Prezident İlham Əliyev Asiya İnkişaf Bankının təşəbbüsü ilə bankın prezidenti Masatsuqu Asakava, vitse-prezidenti Şiksin Çen və bankın rəhbərliyinin digər nümayəndələri arasında keçirilən videokonfransda Azərbaycanın pandemiya ilə bağlı mübarizədə yardım üçün heç bir quruma müraciət etmədiyi, əksinə, bizim digər ölkələrə yardım göstərdiyimiz barədə məlumat verib:
"Əvvəla qeyd etmək istərdim ki, koronavirusla mübarizədə və dünya miqyasında göstərdiyimiz təşəbbüslərlə bağlı yaxşı məlumatlı olmağınız məni çox sevindirir. Belə təsadüf edib ki, Azərbaycan hazırda sizin də qeyd etdiyiniz kimi, iki təşkilata - Türkdilli Dövlətlərin Əməkdaşlıq Şurasına və Qoşulmama Hərəkatına sədrlik edir. Ötən il bizim çox uğurlu Zirvə görüşümüz olmuşdur və Azərbaycan 120 ölkənin yekdil qərarı ilə bu təşkilata sədr seçilmişdir. Buna görə düşündük ki, bütün dünya üçün bu önəmli vaxtda liderlik göstərmək və çox mühüm əməkdaşlıq formatını yaratmaq bizim öhdəliyimizdir. Hər iki Zirvə görüşü uğurla keçdi. Sizə deyə bilərəm ki, biz nəinki təkcə koronavirusla mübarizə sahəsində fikir mübadiləsi apardıq, eyni zamanda, qarşılıqlı dəstək göstərdik. Zirvə görüşündən sonra üzv ölkələrin müvafiq nazirlərinin iştirakı ilə koronavirusla mübarizə sahəsində birgə səylərlə bağlı çox mühüm məsələlərə həsr olunan bir sıra konfranslar keçirilmişdir.
Həmçinin bizim Ümumdünya Səhiyyə Təşkilatına ianəmiz haqqında da sizin yaxşı məlumatınız var. Düşünürəm ki, biz ilk dəfə beş milyon dollar ayıran ölkələr arasında birinci ölkələrdən idik, sonra isə Qoşulmama Hərəkatının sədri qismində əlavə beş milyon dollar ayırdıq. Biz Azərbaycan tərəfindən verilmiş humanitar dəstəklə artıq 14 ölkəni əhatə etmişik. Bu, həm maliyyə, həm avadanlıq, həm də tibbi ləvazimatlar dəstəyi olmuşdur. Həmçinin Ümumdünya Səhiyyə Təşkilatı vasitəsilə biz yardıma ən çox ehtiyacı olan 15 ölkəyə dəstək göstərəcəyik. Ümumdünya Səhiyyə Təşkilatı ilə razılaşmada bu 15 ölkə müəyyən olunub. Ona görə də bu müddət ərzində Azərbaycan demək olar ki, 30 ölkəyə dəstək verib. Düşünürəm ki, bu, bizim üzərimizə düşən məsuliyyətdir. Çünki bu çətin zamanda ölkələr və insanlar bir-birini dəstəkləməlidirlər”.
Göründüyü kimi, ölkə başçısı Azərbaycanın beynəlxalq donorluq təşəbbüsü və görülən konkret işlərdən danışıb. Yaxın gələcəkdə də 15 ölkəyə yardım göstərəcəyimizi deyib. Ölkəmizin bu addımları nəyi deməyə əsas verir? Eyni zamanda, ölkə başçısı videogörüşdə ölkəmizin koronavirusla mübarizə sahəsində ÜST-lə geniş əməkdaşlığından da danışıb. Azərbaycanın gördüyü işlər hətta digərləri üçün örnək də sayıla bilər. Bu özünü daha çox hansı istiqamətlərdə göstərə bilib? Görünən budur ki, Azərbaycan koronavirus xəstəliyinin yayılmasının qarşısının alınması üçün çevik və zəruri qabaqlayıcı addımlar atıb. Demək olar ki, ÜST-ün bütün tövsiyələrinə əməl edib. Hətta bu istiqamətdə ÜST-ə də yardım əlini uzadıb. Ümumdünya Səhiyyə Təşkilatının Baş direktorunun Prezident İlham Əliyevə göndərdiyi məktubdan görünür ki, Azərbaycanda görülmüş işlərə yüksək qiymət verilir. Azərbaycan pandemiyaya qarşı görülmüş tədbirlərə görə nümunəvi ölkə kimi dəyərləndirilib. Azərbaycan qlobal həmrəylik nümayiş etdirərək koronavirusa qarşı mübarizədə Ümumdünya Səhiyyə Təşkilatına könüllü maliyyə yardımı ayırıb. Azərbaycan tərəfindən Ümumdünya Səhiyyə Təşkilatının strateji hazırlıq və cavab planı çərçivəsində COVID-19 müraciəti Fonduna könüllü maliyyə yardımının ayrılmasını nəzərdə tutan donor sazişi imzalanıb. Bütün bunlar göstərir ki, Azərbaycan Ümumdünya Səhiyyə Təşkilatının pandemiyaya qarşı qlobal mübarizəsində mühüm rol oynayır. Dünyanın bir sıra inkişaf etmiş ölkələri Beynəlxalq Valyuta Fondu və Dünya Bankından, digər beynəlxalq qurumlara yardım üçün müraciət etdiyi halda, Azərbaycan özünün gücü hesabına pandemiyanın öhdəsindən gəlməyə qadir olduğunu nümayiş etdirir. Prezident İlham Əliyevin uzaqgörənliyi və vaxtında verilmiş qərarları nəticəsində ölkəmizdə vəziyyət stabilləşib. Vətəndaşlarının təhlükəsizliyini və sosial rifahını qorumaq üçün bütün lazımi tədbirlər görülüb. Məhz bunun üçün Azərbaycan, nəinki koronavirusla mübarizədə uğurlu ölkə kimi, eyni zamanda bu sahədə artıq model ölkə kimi nümunə göstərilir. Pandemiya dövründə, xüsusən son günlərdə əhalinin sosial müdafiəsi və məşğulluğu ilə bağlı ciddi addımlar atılır. Hazırda dövlət başçısının tapşırıqlarına əsasən ölkədə bütün diqqət vətəndaşların sosial təminatına və məşğulluğuna yönəldilib. Dövlətin hazırladığı dəstək proqramı çərçivəsində koronavirus pandemiyasının vətəndaşlara təsirlərinin minimuma endirilməsi və iqtisadiyyatın dayanıqlığının təmin edilməsi mərhələli şəkildə həyata keçirilir. Məhz bu doğru siyasətin nəticəsidir ki, Azərbaycan başqa ölkələrə yardım əlini uzadır və bundan sonra da uzatmağı planlayır.
Məhəmmədəli QƏRİBLİ
