Prezident İlham Əliyev Müdafiə Nazirliyinin "N" saylı hərbi hissəsinin açılışında 1992-ci ilin mayında Şuşa və Laçının işğal edilməsi, Xalq Cəbhəsi dəstələrinin qanunsuz yollarla hakimiyyətə gəlməsi və indiki radikal dairələrin neftin qiymətinin kəskin ucuzlaşmasından məmnunluq keçirməsinə münasibət bildirib:
"…Ondan sonra nə etdilər? Ondan sonra ölkəmizi dağıtmağa başladılar. İşğal edilmiş torpaqlar qaldı bir yana, onlar isə talançılıqla, rüşvətxorluqla, oğurluqla məşğul idilər, kabelləri kəsib satırdılar. Kütləvi talançılıq baş alıb gedirdi. Nəticədə bir tərəfdən xalq buna dözmədi, digər tərəfdən 1993-cü ilin aprelində Ermənistan Kəlbəcəri işğal etmişdi. Qanunsuz yollarla hakimiyyətə gəlmiş həmin xəyanətkar Azərbaycan Xalq Cəbhəsi hakimiyyəti Kəlbəcəri Ermənistana təhvil verdi və ondan sonra Ermənistanla Dağlıq Qarabağ arasında coğrafi bağlantı yarandı. Artıq gediş-gəliş və silah-sursat, texnika və təchizat başlamışdı. Ondan sonra nə etdilər? Torpaqları müdafiə etmək əvəzinə qardaş qanını axıtdılar, vətəndaş müharibəsini başlatdılar, Gəncəni bombaladılar. Azərbaycan əsgərlərini əsir götürmüşdülər. Orada torpaqlar əldən gedir, burada bir-birini qırırlar ki, hakimiyyətə gəlsinlər. Məhz bunun nəticəsində torpaqlarımız işğal altına düşdü. Əgər Heydər Əliyev hakimiyyətə gəlməsəydi, bilmək olmur Ermənistan hələ haraya qədər gəlib çıxa bilərdi”.
Ölkə başçısı Azərbaycanın ağır gününə sevinən radikal dairələrə də öz mesajını verib:“Mən demişəm ki, Azərbaycanda nə qədər pis olsa, onlar üçün o qədər yaxşıdır. Görün, nəyə sevinirlər! Sevinirlər ki, neftin qiyməti 14 dollara düşüb. Buna kim sevinir? Bir Ermənistan, bir də özünü müxalifət adlandıran bu antimilli şura. Neftin qiyməti 14 dollara düşəndə, axı insanlar bundan əziyyət çəkəcək, problemlər yaranacaq, sosial sahədə problemlər yaşana bilər, iqtisadiyyatımız yavaşıyar. Amma bu onların işinə yarayır, Azərbaycan üçün nə qədər pisdir, onlar üçün o qədər yaxşıdır. Bax, onlar o vaxt da bu prinsiplə yaşayırdılar. Ona görə torpaqlarımızı əldən verdilər. Dövlət katibi o vaxt prezidentlə bir yerdə fərarilik edib. O da getdi gizləndi Kələkidə. Parlamentin sədri fərarilik etdi. Onlar fəraridirlər, satqındırlar, xaindirlər. Hər kəs bunu bilməlidir, heç kim bunu unutmamalıdır".
Göründüyü kimi, ölkə başçısı Azərbaycanın əsas gəlir mənbəyi olan neftin qiymətinin dünya bazarında aşağı enməsindən sevinc hissi keçirən radikal müxalifəti kəskin tənqid edib. Maraqlıdır, radikallar bu amillə bağlı niyə sevinirlər? Neftin qiymətinin kəskin düşməsi, uzun müddət aşağı səviyyədə qalması ilə bağlı onlar əllərinə hansı şansların düşə biləcəyinə ümid edirlər və həmin planların özünü doğrulda biləcəyi nə dərəcədə inandırıcı sayıla bilər?
Azərbaycan Sosialist Partiyasının sədri Elşən Həsənov “Bakı-Xəbər”ə bildirdi ki, Milli Şuranın hər videokonfransında bir daha özləri özlərini ifşa edərək göstərirlər ki, onlara nə Azərbaycan xalqı, nə Azərbaycanın inkişafı maraqlıdır:“Koronavirus pandemiyası dövründə enerji bazarında kəskin dalğalanmaların nəticəsində neftin qiymətinin ciddi şəkildə aşağı düşməsi bunlarda sanki bir toy-bayrama çevrilib. Videokonfransda hətta onlar çəkinmədən Azərbaycan neftinin qiymətinin düşməsinə görə bir-birini təbrik edirlər. Azərbaycana neftdən gələn gəlirlər insanların sosial problemlərinin həllinə, sosial müdafiəsinin gücləndirilməsinə yönəlir. Belə çıxır ki, onların hədəfi Azərbaycan xalqının yaşayış səviyyəsinin pisləşməsi üzərindən nəticəyə yönəlib. Bu düzgün siyasi taktika deyil. Bunlar düşünür ki, xalqın vəziyyəti pisləşdikcə onların tərəfdarlarının sayı artacaq. Qətiyyən bu iddianı bölüşmürəm. Uzun müddət bu qüvvələr siyasi səhnədə irəliləyiş əldə edə bilməyiblərsə, deməli, günahı özlərində axtarmalıdırlar. Məhz bu qüvvələr aparıcı ölkələri Azərbaycana sanksiya tətbiqinə çağırırlar. Onda nə olacaq? Axı sanksiyaların tətbiqi də hakimiyyətə deyil, ilk növbədə dövlətə və ölkənin vətəndaşlarına zərbə vurur. Tutaq ki, onların arzusu reallaşdı və Azərbaycana qarşı "Maqnitski aktı"na bənzər sanksiyalar tətbiq edildi. Belə sanksiyalarla hakimiyyət dəyişəcəkmi? Əlbəttə yox. Necə illərdir ABŞ-ın, Qərbin sanksiyalarına məruz qalan hansı ölkədə hakimiyyət dəyişib? Heç birində... Rusiya, İran, Belarus, Suriya və sair buna əyani misallardır. Uduzan kim olacaq? Təbii ki, Azərbaycan dövləti və Azərbaycan xalqı”.
Göründüyü kimi, bəzi radikalların Azərbaycan dövlətinin milli maraqları ilə bağlı olan hər hansı müvəqqəti uğursuzluğa sevinmələri bütün dairələr tərəfindən mənfi qarşılanır. Hətta siyasi təsisatların belə buna etirazı onların səhv yolda olmalarını deməyə tam əsas verir.
Məhəmmədəli QƏRİBLİ
