“Azərbaycan dünya miqyasında nadir ölkələrdəndir ki, koronavirusa yoluxan bütün xəstələr tibbi müəssisələrdə müalicə alır. Dünya praktikası tam başqadır. Bir çox ölkələrdə xəstəliyi simptomsuz keçirənlər, xəstəliyə düçar olmuş insanlar ev şəraitində müalicə alırlar, onları heç xəstəxanalara da qəbul etmirlər. Əlbəttə ki, bu, onların sağlamlığına təhlükə yaradır. Azərbaycanda koronavirusdan ölənlərin sayının az olmasının səbəblərindən biri də məhz odur ki, yoluxmuş bütün xəstələr tibbi müəssisələrə qəbul edilir və onlara lazımi xidmət göstərilir”.
Bu sözləri Prezident İlham Əliyev paytaxtın Bilgəh qəsəbəsində, həmçinin, Sumqayıt şəhərində və Abşeron rayonunun Saray qəsəbəsində quraşdırılan modul tipli xəstəxana komplekslərinin açılışında çıxışı zamanı qeyd edib.
Prezident bildirib ki, koronavirusla bağlı qabaqlayıcı bütün tədbirlər elə görülüb ki, ən çətin vəziyyətə hazır olaq. Bu məqsədlə yeni laboratoriyalar alınıb.
Doğrudan da bu gün koronavirusdan əziyyət çəkən ölkələrlə müqayisədə Azərbaycan ön sırada dayanır. Bir sıra inkişaf etmiş ölkələrlə müqayisədə Azərbaycanda bu xəstəliyə yoluxanlar xəstəxanada müalicə alır, onlara hər bir tibbi göstəriş tətbiq olunur. Ancaq əksər xarici ölkədə xüsusi risq qrupuna aid olan xəstələr xəstəxanaya qəbul edilmir, onların sağalması üçün soyuq münasibət göstərilir. Bu səbəbdən də xarici ölkələrdə koronavirusdan vəfat edənlərin sayı Azərbaycanla müqayisədə çoxdur.
“…ölkəmizdə bütün xəstələr eyni səviyyədə müalicə olunur, burada hər hansı bir yaş faktoru, məhdudiyyəti yoxdur”
“Vəfa” Sosial-İctimai Birliyinin sədri Fatimə Hacıbəyli qəzetimizə açıqlamasında qeyd etdi ki, Azərbaycan ilk gündən bu epidemiyanın lokallaşdırılması üçün həm məhdudiyyət tədbirlərini həyata keçirdi, həm də xəstələrin üzə çıxarılması, onların müalicə olunmasını böyük diqqətə götürdü. “Başqa ölkələrlə müqayisədə Azərbaycanda koronavirusdan əziyyət çəkən xəstələrin sayı elə də sürətlə artmır. Bu baxımdan ölkəmiz inkişaf etmiş ölkələrdən belə fərqlidir. Hər milyon nəfərə düşən xəstə sayına görə Azərbaycanın göstəriciləri çox aşağıdır. Azərbaycanda koronavirusa yoluxanları Avropa ölkələri və digər ölkələrlə müqayisə etsək, burada böyük fərq aşkar olunar. Bir sıra Avropa ölkələrində gün ərzində koronavirusa yüz yox, minlərlə insan yoluxur. Avropa ölkələrinin əhali sayı Azərbaycandan 7-8 dəfə çoxdur. Ancaq, bununla belə, Azərbaycanda həm xəstələrin, həm də ölənlərin sayı pandemiyanın geniş yayıldığı ölkələrlə müqayisədə həddən artıq aşağıdır. Avropa ölkələri, həmçinin, qoca, yaşlı insanların müalicəsindən imtina yolu tutublar. Bununla bağlı kifayət qədər fakt var. Azərbaycanda isə virus aşkarlanan bütün xəstələrə göstərilən münasibəti başqa ölkələrlə müqayisə edə bilmərik. Ölkəmizdə bütün xəstələr eyni səviyyədə müalicə olunur, burada hər hansı bir yaş faktoru, məhdudiyyəti yoxdur. Azərbaycan, Avropa ölkələri və digər dövlətlər kimi, koronavirusa tutulan xarici vətəndaşları öz ölkələrinə deportasiya etmir, əksinə, imkanları hesabına onları da müalicə etdirir. Vaxtında sərhədlərin bağlanması, insanların hərəkətinə məhdudiyyətlərin qoyulması, vaxtında laboratoriyaların, müayinə və müalicə vəsaitlərinin, xüsusən də müayinə testinin alınması bu xəstəliyin daha geniş yayılmasının qarşısını aldı”.
Günel CƏLİLOVA
