Ermənistan Rusiyaya qarşı proseslərdə özünə yol yoldaşı axtarışına çıxıb. Erməni mediasının verdiyi məlumata görə, Qırğızıstan prezidenti Sooronbay Jeenbekov Ermənistan Baş naziri Nikol Paşinyana zəng edib.
Ermənistan hökumətinin mətbuat xidmətindən verilən məlumatda türk respublikasının başçısının baş nazirin və ailəsinin səhhəti ilə maraqlandığı bildirilib:“Qırğızıstan prezidenti Ermənistan Baş nazirinin və ailəsinin sağlamlıq vəziyyəti ilə maraqlandı, onlara cansağlığı və uğurlar arzuladı”. Tərəflər iyunun 24-də Moskvada İkinci Dünya Müharibəsində Qələbənin 75 illiyi münasibətilə keçiriləcək tədbirlər çərçivəsində həmsöhbət olacaqlarına ümid etdiklərini bildiriblər. Əlavə edək ki, Nikol Paşinyan bir müddət əvvəl özünün və ailə üzvlərinin koronavirusa yoluxduğunu açıqlamışdı.
Qeyd edilir ki, Ermənistan rəhbəri Qırğızıatanı Avrasiya İqtisadi Birliyi daxilində Rusiyaya qarşı demarşa istiqamətləndirməyə çalışır. Ermənistanın baş naziri Nikol Paşinyan ötən ayın ortalarında yerli jurnalistlər üçün keçirdiyi mətbuat konfransında “Avrasiya İqtisadi Birliyinin strateji inkişaf planı razılaşdırılıb və yalnız bir məqam - vahid qaz bazarı məsələsi açıq qalır” deyə açıqlama vermişdi. Qırğızıstanı da vahiq qaz bazarı ilə bağlı məsələdə ozləri ilə həmfikir olmağa istiqamətləndirməyə çalışırlar. Ermənistanın bu cəhdləri hansı effekti verə bilər?
Politoloq Yeganə Hacıyeva “Bakı-Xəbər”ə açıqlamasında bildirdi ki, Ermənistanın məhz Qırğızıstana bu yöndə meyl etməsi təsadüfi deyil: “Bunun başlıca səbəbi Ermənistanın xarici siyasət kursunun hələ də qeyri-müəyyən olması ilə bağlıdır. Artıq sadə erməni də görür ki, hakimiyyət konkret istiqamət üzrə xarici siyasət kursu həyata keçirmir. Bütün bu tənələrdən uzaq olmaq üçün Ermənistan hakimiyyəti, güya müəyyən kombinasiyalı gedişlər etdiyinə dair təsəvvür yaratmaq istəyir. Əslində heç bir perspektivi olmayan gedişdi. Çünki Qırğızıstanla Ermənistanı yaxın edə biləcək elə bir ciddi əsaslar yoxdu. Bu ölkələr bir təşkilatda təmsil olunsalar da, tammilə fərqli coğrafiyalarda yerləşirlər. Ermənistandan fərqli olaraq, Qırğızıstanın mövqeyi, xarici siyasət kursu stabil və aydındır. Ermənistan hakimiyyəti belə gedişləri həm də daxili rəyi çaşdırmaq üçün edir. Çünki hazırda Ermənistandakı daxili vəziyyət çox gərgindir. Ermənistan daha çox çalışır ki, Rusiyadan güzəştli qaz alsın. Bu tələbə Putin aydınlıq gətirdi ki, bunun üçün Avrasiya Birliyi daxilində inteqrasiyalar daha da dərinləşməlidir. Hesab edirəm ki, Ermənistanın bu hərəkətləri tam fiasko ilə nəticələnəcək. Çünki heç bir ölkə zəif, dilənçi günündə olan Ermənistanla birlikdə Rusiyaya qarşı alyansda yer almaz. Bununla Paşinyan növbəti blefini edir. Hələlik Qırğızıstanın rəhbərliyi də bununla bağlı hər hansı razılıq verməyib. Erməni mediası bu yöndə yalnız öz istəklərini yazır. Bunun baş tutacağı qətiyyən innadırıcı görünmür. Son vaxtlar Ermənistan Azərbaycanla yaxın münasibətləri olan başqa ölkələrlə də belə yaxın əməkdaşlıq cəhdləri etdi, ancaq onların heç bir faydası olmadı. Çünki Ermənistan elə bir cəzbedici ölkə deyil ki, kimsə onunla dərin əməkdaşlıqda maraqlı olsun”.
Məhəmmədəli QƏRİBLİ
