Rusiyanın "Kommersant” qəzeti yazır ki, Paşinyan hakimiyyəti Rusiyaya növbəti bir zərbə vurmağa hazırlaşır. Söhbət Ermənistan ərazisində yayımlanan əcnəbi kanalların, o cümlədən, Rusiya kanallarının yayımının dəyişdirilməsini nəzərdə tutan qanun layihəsinin birinci oxunuşda qəbul edilməsindən gedir.
Əgər sənəd son oxunuşda da qəbul olunarsa, onda Rusiya kanalları dövlətlərarası razılaşmalar əsasında yayımlana biləcək. Bundan əlavə, onların kontenti erməni dilində dublyaj olunmalı və yaxud subtitrlərlə verilməli olacaq. "Kommersant” yazır ki, qanun iyul ayında qəbul oluna və 2021-ci ildən qüvvəyə minə bilər. Sənəd iyunun 18-də ilk oxunuşdan keçdikdən sonra Rusiya səfirliyi məsələyə münasibət bildirib. Rusiyanın bu ölkədəki səfirliyi baş verənlərə sərt təpki verib. Səfirlik yeni qanunun Rusiya televiziya kanallarının respublikada yayımının taleyinə birbaşa təsir edəcəyini etiraf etmək məcburiyyətində qalıb: “Yeni şərtlər daxilində xarici yayımçılar – söhbət ilk növbədə Rusiya telekanallarından gedir, – dövlət multipleksində yalnız dövlətlərarası razılaşma əsasında yayımlana biləcək. Yəni oyunun yeni qaydalarını razılaşdırmaq lazımdır və onları Ermənistan tərəfi təklif edəcək”.
Qəzet onu da qeyd edib ki, Rusiya kanalları əsasən kabellə yayımlanacaq. Ancaq kabelli yayım hamı üçün əlçatan deyil. Bu isə, istər-istəməz, rus kanallarına baxanların sayının azalmasına öz təsirini göstərəcək.
“Məlum qərar onsuz da gərgin olan Ermənistan-Rusiya münasibətlərini bir az da pisləşdirə bilər”
Sözügedən məsələ ilə bağlı fikirlərini “Bakı-Xəbər”lə bölüşən siyasi ekspert Ramil Hüseynovun sözlərinə görə, Rusiya telekanalları ilə bağlı məsələnin indiki məqamda parlament müzakirəsinə çıxarılması təsadüfi deyil: “Düzdür, Paşinyan hakimiyyətə gələndən sonra bu məsələ gündəmə gəlib. Hətta Rusiya Xarici İşlər naziri Sergey Lavrov buna etiraz etdi. Bir müddət bu məsələ dayandı. Ancaq Rusiyanın təsiri altında olan Ermənistan Ali Məhkəməsinin sabiq prezident Robert Köçəryanla bağlı məlum qərarı, yəni onun girov müqabilində azadlığa çıxması vəziyyəti dəyişib. Sözügedən qərar Paşinyanın iradəsinin əksinə idi. Rusiya müxtəlif formalarda Paşinyana müxalif olan qüvvələrə dəstək verir. Məhz bundan sonra Paşinyan Moskvada keçirilən paradda iştirak etməkdən imtina etdi. Bunu koronavirusla bağlı ölkədə yaranan ağır vəziyyətlə əlaqələndirdi, əslində isə bunun səbəbi Köçəryanın azadlığa çıxmasına Rusiyanın göstərdiyi dəstəklə bağlı idi. Məlum olduğu kimi, Köçəryanın azad olunması ilə bağlı tələb olunan 4 milyon dolları Rusiyadaki erməni iş adamları ödədi. Ona görə də Paşinyan parlamentdəki çoxluqdan istifadə edərək Rusiya telekanallarının yayımını məhdudlaşdırmaq istəyir. Qərarın birinci oxunuşda qəbul olunması məhz bununla bağlıdır. Eyni zamanda, Paşinyan yaxşı bilir ki, Rusiya telekanallarının erməni cəmiyyətinə təsiri böyükdür. Ona görə də o bunun qarşısını almaq üçün belə addımlar atır. Çox güman ki, Qərbdəki müəyyən dairələr də Paşinyana bu təlimatı verib. Hesab edirəm ki, bütün hallarda, məlum qərar onsuz da gərgin olan Ermənistan-Rusiya münasibətlərini bir az da pisləşdirə bilər”.
Çox güman ki, proseslərin sonrakı gedişində Ermənistanın məlum addımına ən ali səviyyədə Rusiya tərəfi etiraz edəcək. Həmçinin, bununla əlaqədar Paşinyan hakimiyyətinə təzyiqlər artacaq.
Vidadi ORDAHALLI
