10/07/2020 03:14
728 x 90

ABŞ-dan Ermənistana 10 milyon antikorrupsiya yardımı – Erməni lobbisi Paşinyanın təqiblərinə antikorrupsiya donu geyindirə bildi

Fikrət Sadıqov: “Müəyyən dairələr erməni lobbisinin təsiri altına düşərək Ermənistana maliyyə yardımı göstərirlər”

img

ABŞ hakimiyyəti Ermənistanda antikorrupsiya siyasətinin dəstəklənməsini maliyyələşdirəcək. Belə ki, beşillik layihə ABŞ Beynəlxalq İnkişaf Agentliyi (USAİD) tərəfindən üçüncü təşkilatların və kiçik müəssisələrin iştirakı ilə həyata keçiriləcək.

Agentliyin şərhində qeyd olunur ki, vəsait bir sıra işlərə yönəldiləcək: “Bu layihədəki strateji diqqət bütün hökuməti əhatə edən antikorrupsiya siyasətini həyata keçirmək üçün Ermənistanın hökumət və qeyri-dövlət iştirakçılarının qabiliyyətinin gücləndirilməsinə və müvafiq proseslərin sadələşdirilməsinə yönəldiləcək”.

Bu məqsədlər üçün on milyona qədər dollar ayrılması planlaşdırılır.

Birləşmiş Ştatların sözügedən məqsəd üçün Ermənistana maliyyə vəsaiti ayırması sırf erməni lobbisinin apardığı fəaliyyətin nəticəsidir. Çünki Ermənistanın hansı antikorrupsiya fəaliyyətindən söhbət gedə bilər ki, Paşinyan və ailəsi qanunsuz ticarət fəaliyyəti ilə məşğul olmaqda ittiham edilir? Bununla bağlı çoxsaylı fakt var. Bir müddət öncə bəlli oldu ki, Paşinyan hakimiyyətin ona verdiyi imkanlardan sui-istifadə edərək qanunsuz silah, siqaret, brilyant alveri ilə məşğul olur. Ölkədəki siyasi repressiyalar fonunda iş adamları sıxışdırılır. Yalnız hakimiyyətə yaxın olan iş adamlarına xüsusi şərait yaradılır. Belə olan halda, Paşinyan hakimiyyətinin hansı antikorrupsiya fəaliyyətindən söhbət gedə bilər? Görünən odur ki, erməni lobbisi Paşinyanın ölkədə apardığı təqiblərə antikorrupsiya donu geydirir.

  • “Paşinyan hakimiyyətinin ölkədə korrupsiyaya qarşı mübarizə aparmasından danışmaq gülüncdür”

Məsələyə münasibət bildirən keçmiş diplomat, politoloq Fikrət Sadıqovun sözlərinə görə, ABŞ-dakı müəyyən dairələr erməni lobbisinin təsiri altına düşərək Ermənistana maliyyə yardımı göstərirlər: “Hesab edirəm ki, bunun heç bir əsası yoxdur. Fikrimcə, bu qərar qərəzli və ədalətdən uzaq bir yanaşmadır. Zaman-zaman biz belə ədalətsiz yanaşmanın şahidi olmuşuq. Belə ikili yanaşmanın nəticəsidir ki, Ermənistandakı bütün neqativ hallara göz yumurlar. Paşinyan hakimiyyətinin ölkədə korrupsiyaya qarşı mübarizə aparmasından danışmaq gülüncdür. Düzdür, Paşinyan hakimiyyətə gələndə bir sıra populist vədlər verdi. O cümlədən, korrupsiyaya qarşı mübarizə aparacağını və bununla bağlı ciddi struktur islahatları həyata keçirəcəyini vəd edirdi. Ancaq çox keçmədi ki, bütün bunların quru vəd olduğu ortaya çıxdı. Paşinyan korrupsiyaya qarşı mübarizə aparmaq əvəzinə, əksinə, öz şəbəkəsini qurdu. Paşinyanın adı qanunsuz brilyant, siqaret alverində hallanır. Ailəsinin adı bu işdə hallanır. Özü də bunu biz yox, erməni ekspertləri, bu ölkəni xaricdə təmsil edən diplomatlar deyirlər. Erməni mediasında bununla bağlı geniş müzakirələr gedir və açıq şəkildə onu günahlandırırlar. Belə məlum olur ki, ABŞ Beynəlxalq İnkişaf Agentliyi bütün bunları görmək istəmir. Erməni lobbisinin təsiri altına düşərək yanlış qərarlar verir. Bütün hallarda, sözügedən qərar doğru deyil”.

İndiki məqamda belə bir qərarın verilməsi tamamilə yanlışdır. Ən azından ona görə ki, neçə vaxtdır Ermənistanda siyasi repressiyalar yaşanır. Buna hansısa formada etiraz etmək əvəzinə, Ermənistan mükafatlandırılır.

Vidadi ORDAHALLI

Son xəbərlər