Ümummili anım Azərbaycanın dövlətçilik qüdrətinin nümayişi kimi - Prezidentin siyasəti ətrafında növbəti kütləvi toparlanma…

Fatimə Hacıbəyli: “Azərbaycanın döyüş meydanında, siyasi müstəvidə qələbəsi göstərdi ki...”

img

Ərazilərini işğaldan azad edən xalqımız Vətən müharibəsində özünün zəngin qəhrəmanlıq tarixinə yeni səhifələr yazdı. Bu möhtəşəm zəfər göstərdi ki, Azərbaycan tarixinin ən güclü dövrünü yaşayır.

Qarabağda yenidən hərbi əməliyyatların başlanacağı təqdirdə üstünlüyün Azərbaycan Ordusunun tərəfində olacağı sirr deyildi. Elə sentyabrın 27-də Füzulinin və Cəbrayılın bir neçə kəndinin işğaldan azad edilməsi müharibənin Azərbaycanın qələbəsi ilə başa çatacağının anonsu idi. Əməliyyatların davam etdiyi 44 gün ərzində torpaqlarımızın sürətlə azad edilməsi tərəflərin qüvvə nisbəti ilə bağlı həqiqətləri ortaya qoydu.

Bu müharibə Azərbaycan xalqının öz vətəni uğrunda müqəddəs savaşı idi. 30 il əvvəl başlasa da, bu savaş bitməmişdi, başa çatmamışdı. Amma ədalət bərpa edilməli, torpaqlarımız azad olunmalı, qisas alınmalıydı. İlham Əliyevin rəhbərliyilə tarixinin ən qüdrətli dövrünü yaşayan dövlətimiz bunu bacardı, savaşı bitirdi, həm də qələbə ilə.

Bu qələbənin müəllifi İlham Əliyevin Ali Baş Komandanı olduğu müzəffər Azərbaycan Ordusudur. Xalqımıza bu zəfəri yaşadanlar bizim əsgərlərimiz və zabitlərimizdir. 44 gün ərzində rəşadətli ordumuz bir-birinin ardınca Cəbrayıl, Füzuli, Zəngilan, Qubadlı rayonlarını, ümumilikdə, 300-ə yaxın yaşayış məskənini işğaldan azad etdi.

Vətən övladları bu yolda ölümə meydan oxudular, torpaqlarımızın azadlığı uğrunda canlarından keçərək müqəddəs şəhidlik zirvəsinə ucaldılar. 44 gün davam edən döyüşlərdə ordumuzun 2783 nəfər döyüşçüsü qəhrəmancasına həlak oldu. Biz bu gün torpaqlarımızın azadlığına, ərazi bütövlüyümüzün bərpasına görə bu şəhidlərimizə borcluyuq. Onlar Azərbaycanı, xalqımızı öz canları, qanları ilə qalib etdilər.

Vətən uğrunda şəhid olan, canından keçən qəhrəman oğullarımız xalqımızın qəlbində əbədi yaşayacaqlar. Prezident İlham Əliyevin sərəncamına əsasən, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiramın əlaməti olaraq, hər il sentyabrın 27-si respublikamızda Anım günü kimi qeyd ediləcək.

Dekabrın 4-ü saat 12-də respublikamızda şəhidlərin xatirəsi 1 dəqiqəlik sükütlə yad edildi.

Məlumdur ki, dekabrın 4-də Azərbaycan Respublikasının Prezidenti İlham Əliyev və Birinci vitse-prezident Mehriban Əliyeva Şəhidlər xiyabanında olub və şəhidlərimizin əziz xatirəsini dərin ehtiramla yad ediblər. Dövlət başçısı "Əbədi məşəl” abidəsinin önünə əklil, Birinci vitse-prezident Mehriban Əliyeva gül dəstəsi qoyublar.

Onu da qeyd edək ki, həmin gün ölkə əhalisi və dövlətimiz şəhidlərimizin xatirəsini böyük hörmət və ehtiramla andı. Həmçinin, Azərbaycanın ərazi bütövlüyü uğrunda canlarını qurban vermiş Vətən müharibəsinin qəhrəman şəhidlərinin əziz xatirəsi məscidlərdə, kilsələrdə, sinaqoqlarda dərin ehtiram hissi ilə yad edilib. Dini məkanlarda şəhidlərin ruhuna dualar oxundu.

  • “Kimliyindən, yaşından asılı olmayaraq, hər kəs şəhidlərin xatirəsini dərin hörmətlə anır”

“Vəfa” Sosial-İctimai Birliyinin rəhbəri Fatimə Hacıbəyli qeyd etdi ki, torpaqlarımız uzun illər işğal altında idi. Azad edilmiş ərazilərimizdəki məscidlər bərpa olunacaq, həmin məscidlərdən azan səsləri eşidiləcək. Bu gün məscidlərdə, kilsələrdə, sinaqoqlarda şəhidlərimizin xatirəsi yad edilir: “Azərbaycanın döyüş meydanında, siyasi müstəvidə qələbəsi göstərdi ki, torpaqlarımız uğrunda şəhid olmuş igidlərimizin qanı yerdə qalmadı. Uzun illər davam edən işğala gec-tez son qoyulmalı idi. Dövlət başçısı İlham Əliyevin rəhbərliyilə Azərbaycan Ordusu  tarix yazdı. O tarix ki, hər kəs onu səbrsizliklə gözləyirdi. Azərbaycan haqq mübarizəsi apardı, ədaləti bərpa etdi. 44 günlük müharibə bu reallığı da göstərdi ki, yalnız  Azərbaycan gəncliyi deyil, kimliyindən, siyasi əqidəsindən, siyasi mənsubiyyətindən, cavan və yaşlı, kişi və qadın olmasından asılı olmayaraq, hər kəs ölkəmizin ərazi bütövlüyünün bərpası üçün canından keçməyə hazırdır! Əbəs yerə deyilmir ki, torpaq, əgər uğrunda ölən varsa, vətəndir”.

Həmsöhbətimiz onu da əlavə etdi ki, canlarını Azərbaycanın ərazi bütövlüyü uğrunda qurban vermiş Vətən müharibəsi şəhidlərinin əziz xatirəsi daim qəlbimizdə yaşayacaq. Anım gününün rəmzi Şuşanın rəmzi sayılan xarı bülbül seçildi. Sükut dəqiqəsi Prezident İlham Əliyevin Vətən müharibəsi şəhidlərinin xatirəsinin yad edilməsi haqqında Sərəncamı ilə elan olunub.  “Kimliyindən, yaşından asılı olmayaraq, hər kəs şəhidlərin xatirəsini hörmətlə anır” – deyə müsahibimiz vurğuladı.

Günel CƏLİLOVA

Son xəbərlər