Prezident İlham Əliyevin və birinci xanım Mehriban Əliyevanın iştirakı ilə üç modul tipli xəstəxananın açılışı olub. Prezident tədbirdəki nitqində koronavirusla mübarizənin Azərbaycan modelindən danışıb:
“Onu da bildirməliyəm, Azərbaycan dünya miqyasında nadir ölkələrdəndir ki, koronavirusa yoluxan bütün xəstələr tibbi müəssisələrdə müalicə alır. Dünya praktikası tam başqadır. Bir çox ölkələrdə xəstəliyi simptomsuz keçirənlər, xəstəliyə düçar olmuş insanlar ev şəraitində müalicə alırlar, onları heç xəstəxanalara da qəbul etmirlər. Əlbəttə ki, bu onların sağlamlığına təhlükə yaradır. Azərbaycanda koronavirusdan ölənlərin sayının az olmasının səbəblərindən biri də məhz odur ki, yoluxmuş bütün xəstələr tibbi müəssisələrə qəbul edilir və onlara lazımi xidmət göstərilir”.
Prezident bildirib ki, dünyada baş vermiş hadisələrə və bir çox inkişaf etmiş ölkələrdə koronavirusla bağlı acınacaqlı vəziyyətə baxdıqda bir daha görürük ki, Azərbaycan bu sahədə də öz modelini ortaya qoyub və bütün hədəflərə ardıcıllıqla, məqsədyönlü şəkildə çata bilib:”Əlbəttə ki, mən bizi başqa ölkələrlə müqayisə etmək fikrində deyiləm. Ancaq dünyada hər şey müqayisə ilə ölçülür. Misal üçün, bugünə qədər Azərbaycanda yoluxanların sayı 8 minə qədərdir, 350 mindən çox test keçirilib və adambaşına testlərin sayına görə biz qabaqcıl yerlərdəyik. Ancaq qonşu Ermənistanda yoluxanların sayı 13 mini ötüb və testlərin sayı bizdəkindən 5-6 dəfə azdır. Nəzərə alsaq ki, Ermənistan əhalisi Azərbaycan əhalisindən 5 dəfə azdır, mənzərə tam aydındır. Əgər mən gündə yüzlərlə təşəkkür məktubu alıramsa, Ermənistan rəhbərliyi yüzlərlə lənətlə dolu çağırışlar eşidir”.
Ölkə başçısının rəhbərliyi altında Azərbaycan doğrudan da pandemiya ilə mübarizədə öz modelini ortaya qoya bilib. Bu gün koronavirus infeksiyasına yoluxanların sağalması üçün ən müasir tibbi avadanlıqlar, müalicə üçün yeni dərman preparatları ölkəyə gətirilir. Əgər fevral ayının əvvəllinə qədər ölkəmizdə 2 test laboratoriyası mövcud idisə, qısa müddət ərzində bu say 20-yə çatdırıldı. Yeni 10 modul tipli xəstəxananın quraşdırılması ilə bağlı ölkə prezidenti tərəfindən imzlanan sərəncam, qısa müddət ərzində onların bir neçəsinin açılışının həyata keçirilməsi, yeni istehsal müəssisələrinin yaradılması, ölkəmizdə daha çox vətəndaşın müayinəsinin həyata keçirilməsi, tibbi testlərin ölkəmizə gətirilməsi Azərbaycan Prezidentinin apardığı siyasətin mərkəzində ölkə vətəndaşının dayandığını göstərir.
İnsanlarımızın minimal zərər və maksimal qalibiyyətlə COVİD-19-la mübarizə çərçivəsində dövlətin həyata keçirmiş olduğu ciddi layihələr və bu layihələrin dünya səhiyyə təşkilatı tərəfindən yüksək qiymətlədnirlıməsi, dəfələrlə Azərbaycan Prezidentinə təşəkkür edilməsi onu göstərir ki, bu gün Azərbaycan modeli qlobal pandemiyaya qarşı mübarizədə xüsusi yer tutur. Bununla bağlı ən yüksək səviyyədə müzakirələrin aparılması ilə dövlət başçısının həm ölkəmizin bugünkü dövrü, həm də bundan sonrakı uzunmüddətli inkişaf trayektoriyası üçün konkret planlara sahib olduğu və ölkəmizin hər bir vətəndaşının sağlamlığının keşiyində durduğu, bu yöndə konkret addımlar atdığı ortaya çıxıb. Beynəlxalq təşkilatlar, xüsusilə dünya səhiyyə təşkjilatı tərəfindən Azərbaycan modeli yüksək qiymətləndirilir. Azərbaycan öz təşəbbüsləri və praktik addımları ilə dünyada həmrəyliyin möhkəmlənməsinə, indiki mürəkkəb şəraitdə dövlətlər və xalqlar arasında təmasların artmasına, qlobal pandemiya ilə mübarizədə səfərbərliyə ciddi töhfələr verib. Bundan başqa, Azərbaycan koronavirusla qlobal mübarizəyə dəstək olaraq, ÜST-ə 5 milyon dollar könüllü maliyyə yardımı da ayırıb. O bunu pandemiya ilə mübarizədə yardıma ən çox ehtiyacı olan Qoşulmama Hərəkatı üzvlərinin dəstəklənməsi məqsədilə edib.
ÜST-ün baş direktoru Tedros Adhanom Qebreyesus Prezident İlham Əliyevə martın 23-də ünvanladığı məktubda Azərbaycanın pandemiya ilə mübarizədə gördüyü işləri yüksək qiymətləndirib, bu mənada Azərbaycanı nümunəvi ölkə adlandırıb. Həqiqətən də, Prezident İlham Əliyevin rəhbərliyilə görülmüş qabaqlayıcı tədbirlər nəticəsində bu gün koronavirusla ən effektiv mübarizə aparan ölkələrin sırasında Azərbaycanın adı birincilər cərgəsində çəkilir, onun bu fəaliyyəti beynəlxalq səviyyədə təqdir olunur. Konkret olaraq, sosial-iqtisadi sahədə atılmış addımlar dünyanın aparıcı maliyyə qurumları, o cümlədən Avropa Yenidənqurma və İnkişaf Bankı tərəfindən yüksək qiymətləndirilir.
Məhəmmədəli QƏRİBLİ
