlmişkən qeyd edək ki, ADA Universitetində keçirilən "Cənubi Qafqaza yeni baxış: Münaqişədən sonra inkişaf və əməkdaşlıq" adlı konfransda çıxışında Prezident İlham Əliyev bu xüsusda maraqlı açıqlamalar verib: "Mən artıq bir neçə dəfə demişəm ki, biz müharibə səhifəsinin bağlandığını düşünürük. Mən artıq bir neçə dəfə demişəm ki, biz artıq Ermənistanla mümkün sülh razılaşması ilə bağlı da danışa bilərik. Bu bizim planlarımızdır. Lakin biz Ermənistan tərəfindən belə bir mesajlar görmürük. Ermənistan baş naziri susub. Ermənistan xarici işlər naziri isə aqressivdir. Ermənistan Azərbaycanla aqressiv davranmağa cəhd etmək durumunda deyil. Müharibə zamanı baş verənləri xatırlamalıdırlar. Erməni müxalifəti əslində isteriyadadır. Hazırda Azərbaycanafobiya və türkofobiya yeganə amilə çevrilib. Bu onlarda həmişə ən önəmli faktorlardan biri olub. Onların seçki kampaniyalarını Azərbaycanafobiya və türkofobiya, revanşizm hissi üzərində quracaqlarına əminəm. Buna görə bu qarşılıqlı əlaqəni birtərəfli qura bilmərik. Mövqeyimiz aydındır. Biz buna hazırıq. Bu asan olmayacaq. Ağdama və digər işğaldan azad olunan ərazilərə qayıdacaq sabiq məcburi köçkünlər ermənilərin onların torpaqlarına, onların yaxınların məzarlarına, dini abidələrə nə etdiklərini görəcəklər. Onlar nə hiss edəcəklər? Mən bunu təxmin edə bilərəm. Bilirsiniz, mən müharibə zamanı təmas xəttini keçəndə və ya Ağdama binokl vasitəsi ilə baxanda və işğaldan azad olunan ərazilərə səfər edəndə eyni şeyi hiss etdim. Bəli, mən Prezidentəm və öz öhdəliklərimi yerinə yetirməliyəm. Lakin biz hamımız insanıq, hisslərimiz var. Biz onları gizlədə, onları idarə edə bilərik. Lakin bəzən bu çox çətindir. Mən Azərbaycanlı qaçqınların hansı hissləri keçirəcəyini proqnozlaşdıra bilmərəm. Lakin gələcəyə baxan bir insan kimi, əgər Ermənistan tərəfi müsbət siqnallar verərsə, biz bu əlaqələri qurmaq üçün hər şeyi edəcəyik".
Samirə SƏFƏROVA
