Məlum olduğu kimi, Prezident İlham Əliyev Seymur Orucovu Ağstafa, Elçin Rzayevi isə İmişli rayon icra hakimiyyətlərinin başçısı vəzifələrinə təyin olunmaları ilə əlaqədar videoformatda qəbul edib. Ölkə başçısı gənc icra başçılarını təşəbbüskar olmağa, rayona investisiya cəlb etməyə çağırıb:“Sizin fəaliyyətiniz rəhbərlik edəcəyiniz rayonların sosial-iqtisadi inkişafında özünü göstərməlidir. Çünki, açıq demək istəyirəm, təxminən son 17 il ərzində bölgələrdə görülmüş işlərin ən azı 90 faizi mənim təşəbbüsümlə görülüb, dövlət proqramları çərçivəsində görülüb”.
Prezident bildirib ki, son 17 il ərzində 16 min kilometr avtomobil yolu çəkilib, bütün elektrik təsərrüfatı, demək olar ki, yenidən qurulub:“Biz qazlaşdırmanı təxminən 100 faizə çatdırmışıq, 3500-dən çox məktəb, 700-dən çox tibb ocağı, 50-yə yaxın Olimpiya İdman Mərkəzi, nə qədər Gənclər evləri, mədəniyyət sarayları, digər sosial obyektlər tikilib. Bütün bunları biz mənim bilavasitə göstərişimlə dövlət büdcəsi hesabına etmişik. İndi baxaq görək icra başçıları nə iş görüblər, hansı daşı daş üstünə qoyublar. İndi bütün bu işlər təftiş edilir. Mənim ayırdığım vəsait hesabına tikilmiş evlər, yəni qəzalı evlərin əvəzinə tikilmiş evlərin tikintisində də oğurluq baş verir, həm tikintidə, həm də ki, ondan sonra mənzillərin bölüşdürülməsində. Bu evlərin insanlara tamamilə pulsuz verilməsi nəzərdə tutulub. Amma həm tikintidə pul oğurlanır, həm də mənzillər rüşvət müqabilində paylanılır. Deməli, insanlardan pul qopardılır. İndi təftiş aparılır və bütün bu pozuntularda əli olan vəzifəli şəxslər məsuliyyətə cəlb ediləcək. İcra başçısı ona göstərilən etimadı öz işi ilə doğrultmalıdır”.
Göründüyü kimi, ölkə başçısı bütün icra qurumlarının ünvanına kəskin irad bildirib və onların rayonların inkişafı üçün heç bir təşəbbüs göstərmədiklərini nəzərə çatdırıb, əksər işlərin məhz onun təşəbbüsü ilə görüldüyünü deyib. İcra başçılarının indiyə qədər bu istiqamətdəki yarıtmaz fəaliyyəti nə ilə bağlı olub?
Iqtisadçı Asif İbrahimov “Bakı-Xəbər”ə açıqlamasında bildirdi ki, Prezidentin bu iradı tamamilə haqlıdır:“Hələ icra başçıları korpusunda həbslərin başlanmasından əvvəl Prezident keçirdiyi müşavilərdə bir neçə dəfə rayonlara investisiya cəlbinin zəruriliyindən danışdı. Hətta bu xüsusda icra başçılarına xaricdən investisiya cəlbi üçün yaşıl işığın yandırıldığını da dedi. Araşdırın görün, heç bu addımı atan icra başçısı olubmu? Bizim əksər rayonlarımızın gözəl və cəlbedici imkanları var. Sadəcə, bu istiqamətdə səylər göstərmək lazımdır. Ancaq bizim icra başçıları çox asan fəaliyyət növü tapmışdılar. Reallaşan həbslərdən görünür ki, onların iş prinsipləri necə də bir-birinə bənzəyir. Demək olar ki, əksəriyyəti büdcə pullarının eyni ssenari ilə talanmasını həyata keçirib. Hətta Prezidentin abadlıq üçün ayırdığı pulları da müxtəlif vasitələrlə talayıblar.
Rayon icra hakimiyyəti başçılarının abadlıq adı ilə sahibkarlardan pul toplaması halı çox yaşanıb. Yolların təmiri, üzlənməsi, şəhər daxilində müxtəlif formatlı mağazaların açılması kimi faktlar, demək olar ki, hər bir rayonda qeydə alınıb. Bu kimi işlərin görülməsi üçün icra başçıları vaxtaşırı kiçik və orta sahibkarlardan müxtəlif məbləğdə vəsait alırdılar. 15-20 il iş təcrübəsi olan icra başçılarının, demək olar ki, hamısı eyni ssenari üzrə korrupsiya hallarını həyata keçirib. Bütün rayonlarda icra başçılarının mülkləri, biznesləri haqqında geniş informasiya əldə etmək elə də çətin deyil.
Kiçik və orta sahibkarlığın inkişaf etdirilməsi üçün dövlət tərəfindən hər bir şərait yaradılır. Lakin bəzi məmurlar və icra başçıları sahibkarlığın inkişafına şərait yaratmaq əvəzinə, onlara müəyyən çətinlik yaradırlar. Prezident çıxışı zamanı düz buyurur ki, bəzi icra başçıları abadlıq adı ilə müəyyən məbləğdə vəsaiti oğurlayıblar. Axı həmin rayonda abadlığın aparılması üçün dövlət tərəfindən vəsait ayrıldığı təqdirdə icra başçısı niyə sahibkardan əlavə pul alır? Artıq icra qurumlarının fəaliyyətində yeni yanaşma ortaya qoyulmalıdır. Məmur vəzifəyə varlanmaq üsulu kimi yox, xalqa xidmət platforması kimi baxmalıdır. Bu yanaşma ortaya qoyulsa, dəyişikliyin şahidi olarıq. Əgər yeni kadrlara dövlət hər cür şərait yaradırsa, faydalı iş əmsalı ortaya qoymaq onların borcudur”.
Məhəmmədəli QƏRİBLİ
