12/07/2020 01:37
728 x 90

Erməni prezidentləri rüşvətxor, generalları oğru, qəhrəmanları canidir – Faktlar Prezidentin dediklərini təsdiqləyir

Elşən Manafov: “Aprel döyüşlərindən sonra Ermənistan ordusunda çoxsaylı korrupsiyanın olması ortaya çıxdı”

img

Prezident İlham Əliyev Müdafiə Nazirliyinin "N" saylı hərbi hissəsinin açılışında iştirak edərkən bildirib ki, Ermənistanın prezidentləri rüşvətxor, generalları oğru, qəhrəmanları cinayətkardır:

“Ermənistan artıq bir neçə ildir ki, dərin böhran içindədir. Deyə bilərəm ki, Ermənistanın müstəqillik tarixi, prinsipcə, rüsvayçılıq tarixidir. Çünki indiki iqtidar artıq dəfələrlə bəyan və sübut edib ki, 1998-ci ildən 2018-ci ilə qədər Ermənistana rəhbərlik etmiş şəxslər cinayətkardır, oğrudur, quldurdur. Onların bir çoxu həbs edilib. Məlum olub ki, onların generalları oğrudur, əsgər tuşonkasını oğurlayıb, sonra bazarlarda satdırırdılar. Onların qəhrəmanları cinayətkardır, onların prezidentləri rüşvətxordur. İndiki hakimiyyət bunları açdı-tökdü. Onsuz da biz bunu bilirdik, indi bütün dünya bunu bilir”.

Ölkə başçısının fikrincə, belə çıxır ki, 20 il ərzində bu dırnaqarası müstəqil ölkəyə quldur, rüşvətxor və cinayətkarlar rəhbərlik edib: “Bu ölkəyə nə ad vermək olar? Hələ 30 il yoxdur, guya müstəqil ölkə kimi yaşayır, əgər 20 il quldurlar rəhbərlik edibsə, nə ad vermək olar - quldur ölkəsi, cinayətkar ölkəsi. Yaxşı, baxaq görək, 2018-ci ildən bu yana nə baş verib. Guya orada demokratik inqilab olub. Hamısı yalandır. O pullar oraya haradan axıdılıb, biz bunu bilirik, yəqin ki, erməni xalqı da bilir”.

Bütün bu deyilənlərin fonunda, Ermənistan prezidentlərinin rüşvətxor, generallarının oğru, qəhrəmanlarının cinayətkar olması ilə bağlı Prezidentin səsləndirdiyi fikirlər nə deməkdir? Sözügedən məqamlarla bağlı hansı faktlar var?

  • “Manvel Qriqoryan, Samvel Babayan və digərləri cinayətkar əməlləri ilə xüsusilə fərqləniblər”

Məsələyə münasibət bildirən politoloq Elşən Manafovun sözlərinə görə, Prezidentin sözügedən məsələ ilə bağlı səsləndirdiyi fikirlər reallığı əks etdirir və bununla bağlı çoxsaylı fakt var: “İlk növbədə, Prezident Ermənistan hakimiyyətinin ötən müddət ərzində həyata keçirdiyi siyasətin ölkədə doğurmuş olduğu sosial-iqtisadi reallıqları nəzərə alır. Paşinyan hakimiyyətə gəldiyi vaxt əsas vədi korrupsiyaya qarşı mübarizə aparacağı ilə bağlı idi. Ancaq məlum oldu ki, Paşinyan və ailəsi qanunsuz siqaret, brilyant, silah alveri ilə məşğuldur. Kanadada 3 milyon dollara villa alması ortaya çıxdı. Ermənistan hakimiyyəti hansı mənbələr hesabına bu villanı almasına aydınlıq gətirə bilmədi. Paşinyandan əvvəl ölkəyə rəhbərlik edən Robert Köçəryan və Serj Sarkisyan da korrupsiya içində olublar. Ölkədə az-çox gəlirli olan sahələr bunlara işləyib. Dağlıq Qarabağ ətrafında rayonlar işğal ediləndən sonra yaşayış məntəqələri talan edilib. Bilavasitə bundan əldə olunan gəlirlərin əsas hissəsi Robert Köçəryana çatdı. Deməyim odur ki, bunların həm də cinayətkar keçmişi var. Xocalı şəhərinə hücumda və orada soyqırımın həyata keçirilməsində Serj Sarkisyan iştirak edib. Digər tərəfdən, 2016-cı ilin Aprel döyüşlərindən sonra Ermənistan ordusunda çoxsaylı korrupsiyanın olması ortaya çıxdı. Döyüşlərdən sonra Ermənistan ordusunda korrupsiya faktı aşkarlandı. Ermənistanın müdafiə nazirini istefaya göndərdilər. Məlum oldu ki, erməni generalları əsgərin zəruri qida vasitələrini oğurlayıblar. Bununla yanaşı, bir müddət Ermənistanı KTMT-də təmsil edən Xaçaturov korrupsiyada ittiham olunur. O ki, qaldı erməni “qəhrəmanları”nın cinayətləri ilə bağlı məsələlərə, Ermənistan hakimiyyətinin mahiyyəti dəyişməyib. Bununla bağlı çoxsaylı fakt var. Qarabağda soydaşlarımıza qarşı çoxsaylı hərbi cinayət törədərək “Artsax qəhrəmanı” adı almış general Manvel Qriqoryan, Samvel Babayan və digərləri cinayətkar əməlləri ilə xüsusilə fərqləniblər. M.Qriqoryan hərbi əsirlərə işgəncələrin verilməsi, kütləvi qətlə yetirilməsi, həmçinin, mülki şəxslərin girov götürülməsi, işgəncələrə məruz qoyulması və öldürülməsi kimi çoxsaylı hərbi cinayətin törədilməsində iştrak edib. O, 2014-cü ildə "Azadlıq" radiosunun erməni bürosuna verdiyi müsahibəsində Qarabağ döyüşlərindən yüzlərlə azərbaycanlı əsir və girovla geri qayıtdığını və hətta onları şəxsi evində işlətdiyini açıq şəkildə etiraf edib. M.Qriqoryan onunla hesablaşmayan erməniləri belə cinayət yolu ilə aradan götürüb. Qarabağda çoxsaylı hərbi cinayət törətmiş odioz səhra komandirlərindən biri də general Samvel Babayan olub”.

Belə aydın olur ki, Ermənistanda “qəhrəman” kimi ad çıxaranların çoxu, əslində, cani, insan qatili olub.

Vidadi ORDAHALLI

Son xəbərlər