12/07/2020 03:40
728 x 90

Prezident Əliyev Asiya Bankı rəhbərliyinə pandemiya ilə mübarizənin milli platformasını və real nəticələri təqdim etdi...

Bəhruz Quliyev: “...inkişaf və tərəqqi trayektoriyasının nə qədər geniş əhatəyə malik olduğunu isbatlayır”

img

Məlum olduğu kimi, iyunun 1-də Asiya İnkişaf Bankının təşəbbüsü ilə Azərbaycan Respublikasının Prezidenti İlham Əliyevlə bankın rəhbərliyi arasında videokonfrans keçirilib.

Videokonfransda Prezident İlham Əliyev pandemiya ilə mübarizə dövründə ölkəmizdə görülən işlərdən danışıb. O, dövlətimiz tərəfindən başqa ölkələrə yardımlar olunduğunu, aidiyyəti beynəlxalq qurumlarla sıx əməkdaşlıq edildiyini, həmçinin, ölkə içində iqtisadiyyata və digər istiqamətlərə dəstək verildiyini vurğulayıb.

“... Əlbəttə ki, pandemiya dövründə göstərdiyimiz bütün səylər insanları necə xilas etmək, onların sağlamlığını, həyatlarını necə qorumaq məqsədi daşıyıb. Azərbaycanın vaxtında gördüyü tədbirlər sayəsində biz minimum itki vermişik. Ümumdünya Səhiyyə Təşkilatının bəyanatlarına əsasən, Azərbaycan pandemiya ilə mübarizədə nümunə hesab olunur. Biz, həmçinin, böyük həcmdə vəsait ayırmışıq. İqtisadiyyatın pandemiyadan zərər çəkən sektorlarını dəstəkləmək, eləcə də işsizləri, işini itirmiş insanları, aztəminatlı insanları və hətta qeyri-formal məşğulluğa cəlb olunmuş insanları dəstəkləmək üçün 2 milyard avrodan çox vəsait ayırmışıq” - deyə Prezident İlham Əliyev qeyd edib.

Bütün bunların Azərbaycanın beynəlxalq nüfuzunun artmağında nə kimi rolu olacaq?

  • “...həm də ölkəmizin dünya ölkələrinə göstərdiyi yardımlar Azərbaycanın beynəlxalq aləmdə nüfuzunun...”

 “Səs” qəzetinin və eyniadlı agentliyin baş redaktoru, siyasi ekspert Bəhruz Quliyev “Bakı-Xəbər”ə bildirdi ki, Prezident İlham Əliyevin  sözügedən videokonfransda vurğuladığı fikirlərin Azərbaycanın beynəlxalq aləmdə nüfuzunun daha da artmasında böyük əhəmiyyəti var.  “Azərbaycanda Prezident İlham Əliyev tərəfindən yürüdülən siyasət faktoru çoxşaxəlidir və ən əsası budur ki, hər birinin kökündə, təməlində vətəndaş amili, xalqın sosial rifahının mükəmməl şəkildə təminatı gerçəkliyi dayanmaqdadır. Xüsusilə pandemiya dövründə həyata keçirilən layihələr və reallaşdırılan məqsədlər deyərdim ki, öz miqyasına görə bir çox aparıcı ölkəni geridə qoyur”.

Siyasi ekspertin fikrincə, dövlət başçısı dəfələrlə öz çıxış və tezislərində insan faktorunun daim öndə saxlandığını vurğulayıb və məqsədinin bilavasitə xalqa xidmət etmək olduğunu bildirib: “Videokonfrans zamanı da bu fikirləri diqqətə çatdıran və xüsusi olaraq önə çəkən ölkə rəhbərimiz hazırkı məqamda insanların sağlamlıqlarının qorunmasının prioritetlik təşkil etdiyini xüsusi olaraq vurğulayıb. O da əbəs deyil ki, bir sıra ölkələrdən fərqli olaraq, pandemiyanın artdığı vaxt Azərbaycanda həyata keçirilən tədbirlər nəticəsində minimum itkilər müşahidə olunub. Hətta tətbiq edilən önləyici tədbirlərimiz başqa ölkələr tərəfindən öyrənilib, nümunə olaraq istifadə olunub. İstər Ümumdünya Səhiyyə Təşkilatının, istər digər mötəbər beynəlxalq qurumların, istərsə də ayrı-ayrı dövlət başçılarının Azərbaycanda aparılan işlərə yüksək qiymət vermələri də sübut edir ki, ölkəmiz istənilən fors-major hallardan minimum itkilərlə çıxmaq gücündədir. Əlbəttə ki, bütün bunların təməlində uzun illərdir həyata keçirilən mütərəqqi, məqsədyönlü və qətiyyətə hesablanmış uğurlu idarəçilik mexanizmi dayanmaqdadır. Əgər ölkəmizdə sosial-iqtisadi siyasətin dinamik inkişafı olmasaydı, Azərbaycan regional və beynəlxalq layihələrdə iştirakçı, təşəbbüskar və ideyaverici rolunda çıxış etməsəydi, ümumiyyətlə, ən vacib iqtisadi, enerji, sənaye və s. sektorlar üzrə siyasi iradə ortaya qoyulmasaydı, bu gün həmin uğurlardan danışmaq olmazdı”.

