Azərbaycanın Ukraynadakı səfiri Elmira Axundovanın özünə yeni və bahalı avtomobil alması ilə bağlı sosial şəbəkələrdə geniş polemika açılıb. Buna səbəb, konkret faktlara əsaslanaraq, onun büdcə israfına yol verdiyinin göstərilməsi olub.
Həmin məlumatda bildirilir ki, ötən il o, Azərbaycanın Ukraynadakı səfiri vəzifəsinə təyin olunarkən özündən əvvəlki səfir üçün 2018-ci ildə alınmış 2008-ci il buraxılış BMW 730 markalı avtomobili bəyənməyib. Bu səbəbdən də özünə son model Mercedes-Benz S 350L (2020-ci il buraxılış) sifariş verib. Avtomobil Almaniyadan sifariş olunub, dəyəri istehsalçı ölkədə 125 min avrodur (250 min manat). Son model bahalı avtomobil hazırda CDP 041 diplomatik nömrə ilə Elmira Axundovanın xidməti istifadəsindədir.
Elmira Axundova ötən ilin iyun ayında səfir vəzifəsinə təyin edilib, sifariş etdiyi avtomonil 2020-ci il dekabrın 17-də Ukrayna Dövlət Avtomobil Müfəttişliyində (Kiyev, Şevçenkivski rayonu) qeydiyyata alınıb. Çox maraqlıdır ki, bu cür müzakirələrin fonunda Elmira Axundova özü məsələ ilə bağlı susqunluq nümayiş etdirir, bu isə durumu bir az da qəlizdəşdirir. Bizim bu faktla bağlı XİN-dən münasibət öyrənmək cəhdimiz isə alınmadı. Qeyd edək ki, bu istiqamətdə aparılan müzakirələrdə Elmira Axundovanın bu addımı israf və dövlət büdcəsinə vurulan ziyan kimi qiymətləndirilir. Məsələn, Hacı Məmmədov adlı bir istifadəçi qeyd edir ki, avtomobil səfirliyə məxsusdur: “E.Axundovadan sonra növbəti səfir də istifadə edəcək. Belə avtomobilin alınması xarici işlər nazirliyi ilə maliyyə nazirliyi arasında razılaşdırılır. Səfir Azərbaycanı təmsil etdiyi üçün burada bir qəbahət yoxdur”. Lakin Azərbaycanın Ukraynadakı fövqəladə və səlahiyyətli səfiri Elmira Axundovanın 125 min avroluq son model Mercedes-Benz S 350 markalı (CDP 041 diplomatik nömrə nişanlı) xidməti avtomobil almasına dövlətin prestiji baxımından yanaşanlara da arqumentli cavab verənlər var. Sitat: “Bu cür qeyri-rasional yanaşmalara cavab olaraq bircə faktı qeyd etməklə kifayətlənəcəyəm. Hazırda dünyanın ən zəngin və yaşayış baxımından ən komfortlu ölkəsi kimi qəbul olunan İsveçrənin Ukraynadakı səfirinin xidməti avtomobili SDR 038 diplomatik nömrə nişanlı 2015-ci il istehsalı "Skoda Superb"dir. İsveçrə səfirinin avtomobilinin real bazar qiyməti 10-14 min avrodur, iki il əvvəl alınıb, əvvəlki xidməti avtomobil isə "Volvo" olub.
Yaxud 1 trilyon dollara qədər valyuta ehtiyatları olan (Azərbaycanın 80 illik dövlət büdcəsi qədər) Norveçin Ukraynadakı səfirinin avtomobilinin (BMW 530E 2018-ci il buraxılışı, SDR 036 diplomatik nömrə nişanlı) bazar qiyməti 30-35 min avrodur”.
Fuad Cəlilov adlı bir istifadəçi isə səfirlərimizə Azərbaycan istehsalı olan avtomobillərin verilməsini istəyib: “Müəllim, ölkələr adətən səfirlərə öz istehsal maşınlarını verirlər. O da əgər istehsal edirsə. Məsələn, Fransa Peguot, Almaniya Audi verir. Bizimkilər niyə “Lifan”da gəzməsinlər?”
Ukrayna və digər ölkələrdə tez-tez xarici səfərlərdə olan İctimai Siyasi Proseslər Beynəlxalq Araşdırmalar Mərkəzinin (İSBAM) rəhbəri Samir Adıgözəlli “Bakı-Xəbər”ə açıqlamasında bildirdi ki, belə israf halları qəbuledilməzdir: “Elmira Axundova səfirin köhnə maşınında gəzsəydi hörmətdən düşəcəkdi? Təəssüf ki, belə hallar yalnız bizdə olur. Kimi hansı vəzifəyə təyin edirlərsə, birinci işi kabineti yenidən təmir etdirmək və xidməti avtomobili dəyişmək olur. Bütün bu xərcləri isə dövlətin ayağına yazırlar. Yaxşı olardı ki, bizim xaricdəki səfirlərimiz gəzdikləri avtomobilin markasıilə deyil, gördükləri işlərin əmsalı ilə öyünsünlər. Hazırda bizim ölkənin ciddi diplomatik mübarizəyə ehtiyacı var. Çünki əldə etdiyimiz hərbi qələbəni diplomatik müstəvidə möhkəmləndirməliyik. Mən belə halları kəskin pisləyirəm. Heç kim demir ki, səfir orada maşınsız qalsın. Ancaq dövlətin puluna belə laqeyd yanaşma da olmamalıdır”.
Məhəmmədəli QƏRİBLİ
