10/07/2020 04:35
728 x 90

ABŞ Departamentindən Azərbaycanda insan alveri ilə bağlı mübahisəli hesabat – İndiyədək hər il Azərbaycana münasibət müsbət olurdu...

Şəmsəddin Əliyev: “Hesab edirəm ki, son hesabat qərəzli və reallıqdan uzaq yanaşmadır”

img

ABŞ Dövlət Departamentinin insan alveri haqqında illik hesabatı dərc olunub. Hesabatda iddia edilir ki, guya Azərbaycan insan alverinə qarşı mübarizə üzrə kifayət qədər tədbir görmür. Azərbaycan ABŞ Dövlət Departamentinin siyahısında traffikinqə qarşı kifayət qədər tədbir görmək iqtidarında olmayan ölkə olaraq qalır.

Hesabatda bildirilir ki, Azərbaycan insan alveri sahəsində ciddi problemlə qarşılaşan və hökumətləri “Traffikinq qurbanlarının müdafiəsi haqqında” Qanunun minimum standartlarına riayət edilməsi üçün kifayət qədər səy göstərməyən ölkələr arasında qalır: “Bu səylər insan alverçilərinin sayının çox olmasının tənqid edilməsini və onlara daha ağır hökmlər çıxarılması üzrə hakimlərə tövsiyələr verilməsini ehtiva edir. Hökumət vətəndaş cəmiyyəti üçün qrantlar təsis edib, qurbanların müdafiəsinə ayrılan ümumi maliyyə vəsaitini artırıb və insan alverinə qarşı mübarizədə QHT liderlərinin rolunu etiraf edib. Bununla belə, Azərbaycan hökuməti bu istiqamətdə kifayət qədər səy nümayiş etdirməyib. Məhz buna görə ölkə ardıcıl olaraq iki ildir monitorinq siyahısında 2-ci səviyyədə qalır”.

Dövlət Departamentinin səfiri Con Kotton Riçmond deyib ki, Azərbaycan hökuməti ötən illə müqayisədə daha az sayda qurbanı müəyyən edib. Əhalinin həssas qrupları arasında kifayət qədər iş aparmayıb, daxili insan ticarətinin üzə çıxarılmasına təşəbbüs göstərməyib.

Onu da qeyd edək ki, ABŞ dövləti hər zaman Azərbaycanın insan alverinə qarşı mübarizəsini yüksək qiymətləndirib. Dəfələrlə bununla bağlı dərc olunan hesabatlarda Azərbaycanda bu yöndə görülən işlər müsbət dəyərləndirilib. Belə olan halda, birdən-birə fərqli və mübahisəli məzmunda hesabatın yayılması nə deməkdir?

  • “Azərbaycan Daxili İşlər Nazirliyi insan alverinə qarşı barışmaz mübarizə aparır”

Məsələyə münasibət bildirən “Polisə Dəstək” İctimai Birliyinin rəhbəri Şəmsəddin Əliyevin sözlərinə görə, budəfəki hesabatda qeyd olunan məqamlar qərəzlidir və reallığı əks etdirmir: “Azərbaycan Daxili İşlər Nazirliyi insan alverinə qarşı barışmaz mübarizə aparır. İnsan alverinə qarşı 2005-ci ildə ixtisaslaşmış idarə yaradılıb. Təsadüfi deyil ki, insan alverinə qarşı mübarizədə heç bir təcrübəsi olmayan bir qurum qısa müddətdə çox böyük işlər gördü. Bir sıra hesabatlarda görülən işlər yüksək qiymətləndirildi. Azərbaycan polisinin bu sahədə xüsusi peşəkarlığı xüsusi vurğulanıb. O cümlədən, Dövlət Departamentinin hesabatlarında bu müsbət məqamlar qeyd olunub. Ancaq çox təəssüflər olsun ki, ABŞ Dövlət Departamentinin son hesabatında ciddi əsasları olmayan tənqidi məqamlar yer alıb. Hesab edirəm ki, son hesabat qərəzli və reallıqdan uzaq yanaşmadır. 2005-ci ildən bu günə qədər İnsan Alverinə Qarşı Mübarizə üzrə Baş İdarə, onun milli koordinatoru dövlətin bu istiqamətdəki siyasətini formalaşdırmaqda fəal iştirak edir və onun icrasını təmin edir. Kəmiyyət baxımından yetərincə fakt aşkar olunub və günahı olanlar cəzalandırılıb. İnsan alveri qurbanları içində qadınlar çoxluq təşkil edir. Ancaq insan alverinə qarşı mübarizədə kifayət qədər təbliğat kampaniyası həyata keçirilir. İnsanlar maarifləndirilir, risq qruplarına təlimatlar verilir. Sözügedən məsələ ilə bağlı bir sıra layihələr həyata keçirilir. Ona görə də Departamentin son hesabatı DİN-in ixtisaslaşmış qurumunun səmərəli fəaiyyətini şübhə altına almaq və qaralamaqdan başqa bir şey deyil”.

Bütün bunlar onu göstərir ki, Dövlət Departamentinin məlum hesabatı obyektivlikdən uzaqdır.

Vidadi ORDAHALLI

Son xəbərlər