B.Quliyev, həmçinin, qeyd etdi ki, bu gün Prezident işsizliyin, aztəminatlılığın aradan qaldırılması, pandemiyadan zərər çəkən sahələrin dəstəklənməsi üçün bütün imkanlardan istifadə edirsə, artıq bu faktın özü Azərbaycan dövlətinin iqtisadi gücünün göstəricisi kimi qiymətləndirilə bilər: “Dövlət başçısı videokonfrans zamanı da bu fikirlərini önə sürərək xatırlatdı ki, qeyd olunanlarla yanaşı, hətta qeyri-formal məşğulluğa cəlb olunmuş insanları dəstəkləmək üçün 2 milyard avrodan çox vəsait ayrılıb. Bəlli səbəbdən 4 ay ərzində iqtisadi artımımızın çox az olduğunu da deyən ölkə rəhbərimiz, bununla belə, həmin artımın 0,2 faiz təşkil etdiyini də vurğulayıb. Halbuki, bir sıra dövlətlər hətta iqtisadi portensiallarına baxmayaraq, resessiya dövrünü yaşayırlar. Prezident İlham Əliyev də bu məsələyə diqqət çəkərək, hətta neftin qiymətinin düşməsinə baxmayaraq, iqtisadi sabitliyin qorunub saxlanması reallığını videokonfrans iştirakçılarının diqqətinə çatdırıb. Yəni bu gün sosial layihələr ixtisara salınmırsa, büdcədən çıxarılmırsa, bu, Azərbaycan dövlətinin uğurlu siyasət tandeminin bariz göstəricilərindən biri kimi dəyərləndirilməlidir. On görə də cənab Prezident qeyd etdi ki, ümumilikdə, Azərbaycan yaxşı nəticələr nümayiş etdirən ölkələr arasında olacaq.

Daha bir mühüm nüans isə Azərbaycan dövlətinin pandemiya başladığı andan yardım üçün, hər hansı digər dəstək üçün müəyyən qurumlara müraciət etməməsi ilə bağlıdır”.

Baş redaktor hesab edir ki, dövlət başçısı yardım üçün müraciət edən 150 ölkədən fərqli olaraq, Azərbaycanın buna ehtiyacının olmadığını deyib: “Əlbəttə, bu bizim iqtisadi gücümüzün mövcudluğu ilə yanaşı, həm də ehtiyatlarımızın qorunub saxlanmasının, artırılmasının nəticəsidir. Azərbaycan dövləti və rəhbərliyi qarşıya qoyulan bütün hədəflərə nail olur və hazırda istənilən problemin aradan qaldırılması üçün var gücünü ortaya qoyur, yeni planların icrası üçün səylər göstərilir. O cümlədən, Azərbaycan bir sıra ölkələrə humanitar yardımlar da göstərir ki, bu da ölkəmizin güc amilini, inkişaf və tərəqqi trayektoriyasının nə qədər geniş əhatəyə malik olduğunu isbatlayır. Pandemiya dövründə həm ölkə daxilində həyata keçirilən saysız-hesabsız iş, həm də ölkəmizin dünya ölkələrinə göstərdiyi yardımlar Azərbaycanın beynəlxalq aləmdə nüfuzunun daha da artmasına, genişlənməsinə səbəb olacaq. Hesab edirəm ki, dayanıqlı və dinamik inkişaf gerçəkliyi qarşıdakı zamanlarda növbəti uğurlara imza atmaq üçün də geniş şərait və imkanlar yaratmaqdadır” - deyə B.Quliyev vurğuladı.

İradə SARIYEVA

Son xəbərlər