“Azərbaycan Ordusu Şuşa şəhərini işğaldan azad etdi”. Bu müjdəni Azərbaycan Respublikasının Prezidenti, Ali Baş Komandan İlham Əliyev xalqa müraciətində verib. Prezident İlham Əliyevin Şuşanın düşmən işğalından azad edilməsi xəbərini Şəhidlər Xiyabanından elan etməsinin tarixi, mənəvi, hərbi və siyasi əhəmiyyəti nədir?
Ekspertlər qeyd edirlər ki, mühüm bir tarixi gündə ölkə başçısının Şəhidlər Xiyabanını ziyarət etməsi, şəhidlərimizin ruhunu anması və belə bir mühüm xəbəri xalqımıza məhz Azərbaycanın ərazi bütövlüyü uğrunda canını fəda edən Vətən övladlarının uyuduğu müqəddəs məkandan verməsinin bütün mənalarda böyük əhəmiyyəti var.
“Ali Baş Komandanın bu formada çıxış etməsi, Azərbaycan xalqına və dostlarımıza ötürdüyü önəmli mesajlar, düşmənə çəkdiyi göz dağı...”
Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru Faiq Ələkbərli baki-xeber.com-a bildirdi ki, Şuşanın işğaldan azad edilməsi müjdəsinin Ali Baş Komandan İlham Əliyev tərəfindən hərbi geyimdə Şəhidlər Xiyabanından xalqa bəyan edilməsinin bir neçə əsas səbəbi var. “Bunların arasında ən mühümü Şuşanın bir namus, qeyrət qalası, şəhəri kimi düşmən işğalından azad edilməsi ilə bağlıdır. Çünki Şuşa məsələsi Azərbaycan xalqının tarixində çox mühüm yer tutur və biz tarixən Şuşaya alınmaz qala kimi baxırdıq. Ancaq 1992-ci ildə xəyanət nəticəsində Şuşanın düşmən tərəfindən işğal edilməsi təkcə Azərbaycan vətəndaşlarında deyil, bütövlükdə dünyanın hər yerində yaşayan azərbaycanlılarda bir ruh düşkünlüyü, pessimizm yaratmışdı, qürurumuzu sındırmışdı. Ona görə də Ali Baş Komandanımız çox düzgün addım ataraq Şuşanın işğaldan azad edilməsi xəbərini xalqımıza hərbi geyimdə, Şəhidlər Xiyabanında verdi. Prezidentin bu addımının hərbi, siyasi, tarixi, mənəvi baxımdan çox böyük əhəmiyyəti, misilsiz dəyəri var. Prezident bununla Şuşanın 50 milyonluq Azərbaycan xalqı üçün nə qədər dəyərli, nə qədər önəmli olmasının mahiyyətini ortaya qoydu. Bu bir tərəfdən hərbi-siyasi baxımdan çox önəmlidir, digər yöndən mənəvi-ideoloji cəhətdən əhəmiyyətlidir. Hər iki tərəfini nəzərə almalıyıq. Həm dövlət başçısı, həm də Ali Baş Komandan kimi İlham Əliyevin bu formada Şuşanın işğaldan azad edilməsi xəbərini çox sərrast, dəqiq fikirlərlə ifadə etməsi çox mühüm oldu. Bunun əhəmiyyəti yalnız bu gün üçün yox, gələcək nəsillər üçün də çox böyükdür. Bizim hərb meydanında əldə etdiyimiz uğurlar, əslində, həm də mənəvi və ideoloji bir uğurdur. Bu uğurun mənası çox böyük və dərindir”.
Son 200 ildə ancaq məğlubiyyət acısı dadmış 50 milyonluq bir xalqın bu gün qələbə sevincləri yaşaması, qələbə müjdələri eşitməsi ruhunun, mənəvi-psixoloji vəziyyətinin, mənəvi qürurunun bərpa edilməsi deməkdir. “Prezidentin Şəhidlər Xiyabanından xalqımıza müraciət edib Şuşanın işğaldan azad edilməsi müjdəsini verməsi son iki əsrdə böyük məğlubiyyət acıları dadan böyük xalqımızın qürurunun yenidən bərpa edilməsi, ruhi-mənəvi ucalığının özünə qaytarılması idi. Hesab edirəm ki, bu həm də Azərbaycanın dostlarına və düşmənlərinə bir mesaj idi. Azərbaycanın dostları sırasında qardaş Türkiyə başda olmaqla Pakistan, Ukrayna, Gürcüstan, İsrail və digər dövlətlər üçün bu jestlərin xüsusi anlamı var. Qardaş Türkiyə başda olmaqla dostlarımız və qardaşlarımıza belə bir mesaj ötürülməsi çox sevindirici haldır.
Dövlət başçısının bu formada xalqın qarşısına çıxıb qələbə müjdəsini verməsi, eyni zamanda, düşmənlərimizə də çox əsaslı və tutarlı, güclü bir mesaj oldu. Ali Baş Komandanın hərbi geyimdə Şəhidlər Xiyabanında çıxış etməsi Ermənistanın özünə çox möhtəşəm, tutarlı bir mesaj oldu. Yəni cənab Prezident bir daha Ermənistana, onun hərbi-siyasi rəhbərliyinə layiq olduqları yeri göstərdi”.
F.Ələkbərlinin sözlərinə görə, bu yalnız Ermənistana deyil, onun havadarlarına da bir mesaj oldu və Ali Baş Komandanımız bununla dedi ki, Ermənistanın arxasında kimin, hansı dövlətin dayanmasından asılı olmayaraq, Azərbaycan düşmən təslim olana, ağ bayraq qaldırana, işğalçı silahlı qruplaşmalarını torpaqlarımızdan çəkib aparana, bir sözlə, sona qədər mübarizəsini davam etdirəcək. “Burada əsas məsələlərdən biri də torpaq, Vətən naminə yumruq kimi bir olduğumuzun, bu birliyimiz nəticəsində şəhidlərimizin qanının yerdə qalmamasının ifadə olunmasıdır. Cənab Prezident bunu da çox gözəl ifadə etdi, doğrudan da bir millət, xalq kimi yumruq kimi birləşmişik və Vətən naminə birləşməyi, həmrəy olmağı bacarmağımız bütün dünyaya bir daha sübut olundu. Bu həm də bütün şəhidlərimizin ruhu qarşısında bir hesabat idi ki, siz rahat uyuyun, biz artıq irəliyə doğru gedirik, itirdiyimiz torpaqlarımızın geri qaytarılması uğrunda mücadiləyə başlamışıq, yenidən Azərbaycan xalqı olaraq ruhumuz dirçəlir, güclü bir xalqa çevrilmişik. Ali Baş Komandanın bu formada çıxış etməsi, Azərbaycan xalqına və dostlarımıza ötürdüyü önəmli mesajlar, düşmənə çəkdiyi göz dağı Azərbaycanın öz mənəvi-ideoloji, tarixi, hərbi-siyasi gücünü bütün dünyaya nümayiş etdirməsi baxımından da böyük əhəmiyyətə malikdir” - deyə F.Ələkbərli qeyd etdi.
İradə SARIYEVA
