Azərbaycan mediası dövrün çağırışlarına uyğun inkişaf etdikcə, öz fəaliyyət istiqamətlərini daha da genişləndirə və beynəlxalq aləmə çıxa bilir.
Məlum olduğu kimi, Fransada “Trend” Beynəlxalq İnformasiya Agentliyinin (BİA) media layihəsi, lagazetteaz.fr onlayn qəzeti işə başlayıb.
Bu, Parisdə ofisi olan ilk Azərbaycan informasiya resursudur və Avropa istiqamətində media əlaqənin inkişafına, eləcə də Avropa ölkələrinin cəmiyyətləri səviyyəsində Azərbaycan barədə obyektiv reallıqların qavranmasının formalaşdırılmasına yönəlmiş pilot layihə olacaq.
Layihənin açılışını şərh edən Milli Məclisin deputatı, “Trend” BİA-nın baş direktorunun müavini Sevil Mikayılova bu hadisənin xüsusi əhəmiyyətini vurğulayıb:“Trend” BİA-nın təşəbbüsü olan yeni informasiya layihəsini yalnız alqışlamaq olar. Parisdə bu cür media resursun açılması və işləməsi bir çox məqamlara görə vacib əhəmiyyət daşıyır: ilk növbədə, bu, Fransa və digər fransızdilli ölkələrin cəmiyyətlərinin Azərbaycanda və ümumilikdə, regionda baş verən hadisələr barədə məlumatlandırılması baxımından aktualdır. Məsələn, Fransada ölkəmizin daxili və xarici siyasəti, Ermənistan-Azərbaycan Dağlıq Qarabağ münaqişəsinin reallıqları barədə dürüst və təhrifsiz informasiyanın böyük çatışmazlığı müşahidə olunur. Bundan başqa, layihə Azərbaycan-Fransa iqtisadi münasibətlərinin, mədəniyyət, elm, təhsil sahələrində əməkdaşlığın inkişafı kontekstində vacib əhəmiyyət daşıyacaq. Faydalı və aktual informasiyanın etibarlı mənbələrinin sayının artması siyasətçi və iş adamlarına, elm və mədəniyyət xadimlərinə ölkələrimizin və xalqlarımızın yaxınlaşması maraqlarına cavab verən düzgün qərarların qəbul olunmasına imkan verəcək.
Azərbaycan Beynəlxalq Frankofoniya Təşkilatının üzvü olan Afrika və Asiya ölkələrində bir sıra humanitar layihələr reallaşdırır, ona görə də bu ölkələrin auditoriyaları üçün də Azərbaycanda və regionda baş verən hadisələr barədə ilkin mənbədən məlumat əldə etmələri faydalı olacaq.
Qəzet Fransa və Azərbaycanın siyasi, iqtisadi, mədəni, sosial həyatının geniş spektri üzrə müxtəlif nəzər nöqtələrinin təqdim olunmasına açıq olacaq”.
“Trend” BİA gələcəkdə Parisdəki ofisin iş miqyasını böyütməyi, Azərbaycanın onlayn nəşrinin tematik şəbəkəsini genişləndirməyi, lagazetteaz.fr bazasında yeni multimedia məhsulları təklif etməyi planlaşdırır. Bu, Azərbaycan resursuna Fransanın informasiya məkanında öz yerini tutmağa imkan verəcək.
“Dünyanın aparıcı ölkələrində azərbaycanlıların idarəsində olan KİV qurumları barədə danışanda...”
Azərbaycanın beynəlxaq müstəviyə çıxan ilk onlayn qəzeti haqqında fikir bildirən JuHİ sədri, Azərbaycan Mətbuat Şurasının sədr müavini, tanınmış media eksperti Müşfiq Ələsgərli “Bakı-Xəbər”ə bunun əhəmiyyətini vurğuladı: “Öncə “Trend” İnformasiya Agentliyinin rəhbərliyini və orada çalışan peşəkar həmkarlarımızı təbrik edirəm. Böyük uğurdur və Azərbaycanımız üçün çox faydalıdır. Dünyanın aparıcı ölkələrində soydaşlarımıza məxsus, onların idarəçiliyi ilə fəaliyyət göstərən KİV qurumlarının olması çox vacibdir. Bunun əhəmiyyəti barədə hər kəs bilir. Bu barədə həmişə danışmışıq, amma təəssüf ki, əhəmiyyətli nəticə əldə etmək mümkün olmayıb. Dünyanın aparıcı ölkələrində azərbaycanlıların idarəsində olan KİV qurumları barədə danışanda, adətən, fikrimiz 3 istiqamətə gedir: belə KİV qurumları ya yoxdurlar, ya olsalar da, məşhur deyillər, simvolik fəaliyyət göstərirlər. Mövcud olub məşhurlaşanlar da Azərbaycanın əleyhinə fəaliyyət göstərirlər. Azərbaycan dövləti, xalqı üçün xaricdə sistemli iş aparan KİV qurumu yox səviyyəsindədir. Bu streotipləri dağıtmaq üçün planlı iş qurmaq, iradə, güc, əmək sərf etmək lazımdır. “Trend” məşhur, güclü, peşəkar komandaya malik KİV qurumudur. Dünyanın məşhur dillərində məlumat hazırlayıb yaymaq təcrübəsi var. Uzun illərdir bu yöndə fəaliyyət göstərir. Fəaliyyəti peşəkarlıq üzərində qurulub. İnanırıq ki, onun təşəbbüsü ilə qurulan lagazetteaz.fr də keyfiyyətli, peşəkar KİV qurumu kimi məşhurlaşa biləcək”.
İradə SARIYEVA
