Koronavirus pandemiyasının sürətlə yayıldığı Ermənistanda vəziyyət kritik həddə çatıb. Ermənistan mediası yazır ki, dünyada 1 milyon əhali arasında koronavirusdan orta hesabla 56,1, Ermənistanda 96 nəfər ölür. Ermənistan orta hesabla 1 milyon əhalinin koronavirusa yoluxma göstəricisinə görə Birləşmiş Ştatları belə üstələyib. 1 milyon nəfərin hesablanması ilə koronavirusa yoluxma göstəricisi ABŞ üçün 7328 nəfər, Ermənistan üçün 7329 nəfər təşkil edib.
Erməni mətbuatı yazır ki, bütün dünya koronavirusun yayılmasının qarşısını almaq üçün test keçirir, Ermənistan isə yoluxanların sağalmasını müəyyən etmək üçün testdən istifadə edir. Nəticə budur ki, 20 min yoluxmuş şəxs müəyyənləşdirilib, həmçinin, xəstə olduqlarını bilməyən, naməlum, daha çox yoluxmuş insan mövcuddur.
Baş nazir Nikol Paşinyan isə yenə də virusun sürətlə yayılmasında əhalini günahlandırıb: “Bütün bu səs-küydə iki faktor kulminasiya həddinə çatır, dominant bir amilə çevrilən maska, ikincisi isə sosial məsafədir. Bu bizim ən böyük problemimizdir. Bu cür toplanmış insanların şəkillərini görəndə öz-özümə soruşuram ki, bu insanların özlərini ölümə məhkum etmələrinə görə nəyi səhv etdim? Bugünkü rəqəmlər göstərir ki, bir nəfəri asimptomatik etmək üçün 15 nəfər toplaşıb. Məhəllə masasının ətrafında toplaşan 15 nəfər, xüsusən 55 yaşdan yuxarı olduqları üçün özlərini ölümə məhkum edirlər. Mən özümdən soruşuram ki, mən nə səhv etdim ki, bu insanlar belə davranırlar?”.
Ermənistanın keçmiş baş naziri Qrant Baqratyan isə istehza ilə bildirib ki, dünyanın malik olmadığı Baş nazirə sahibik: “Dürüst, düz, kəndin təmiz arx suyu kimi. Baş nazir bildirib ki, mayda, apreldə bağlanmış 71 min 471 iş yerindən 50 min 94-ü bərpa olunub. Bu bərpa prosesi davam edir. Adam nə deyir? Paşinyan nə biləydi ki, Statistika Xidməti 2020-ci ilin yanvar-apreli üçün 6.1% işsizlik enişini (dünya rekordudur) qeydə alıb. Paşinyan milləti qıraraq koronavirusa qarşı belə mübarizə aparır”.
Göründüyü kimi, koronavirusla bağlı ölkədə mövcud olan acınacaqlı vəziyyət daha da genişlənir. Paşinyan virusla mübarizədə aciz olduqlarını etiraf etmək əvəzinə, əhalini günahlandırır. Bu isə cəmiyyətdə aqressiya ilə qarşılanır.
“Məsələnin digər tərəfi Ermənistanın yoxsul ölkə olması ilə bağlıdır”
Məsələyə münasibət bildirən AMİP funksioneri Əli Orucovun sözlərinə görə, Ermənistanda koronavirus böhranı görünməmiş dərəcədə dərinləşir: “Ermənistan əhalisinin sayı 3 milyondur, amma hər milyon nəfərə yoluxmaya görə bu ölkə dünyada liderdir. Ən son məlumatlara görə, Ermənistanda koronavirusa yoluxanların sayı 24 min nəfəri keçib. Ölənlərin sayı 421 nəfərə çatıb. Qeyri-rəsmi məlumatlara görə, virusa yoluxanların sayı, əslində, daha çoxdur. Sadəcə, hakimiyyət bunu gizlədir. Faktiki olaraq, Paşinyan hökuməti virusdan qorunmaq işini təşkil edə bilmir. Bir sıra ölkələr kimi, Ermənistan da buna hazır deyildi. Ancaq belə acınacaqlı vəziyyətin yaranmasının başlıca səbəbi mövcud hakimiyyətin bacarıqsızlığıdır. Təsadüfi deyil ki, bununla bağlı Ermənistan cəmiyyətində Paşinyana yönəlik ittihamlar hər keçən gün daha da artır. Məsələnin digər tərəfi Ermənistanın yoxsul ölkə olması ilə bağlıdır. Epidemiyaya qarşı xüsusi tibbi avadanlıqlar, xəstələr üçün süni nəfəs aparatları az saydadır. Daha dəqiq desək, bununla bağlı hökumətin yetərli maliyyə imkanları yoxdur. Ən nəhayət, erməni cəmiyyəti virusdan qorunmaqla bağlı tövsiyələrə lazımi səviyyədə əməl etmir”.
Belə görünür ki, yaxın günlərdə Ermənistanda pandemiyanın daha geniş vüsət alacağı qaçılmazdır.
Vidadi ORDAHALLI
