Ermənistanın “Qraparak” qəzeti yazır ki, “Çiçəklənən Ermənistan” müxalif partiyasının sədri Qagik Çarukyanı parlament toxunulmazlığından məhrum etmək fikri əvvəlcə qeyri-real görünürdü, hətta ittihamçı prokuror da səbəblərin zəif olduğunu bildirmişdi. Bununla yanaşı, Baş prokuror işi bağlayıb və parlamentə təqdim edib.
Qəzet yazır ki, paralel olaraq, Paşinyanın “Mənim addımım” fraksiyasının rəhbərliyi Çarukyanın fraksiyasının “üsyankar” üzvləri haqda “material” toplamaq üçün tapşırıq verib. Keçmişinə, şəxsi həyatına, otel biznesinə, qohumlarından “yeyilən” qrantlara, ləğv olunan şirkətlərə qədər informasiyalar “əldə edilib”. Bir çox müxalifətçi haqda dəlil tapa bilməyiblər, ancaq onları mandatlarından məhrum etməklə hədələyiblər. Çarukyanın həbsi ilə bağlı tələb rədd edildikdən sonra “Mənim addımım” blokunun dar bir dairədəki nümayəndələri Konstitusiya Məhkəməsi məsələsində qeyri-konstitusiya səsverməsi və bundan sonrakı məsuliyyət barədə narahatlıqlarını ifadə edirlər.
Qəzüt yazır ki, diqqətçəkən məqam odur ki, “Mənim addımım” blokunun bir çox görkəmli nümayəndəsi Nikol Paşinyanın müdafiəsi üçün “Facebook”dakı kampaniyalarda iştirak etmir, səhifələrində heç nə yazmırlar. Hansı ki, bundan əvvəl onun tərəfdarları sosial şəbəkədə xüsusi fəallıq göstərirdilər.
Məlum olur ki, Paşinyanın “Mənim addımım” fraksiyasının üzvləri artıq onu müdafiə etmir və yaxud da bunda həvəsli deyillər. Bu tendensiya bir sıra sahələrə sirayət etdiyi kimi, artıq sosial şəbəkələrdə də özünü göstərir.
Maraqlıdır, ümumilikdə, bu nəyin göstəricisidir?
“Ən ciddi siqnal odur ki, onun sosial şəbəkədəki tərəfdarları artıq onu müdafiə etmirlər”
Məsələyə münasibət bildirən millət vəkili Elman Nəsirovun sözlərinə görə, belə vəziyyətin yaranması iki il əvvəlki dövrlə müqayisədə Paşinyanın reytinqinin kəskin şəkildə aşağı düşməsi ilə əlaqədardır: “Onun reytinqi heç vaxt olmadığı qədər düşməyə başlayıb. Ölkədə pandemiya böhranı Ermənistanda siyasi kataklizmləri tətikləyir. Ermənistan hər gün daha çox növbəti inqilaba yaxınlaşır. Ölkədə siyasi böhranı yaradan isə Paşinyanın yeritdiyi yarıtmaz siyasətdir. Erməni cəmiyyəti artıq görür ki, Paşinyan heç də demokrat deyil. O, demokrat libasında əsl diktatordur və siyasi opponentlərini bir-bir zorakı yolla səhnədən uzaqlaşdırır. Daha sonra onları həbsxanaya yollayır. İş o yerə gəlib çatıb ki, parlamentdəki çoxluqdan istifadə edərək əsas siyasi rəqibi Çarukyana qarşı da çox ciddi təzyiqlərə başladı. Onun deputat toxunulmazlığını ləğv etdi və indi də həbsi ilə bağlı konkret addımlar atır. Sözün həqiqi mənasında, bütün siyasi opponentlərini həbslə hədələyir. Ancaq onun imkanları və potensialı getdikcə tükənməkdədir. Xüsusilə də keçmiş prezident Robert Köçəryanın girov müqabilində azadlığa çıxması ona böyük zərbədir. İndi də parlamentdəki çoxluqdan istifadə edib Konstitusiyanı dəyişməklə bağlı addımlar atır. Ancaq bunun da səmərəsi yoxdur. İndi Ermənistanda bir sıra oriyentasiyalı siyasi qüvvələrin bəzi hallarda baxışları üst-üstə düşməsə də, Paşinyana qarşı mübarizədə birləşirlər”.
E. Nəsirovun fikrincə, bütün bu proseslərin fərqində olan Paşinyanın tərəfdarları sosial şəbəkələrdə onu müdafiə etməkdən qaçırlar: “Ən ciddi siqnal odur ki, onun sosial şəbəkədəki tərəfdarları artıq onu müdafiə etmirlər. O, sosial şəbəkələrin fəal istifadəçisi idi və ona böyük dəstək var idi. İndi artıq onun sosial şəbəkədəki tərəfdarlarının da sıraları seyrəlməkdədir. Sanki iki ildən sonra xalq başa düşüb ki, çox böyük səhvə yol verib. Yəni küçə adamını hakimiyyətə gətiriblər. O üzdən, bu gün peşmançılıq hissi Ermənistan cəmiyyətində baş alıb gedir. Artıq ölkədə belə bir rəy yaranıb ki, Ermənistanda qanlı inqilab baş verə bilər”.
Artıq Paşinyanın ən yaxın tərəfdarları onun axırının çatdığını fərq etdikləri üçün, sosial şəbəkələrdə Baş naziri müdafiə etməkdən yayınırlar. Bu, əslində, Paşinyan üçün ciddi siqnaldır.
Vidadi ORDAHALLI
