12/07/2020 01:09
728 x 90

Prezident Ermənistan təcavüzünə qarşı mübarizədə gənclərimizə elmi-ideoloji hazırlıqlı olmağın yeni istiqamətini göstərdi - toponimləri öyrənin...

img

Prezident İlham Əliyev Müdafiə Nazirliyinin "N" saylı hərbi hissəsinin açılışında iştirak edərkən orduya çağırılan gənclərin ideoloji hazırlığına xüsusi önəmin verilməsi ilə bağlı öz təkilflərini səsləndirib:

“... mən sizə tapşırıram, bütün hərbi hissələrdə ideoloji vəziyyətə xüsusi əhəmiyyət verilməlidir. Ölkəmizin tarixi - həm qədim tarixi, həm də müasir tarixi ilə əlaqədar hər bir əsgərdə, zabitdə dolğun təəssürat olmalıdır. Çünki mən bunu dəfələrlə demişəm, əfsuslar olsun ki, biz real tariximizi bilməmişik. Günah da bizdə deyil, çünki belə oxumuşuq, bizə belə dərs veriblər. Sovet vaxtında tarix dərslərinin çoxu saxta idi. Azərbaycan xalqının düşmənləri qəhrəman kimi qələmə verilirdi. Quldur 26 Bakı komissarı dəstəsi qəhrəman kimi təqdim edilirdi. O dəstənin başında dayanan cinayətkar erməni millətçiləri qəhrəman kimi təqdim olunurdu. Onların adına rayonlar verilirdi, onlara abidələr qoyulurdu. Azərbaycan xalqının cəlladı Şaumyana abidə qoyulmuşdu, onun adı əbədiləşdirilmişdi. Biz bu tarixi görmüşük. Yenə də günah bizdə deyil. Sovet hakimiyyətinin tarixi bu idi. Müstəqilliyi quranlar düşmən kimi qələmə verilirdi. Azərbaycan Xalq Cümhuriyyəti antimilli qurum kimi qələmə verilirdi. Ancaq bizim müstəqilliyimizi əlimizdən alanlar, yerli satqınlar qəhrəman kimi qələmə verilirdi. Küçələrə onların adları verilir, onlara abidələr, monumentlər qoyulurdu. Bəlkə də yaddan çıxıb, Sahil bağında 26 Bakı komissarlarına abidə qoyulmuşdu. Mən fikirləşdim ki, bu nə məsələdir. Bunlar Azərbaycan xalqının qanını axıdıblar, bizi məhv ediblər. Heç şəhərin mərkəzində belə abidəmi olar? O abidə də, o quldur dəstəsinin üzvlərinin abidələri də söküldü və düz də etmişəm. Bütün dini ayinləri gözləmək şərti ilə onların qəbirləri oradan köçürüldü. Ancaq bu dözülməz idi ki, şəhərimizin mərkəzində Azərbaycan xalqının düşmənlərinə abidə ucaldılıb.

Ona görə mən deyirəm, bizim gənclər bu tarixi bilməlidirlər, qədim tariximizi bilməlidirlər. Bilməlidirlər ki, bugünkü Ermənistan Azərbaycan torpaqlarında formalaşıb, bugünkü Ermənistan xəritəsində coğrafi toponimlərin əsl adlarını bilməlidirlər. Mən gedirəm, haradasa xəritədə sonra dəyişdirilmiş erməni adlarını görürəm. Bütün yerli icra orqanlarına irad tuturam ki, bilmirsiniz, gedin soruşun. Fikirləşin nə yazırsınız, axı bunun qədim Azərbaycan adı var. Bu bizim torpağımızdır. Ona görə bu sahəyə xüsusi diqqət göstərməliyik. Orduda xidmət edən hər bir gənc tərxis olunandan, mülki həyata qayıdandan sonra öz tarixini olduğu kimi bilməlidir”.

Prezidentin çıxışında diqqət çəkən vacib məqamlardan biri gənclərə bugünkü Ermənistan xəritəsində coğrafi toponimlərin əsl adlarının öyrədilməsi ilə bağlı verdiyi tövsiyyə oldu. Bu istiqamətdə maarifləndirmə hansı istiqamətlərdə aparılmalıdır?

  • “Adların qədim toponimlərlə çəkilməsi sözügedən ərazilərin bizə məxsus olduğunu sübut edən ən vacib dəlildir”

İndiki Ermənistanın formalaşdığı tarixi Azərbaycan topraqlarında doğulan və böyüyüb boya-başa çatan Beynəlxalq Diaspor Mərkəzinin rəhbəri İsmayıl Ağayev “Bakı-Xəbər”ə açıqlamasında bildirdi ki, ölkə başçısı olduqca vacib olan aspektə toxunub:“Əslən həmin torpaqlardan olan vətəndaşlarımız danışanda, ora ilə bağlı xatirələrini bölüşəndə heç vaxt, hətta Ermənistan SSR dönəmində qoyulan adları çəkmirlər. Siz həmin sadə adamların dilindən:  Dərələyəz, Göyçə, Qaraqoyunlu, Ağababa, Basarkeçər və s. kimi yer adlarının çəkildiyini  eşidə bilərsiniz. Bu nəyə dəlalət edir? Həmin ərazilər zorla ermənilərə verilsə də, xalqımız həmin acı reallıqları qəbul etmirdi. Adların qədim toponimlərlə çəkilməsi sözügedən ərazilərin bizə məxsus olduğunu sübut edən ən vacib dəlildir. Ancaq təəssüflə qeyd etməliyik ki, bizdə bu nüanslara son vaxtlar az fikir verilirdi. Bəzən xəbərlərin təqdimatında və ya tədris üçün nəzərdə tutulan əyani vəsaitlərdə biz adların ermənilərin dəyişdirdiyi kimi təqdim edildiyinin şahidi olurduq. Prezident iştirak etdiyi bəzi tədbirlərdə bununla bağlı məmurlara kəskin iradını da bildirib. Xüsusilə də xəritələrdə qeyd edilən adların düzgün yazılmadığını bildirib. Deməli, biz gənclərimizə bu toponimlərin düzgün adını hələ tədris zamanından öyrətməliyik. Bu da orta məktəbdən tutmuş, orta təhsil müəssisələrinə kimi davam etməlidir. Gənc hərbi xidmətə hazır getməlidir. Orda da həmin biliklərini bir qədər təkmilləşdirməlidir. Ən əsası da, bunun üçün yazılan kitablarda, hazırlanan xəritələrdə belə yanlışlıqlara yol verilməməlidir. Yol verilmiş səhvlər isə düzəldilməlidir”.

Birmənalı şəkildə belə nəticəyə gəlinir ki, bu istiqamətdə kompleks işin aparılmasına zərurət var. Xüsusilə də tədrislə məşğul olan qurumlar ölkə başçısının qaldırdığı məsələnin həyata keçməsi üçün üzərlərinə düşən lazımi addımları atmalıdırlar.

Məhəmmədəli QƏRİBLİ

 

 

Son xəbərlər