Məhəmməd Əsədullazadə: “Payızda pandemiya səngisə, bu, Paşinyan üçün yeni siyasi böhran gətirəcək”
Rusiya mediası açıq şəkildə Çarukyanın müdafiəsinə qalxıb. Bununla belə, yeni inqilab anonsu verir. Bu dəfə Rusiyanın "İzvestisiya” qəzeti ölkədə baş verənləri araşdırıb.
Qəzet yazır ki, Ermənistanın ən varlı şəxslərindən hesab edilən Qaqik Çarukyanın varidatı 500 milyon dollardan çoxdur. Oliqarx həm də ölkənin ən iri müxalifət partiyası - "Çiçəklənən Ermənistan” partiyasının lideridir. Parlamentdə hakim “Mənim addmım” partiyasından sonra sayca ikinci deputat fraksiyasına malikdir. Nikol Paşinyanın "Mənim addımım” partiyası 88, Çarukyan 25 deputat mandatına malikdir. İyunun 14-də Milli Təhlükəsizlik Xidməti Çarukyana qarşı üç cinayət işinin qaldırılması barədə qərar qəbul edib. Müxalifətçini 2017-ci il parlament seçkiləri zamanı seçiciləri pulla ələ almaqda ittiham ediblər. İstintaqın versiyasına görə, Çarukyan etibarlı şəxsləri hesabına hər seçicinin səsini 1,4 min rubla alıb. Çarukyanın opponentləri sosial şəbəkədə yerləşdirdikləri sənədlərdə onun necə rüşvət payladığını nümayiş etdiriblər. Qarşı tərəf isə bu sənədlərdə nə imza, nə də möhür olduğunu bildirir. İkinci cinayət işi oyun biznesi ilə bağlıdır. İstintaq hesab edir ki, Çarukyanın şirkəti qanunvericiliyi pozub və dövlət büdcəsi də bundan 60 milyon dollar itirib. Üçüncü cinayət işi Kotayk vilayətində qanunsuz şəkildə torpaq sahələri ələ keçirməklə bağlıdır. Bundan isə 685 min dollar dövlətə ziyan vurulub. Oliqarx ona qarşı qaldırılan cinayət işini saxta adlandırıb. Ölkədə narazılıq durmadan artır, bəs hakimiyyət nə edir? Problemləri həll etmək əvəzinə, opponentlərini terrorla hədələyir.
Daha sonra qəzet yazır ki, müxalifət birləşəcəyi təqdirdə yeni inqilab baş verə bilər: “Ermənistanda yaxın vaxtlarda vəziyyət gərginləşə bilər. İndiyə qədər əvvəlki hakimiyyət və yeni müxalifət dil tapa bilmirdi. İndi isə birgə fəaliyyət barədə razılıq əldə edilə bilər. İstisna olunmur ki, etiraz aksiyalarının dalğası baş verə, yeni inqilablar təşkil edilməsi cəhdləri ola bilər”.
Göründüyü kimi, Rusiya mediası Paşinyana qarşı olmaqla yanaşı, ölkədə yeni inqilabın olacağına eyham vurur. Bu isə vəziyyətin kifayət qədər mürəkkəb olmasından xəbər verir.
Sözügedən məsələni baki-xeber.com-a şərh edən politoloq Məhəmməd Əsədullazadənin fikrincə, belə görünür ki, Ermənistanda Nikol Paşinyana qarşı formalaşmaqda olan müxalif cəbhə daha da genişlənəcək: “Bu ona qarşı ciddi siyasi problemlərə yol açacaq. Q. Çarukyanın Paşinyanın istefasını tələb etməsi ilə başlanan daxili etiraz əlbəttə ki, Rusiya tərəfindən idarə edilir. Bütün bunlarda məqsəd Paşinyanın hakimiyyətini zəiflətməkdir. Robert Köçəryanın həbsdən azad edilməsi və onun müxalif cameə ilə görüşləri yeni siyasi mərhələnin başlanğıcıdır. Bu isə ölkədə yeni siyasi böhranın olacağından xəbər verir. Hesab edirəm ki, Q.Çarukyanın siyasi proseslərdə aktivliyi fonunda onun Köçəryanla birləşib yeni müstəvidə proseslərdə birlikdə olması mümkündür. Çünki bütün siyasi müxalifət fikir ayrılıqlarına baxmayaraq, Paşinyana qarşı mübarizədə birlikdə irəliləyəcək. Hesab edirəm ki, Paşinyan birləşmiş müxalifətə qarşı öz real gücünü ortaya qoya bilməyəcək. Çünki vətəndaşların ona etimadı zəifləyib. Paşinyan ermənilər üçün populist bir lider kimi xarakterizə olunur. Ona görə də Köçəryan Çarukyan və digərləri birlikdə güc olub Paşinyanın devrilməsi üçün hərəkətə keçəcək. Payızda pandemiya səngisə, bu, Paşinyan üçün yeni siyasi böhran gətirəcək. Bunun başında Rusiyanın dəstək verdiyi qüvvələr olacaq”.
Görünən odur ki, Paşinyanın ətrafında çənbər daralır. Bu isə vəziyyətin çox çətin olacağından xəbər verir.
Vidadi ORDAHALLI
