Ermənistan diplomatlarının bir neçə dövləti BMT-də Əliyevin ideyasına əks döndərmək cəhdləri puç oldu...
Məlum olduğu kimi, BMT-nin üzvü olan 130-dan çox dövlət Prezident İlham Əliyevin BMT Baş Assambleyasının Xüsusi sessiyasının təşkil olunması təşəbbüsünü dəstəkləyib.
Maraqlıdır ki, bu təşəbbüsə qarşı çıxış edən yeganə dövlət Ermənistan olub. Azərbaycan Prezidentinin təşəbbüsünün əleyhinə olması ilə bütün dünya bir daha Ermənistanın irticaçı mahiyyətinin şahidi oldu. Bu azmış kimi, Ermənistan Azərbaycanın bəşəri əhəmiyyət daşıyan bu təklifinə qarşı BMT-də əməlli-başlı təxribat törətməyə cəhd edib. Özü ilə yanaşı bir neçə dövləti də Prezident İlham Əliyevin ideyasına qarşı yönəltməyə cəhd edib, ancaq göründüyü kimi, meydanda tək qalıb.
Ermənistanın özünə müttəfiq bildiyi ölkələrin onu bu məsələdə tək buraxmağının səbəbi nə ilə izah oluna bilər?
Milli Qeyri Hökumət Forumunun prezidenti Rauf Zeyni “Bakı-Xəbər”ə açıqlamasında bildirdi ki, Ermənistan bu addımı ilə hansı dərəcədə qərəzli ölkə olduğunu sübut etdi:“Bu vəziyyət hər iki ölkə barədə dünya ictimaiyyətində obyektiv təsəvvür yaratmış oldu. Ortaya hansı mənzərə çıxdı? Məlum oldu ki, Ermənistan ucuz və düşmənçilik hissləri ilə yaşayan ölkədir. Azərbaycan isə yalnız özünü deyil, bəşəriyyəti bürüyən fəlakətdən çıxış yollarını fikirləşən, bu yöndə addımlar atmağı zəruri sayan dövlətdir. Ermənistan bu addımı ilə bir dövlət kimi özünün virus mahiyyətini ortaya qoydu. Sübut etdi ki, həmin ölkə istənilən virusdan təhlükəlidir. Virusa qarşı mübarizə üçün qaldırılan təşəbbüsə belə düşmən münasibət göstərən ölkəyə bundan yaxşı hansısa adı vermək olmaz. Ən biabırçı vəziyyət budur ki, Ermənistan bu məsələdə susub, reaksiya verməmək yolunu belə tutmayıb. Bunlar özləri ilə yanaşı, başqa ölkələri də öz sıralarına qoşmaq istəyiblər. Bu olduqca xüsusi məsələdir. Azərbaycanın dünyada artan nüfuzuna qarşı ermənilər düşünülmüş mübarizə apara bilmir. Bir çox hallarda apardıqları xaotik mübarizə metodları onların özlərinə qarşı yönəlir. Təbiidir ki, ağlı başında olan hər hansı bir ölkə Ermənistanın bu təşəbbüsünə dəstək verməzdi. Buna dəstək ifadə edən ölkə özünü bəşəriyyətin düşməni elan etmiş olardı. Ermənistanı bu tip reputasiyalar maraqlandırmır və buna görə də meydanda təklənmiş vəziyyətdə qalıb. Bu bizim Ermənistana verdiyimiz ilk dərs deyil. Son zamanlar keçirilən beynəlxalq tədbirlərin, demək olar ki, hər birində onlar layiqli cavablarını alırlar. Bir çox hallarda bu təşəbbüsü öz üzərinə şəxsən Prezidetin özü götürüb. Aşqabadda, “Valday Klubu” və başqa tədbirlərdəki ölkə başçısının çıxışlarını bura əlavə edə bilərik. Bir sözlə, Ermənistan bu addımı ilə özünü dünyada daha da rüsvay etmiş oldu”.
Deməli, İlham Əliyev irəli sürdüyü təşəbbüslə bütün dünyaya sübut etdi ki, COVID-19 pandemiyası ilə mübarizə tək bir dövlətin problemi deyil, bu mübarizədən tək-tək deyil, birlikdə, həmrəylik nümayiş etdirərək qalib çıxmaq olar. BMT Baş Assambleyasının keçirəcəyi xüsusi sessiya da bunu bir daha nümayiş etdirəcək ki, həqiqətən də güc birlikdədir. Bunun fonunda özünü biabır edən yalnız Ermənistan oldu.
Məhəmmədəli QƏRİBLİ
