Məhəmməd Əsədullazadə: “Ermənistan daxilində Rusiyaya qarşı əks-təbliğata Paşinyan rəhbərlik edir”
Erməni mediası yazır ki, İrəvanda Rusiya hakimiyyətinə inamsızlıq artır, münasibətlər getdikcə mürəkkəbləşir. Bununla bağlı bir sıra faktlar vəziyyətin son dərəcə ciddi olmasından xəbər verir.
Bu barədə Ermənistanın “Fakt”qəzetində bir sıra məqamlara toxunulub.
Nəşrin bildirdiyinə görə, əslində, son iki ildə Ermənistan-Rusiya münasibətləri, yumşaq desək, qeyri-müəyyəndir. Bununla bağlı konkret bir sıra faktlar göstərilib: “İndi həm Xarici İşlər naziri Zöhrab Mnasakanyan, həm də Baş nazir Paşinyan Rusiya Federasiyası ilə real problemlər faktını tanıyırlar. Sergey Lavrovun Qarabağla bağlı sərt açıqlamaları, Paşinyanın Moskva səfərindən imtina edilməsi, qaz qiymətləri, Lavrovun Robert Köçəryanın həbsi məsələsini müzakirə etmək çağırışı, Ermənistan Respublikası parlamentinin spikeri Ararat Mirzoyan ilə Rusiya Federasiyası Dövlət Dumasının sədri Vyaçeslav Volodin arasında qalmaqallı telefon danışığı – bunların hamısı bariz nümunələrdir. Və son nəticə: Moskva İrəvana təzyiq göstərir”.
Belə məlum olur ki, ötən müddət ərzində iki ölkənin münasibətləri xeyli gərginləşib. Bununla belə, tərəflər arasında gərginlik kontekstində qeyri-müəyyənlik davam edir. Bütün bunlar Ermənistana nə vəd edir?
- “Lavrovla ölkə rəsmilərinin danışıqları nəticəsiz olacaq”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə kontekstdən yanaşdı: “Rusiyanın Ermənistandakı iqtidara qarşı münasibəti mənfidir. Çünki Paşinyan da anti-Rusiya siyasətini davam etdirir. Rusiyanın israrlı tələblərinə baxmayaraq, eks-prezident R.Köçəryanın həbsdə saxlanması, qazın qiymətlərində Ermənistana güzəşt edilməməsi gərginliyi artırır. Bütün bunlarla bağlı İrəvanda Moskvaya qarşı siyasi və mətbuat səviyyəsində ciddi tənqidlər səslənir. Hesab edirəm ki, Ermənistan və Rusiya arasında bu soyuq münasibətlərin davam etməsi Paşinyan hakimiyyətdə olduğu müddətdə davam edəcək. Paşinyandan sonra da Ermənistanda anti-Rusiya qüvvələr hakimiyyətə gələrsə, artıq Rusiya bu ölkədən əlini üzə bilər. Əlbəttə, Ermənistan daxilində Rusiyaya qarşı əks-təbliğata Paşinyan rəhbərlik edir. Düşünürəm ki, Lavrovla Ermənistan rəsmilərinin danışıqları nəticəsiz olacaq. Göründüyü kimi, Paşinyan və komandası anti-Rusiya ritorikasında qərarlıdır və bu səbəbdən ikitərəfli əlaqələrdə problemlər dərinləşir. Rusiya Ermənistanda bu kimi problemləri rəhbər tutub bu ölkəyə yardım etməyəcək”.
Vidadi ORDAHALLI
