Ermənistan mediasında yenə də Dağlıq Qarabağ münaqişəsinin həlli ilə bağlı reallığa söykənməyən iddialar yer almaqdadır. Yenə də, ənənəvi olaraq, belə illüziyalarla çıxış edirlər ki, guya Azərbaycanın danışıqlarda sərgilədiyi barışmaz mövqe üzündən nəticə əldə olunmur. İddia olunur ki, guya 2016-cı ilin 4 aprelində Ermənistan ordusu əks-hücuma keçərək Qarabağda itirilən mövqeləri geri qaytarmaq əzmində olub, amma Rusiya vasitəçilik edərək buna imkan verməyib.
Münaqişənin güc yolu ilə həlli ilə bağlı səslənən fikirlərdən narahat olan ermənilər Baş nazir Nikol Paşinyanın bu günlərdə təhlükəsizlik şurasının iclasında səsləndirdiyi fikirlərdən yapışaraq özlərinə təsəlli verirlər. Həmin iclasda Paşinyan bəyan edib ki, Azərbaycan bu dəfə münaqişənin həlli ilə bağlı güc yoluna əl atsa, hərbi münaqişə Azərbaycanın dövlətçiliyinin itirilməsi ilə nəticələnə bilər və bu qaçılmaz olacaq: “Güc tətbiqi nəticəsiz qalmayacaq və ona cavab hər zaman həm hərbi, həm də siyasi baxımdan adekvat olacaq”.
Paşinyanın sözügedən fikirlərinə əsaslanaraq, illüziyaya qapılaraq yazırlar ki, 20-ci əsrdə Azərbaycan 2 dəfə dövlətçiliyini itirmək təhlükəsindən xilas olub. Bunlardan biri 1920-ci ilin aprelində olub. İkincisi isə 1993-cü ilin iyununda yaşanıb. Guya Azərbaycan bu dəfə hücuma keçsə, dövlətçiliyini itirməsi qaçılmaz olacaq.
Belə görünür ki, Paşinyan bir müddət jurnalistika ilə məşğul olsa da, tarixi dərindən bilmir. Hər zamankı kimi, populist tərzdə uğursuz müqayisələr aparır. Ən azından, ona görə ki, sözügedən tarixi dövrlərlə müqayisə aparmağın özü belə yanlışdır. Çünki Azərbaycan nə 1920-ci ildəki Azərbaycandır, nə də 1993-cü ildəki.
“Bütün bunları Paşinyan görmürsə və ya görmək istəmirsə, deməli, o, reallıq hissini tamamilə itirib”
Məsələyə münasibət bildirən siyasi ekspert Ramil Hüseynovun sözlərinə görə, Paşinyan ağlagəlməz uğursuz müqayisələr aparır: “Məsələ ondadır ki, 1920-ci və 1993-cü illərdə mövcud olan tarixi situasiyaları indiki dövrlə müqayisə etmək ağılsızlıqdır. 1920-ci ilin aprelində Azərbaycan bolşevik Rusiyasının işğalına məruz qaldı. Bundan 2 ay əvvəl Azərbaycanın müstəqilliyi Versalda dünya dövlətləri tərəfindən tanındı. 23 aylıq Azərbaycan Demokratik Respublikasının mövcud olması bizə imkan verdi ki, sonrakı dövrdə SSRİ tərkibində mövcud olan 15 respublikadan biri olaq. ADR olmasaydı, Azərbaycan Rusiyanın federal subyektlərindən biri olardı. 1993-cü ildə isə SSRİ dağılmışdı. Bir sıra keçmiş ittifaq ölkələrində etnik münaqişə var idi. Ermənilər yaranan vəziyyətdən istifadə edərək, Rusiyanın yardımı ilə Azərbaycanın 20 faiz ərazisini işğal etdilər. Yaranan ən çətin situasiyaya rəğmən, Azərbaycan öz dövlətçiliyini itirmədi. Rusiya qoşunlarının yenidən ölkəyə qayıtmasına imkan verilmədi. Neft kontraktları imzalandı və s. Belə olan halda, hazırkı dövrdə müharibənin başlayacağı təqdirdə Azərbaycanın dövlətçiliyini itirəcəyini demək, sadəcə, ağılsızlıqdır. Çünki Azərbaycanın müqayisəolunmaz dərəcədə güclənməsi danılmaz faktdır. Bütün bunları Paşinyan görmürsə və ya görmək istəmirsə, deməli, o, reallıq hissini tamamilə itirib. Bu dəfə Azərbaycan müharibəyə başlasa, Ermənistanın itirdikləri 2016-ci ilin apreli ilə müqayisəolunmaz dərəcədə böyük olacaq. Bu zaman Azərbaycan yox, məhz Ermənistan öz dövlətçiliyini itirə bilər. Zatən, hazırkı Ermənistanın müstəqil olması mübahisəlidir”.
Görünən odur ki, populizmə qapılan Paşinyan Azərbaycanın yenidən müharibəyə başlamasından o qədər çəkinir ki, Ermənistanı qorumaqdan ötrü ağlagəlməz fikirlərlə çıxış edir.
Vidadi ORDAHALLI
