Artıq Qərb mətbuatı da Paşinyan rejiminin əsl mahiyyətini ifşa etməyə başlayıb. Belə ki, İtaliyanın “L’Opinione” qəzetində “Ermənistan: şübhəli demokratiya və Vatikandakı Ermənistan səfirliyinin sirri” sərlövhəli məqalə dərc edilib.
Məqalədə son dövrdə Ermənistanda baş verən mürəkkəb daxili siyasi proseslər, baş nazir Nikol Paşinyanın hakimiyyətin mənimsənilməsi istiqamətində atdığı addımlar, təhlükəsizlik qurumlarının rəhbərlərinin son istefaları, konstitusiyaya son mübahisəli dəyişikliklərin qəbulu, hakim rejimin siyasi opponentlərə qarşı həyata keçirdiyi təqiblər, Ermənistanın ikinci və üçüncü prezidentləri və onların ailə üzvlərinin, o cümlədən sabiq prezident Serj Sarkisyanın kürəkəni, Ermənistanın Vatikandakı sabiq səfirinə qarşı açılmış istintaq işləri, müxalifət tərəfindən baş nazir və həyat yoldaşına qarşı qeyri-qanuni iqtisadi fəaliyyətlə bağlı irəli sürülən ittihamlar, hökumətin yarıtmaz fəaliyyətinin Ermənistanda ağır sosial-iqtisadi vəziyyətə, pandemiyanın ağır nəticələrinə gətirib çıxarması və bu məsələlərə münasibətdə beynəlxalq reaksiyalar barədə danışılıb.
Qeyd olunub ki, “məxməri inqilabdan” sonra Paşinyanın ölkədə həqiqi demokratiyanı bərqərar edəcəyinə olan ümidlər özünü doğrultmadı: “2018-ci ilin yazında məxməri inqilaba rəhbərlik edərək hərbi-xunta rejimini devirməklə beynəlxalq mətbuatda məşhurlaşan N.Paşinyan ölkədə həqiqi demokratiyanı bərqərar edəcəyi ilə bağlı beynəlxalq ictimaiyyətdə gözləntilər yaradıb. Lakin 2018-ci ilin dekabrında keçirilən parlament seçkilərindən sonra baş nazir kimi atdığı ilk addımlardan biri siyasi rəqiblərinə qarşı genişmiqyaslı təqiblərin başlanması olub. Hazırda Cənubi Qafqaz regionunda koronavirus pandemiyası ilə bağlı ən pis vəziyyət Ermənistanda hökm sürür”.
Görünən odur ki, artıq Qərb mətbuatı da Paşinyanın əsl simasını ifşa etməkdədir. Bu isə onu göstərir ki, Paşinyan Qərbdəki dayaqlarını da itirməkdədir.
“Bu isə ona göstərilən dəstəyin dayandırılacağından xəbər verir”
Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, artıq Qərb Paşinyanın bir naşı siyasi fiqur olduğunu dərk etməkdədir: “O ümumiyyətlə, siyasətçi hesab oluna bilməz. Ən azından ona görə ki, onun dövlət idarəçiliyi sahəsində təcrübəsi yoxdur. O naşı siyasətçi olmaqla yanaşı, həm də qeyri-ciddi xarakterə malik bir şəxsdir. Qərb ölkələrində Paşinyana olan inamsızlıq artıq mətbuatda da özünü göstərməkdədir. Bunun nəticəsidir ki, İtaliya mətbuatında onun ötən iki ildəki uğursuz idarəçiliyi ilə bağlı geniş yazı dərc olubub. Bu əslində ona işarədir ki, artıq Qərb Paşinyana olan dəstəyinə yenidən baxmaq istəyir. Bu isə ona göstərilən dəstəyin dayandırılacağından xəbər verir. Nəticədə bütün bunlar Paşinyanın sonunu yaxınlaşdırır. Nəzərə almaq lazımdır ki, Qərbin Paşinyana bəslədiyi ümidlər özünü doğrultmadı. Belə olan halda əlbəttə ki, Paşinyanın tənqid hədəinə çevrilməsi gözlənilən idi”.
Qərb mətbuatında Paşinyanla bağlı tənqidi yazıların bundan sonra daha da artacağı gözlənilir. Çünki onun son aylar artan anti-demokratik idarəçilik fəaliyyəti baş nazirə qarşı güclü anti-patiya yaradıb.
Vidadi ORDAHALLI
